ក្រុមប្រទេសមានសេដ្ឋកិច្ចកំពុងអភិវឌ្ឍន៍ខ្លាំង ហៅកាត់ថា BRICS ដែលមានសមាជិកសំខាន់ៗចំនួន៥រួមមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បួង បានបញ្ចូលប្រទេសចំនួន៥ទៀតជាសមាជិកនៅខែមករា ដើមឆ្នាំ២០២៤ នេះ រួមមានអារ៉ាប៊ីសាអូឌីត អេមីរ៉ាតអារ៉ាប់រួម អេហ្ស៊ីប អ៊ីរ៉ង់ និងអេត្យូពី។ នេះបើយោងតាមការចុះផ្សាយរបស់គេហទំព័រព័ត៌មាន វ៉ចឆ័រ ហ្គូរូ (Watcher Guru) ក្នុងសប្ដាហ៍នេះ។
ពេលនេះ ប្រទេសជាច្រើនទៀតបានដាក់ពាក្យរួចហើយ ដើម្បីសុំចូលរួមជាមួយក្រុមប្រទេស BRICS និងបេសកកម្មរបស់ក្រុមនេះនៅក្នុងការធ្វើបដិដុល្លារនីយកម្ម (De-dollarization) ឬ ការឈប់ប្រើប្រាស់រូបិយប័ណ្ណដុល្លារអាម៉េរិក។ ទន្ទឹមនឹងនេះ មានការទម្លាយដ៏គួរឱ្យភ្ញាក់ផ្អើលថា ប្រទេសរហូតដល់ទៅ១៦ទៀតអាចនឹងចូលជាសមាជិករបស់ក្រុមប្រទេស BRICS នៅក្នុងឆ្នាំ២០២៤ នេះ។
កាលពីពេលកន្លងទៅ សមាជិកទាំង១០របស់អាស៊ានព្រមព្រៀងបញ្ឈប់ការជួញដូរជាប្រាក់ដុល្លារអាម៉េរិក ហើយងាកមកប្រើប្រាស់រូបិយប័ណ្ណរបស់ខ្លួនសម្រាប់ការទូទាត់ពាណិជ្ជកម្មឆ្លងដែន។ ប្រទេសទាំងនេះទំនងជាស្ថិតក្នុងបញ្ជីឈ្មោះបេក្ខជនសុំចូលរួមជាមួយក្រុមប្រទេស BRICS ដែលនឹងពង្រឹងទំនាក់ទំនងរបស់ប្លុក BRICS ជាមួយអាស៊ាន ហើយការពង្រឹងទំនាក់ទំនងនេះនឹងជួយបន្ថែមកម្លាំងរុញច្រាននៅពីក្រោយការជំរុញឱ្យបោះបង់ប្រាក់ដុល្លារអាម៉េរិក។
អត្ថបទគួរអាន
ក្រៅពីបណ្ដាប្រទេសក្នុងអាស៊ាន ប្រទេសជាច្រើនទៀតត្រូវបានរំពឹងថា នឹងចូលរួមជាមួយប្លុកប្រទេស BRICS ដែរនៅក្នុងការដកប្រាក់ដុល្លារអាម៉េរិកចេញពីការទូទាត់ពាណិជ្ជកម្មក្នុងឆ្នាំនេះ។ ប្រធានាធិបតីរុស្ស៊ី លោក វ៉្លាឌីមៀ ពូទីន បានបញ្ជាក់ថា ប្លុកប្រទេស BRICS បើកទូលាយក្នុងការអនុញ្ញាតឱ្យប្រទេសជាច្រើនទៀតចូលរួមក្នុងប្លុកនេះ។ លោក ក៏បានព្រលយពាក្យដែរថា ការប្រកាសបញ្ចូលប្រទេសជាសមាជិកជុំថ្មីមួយទៀត អាចនឹងធ្វើឡើងនៅក្នុងកិច្ចប្រជុំកំពូលលើកទី១៦របស់ប្លុកប្រទេស BRICS ក្នុងពេលដ៏ខ្លីខាងមុខនេះ។
បណ្ដាប្រទេសនៅទ្វីបអាហ្រ្វិក និងតំបន់មជ្ឈិមបូព៌ា ដូចជាប៉ាគីស្ថាន អ៊ីរ៉ាក់ តួកគី ប៉ាគីស្ថាន នីហ្សេរីយ៉ា និងអេហ្ស៊ីបជាដើម ត្រូវបានគេរំពឹងថា នឹងក្លាយជាសមាជិកថ្មី ដែលនឹងត្រូវប្រកាសនៅក្នុងកិច្ចប្រជុំកំពូលរបស់ប្លុកប្រទេស BRICS នៅក្នុងឆ្នាំ២០២៤ នេះ។ ក្រុមប្រទេស BRICS ត្រូវបានគេមើលឃើញថា ជាគូប្រកួតប្រជែងដ៏ធំរបស់ក្រុមប្រទេសឧស្សាហកម្មឈានមុខគេទាំង៧ ហៅកាត់ថា G7 ដែលមានសមាជិកសំខាន់ៗដូចជាកាណាដា បារាំង អាល្លឺម៉ង់ អ៊ីតាលី ជប៉ុន ចក្រភពអង់គ្លេស និងសហរដ្ឋអាម៉េរិក៕
ដោយ: តែម សុខុម
None
