លោកស្រី Marise Payne រដ្ឋមន្រ្តីក្រសួងការបរទេសអូស្រ្តាលី បាននិយាយតាម Twitter កាលពីថ្ងៃទី១២ ខែមេសា ឆ្នាំ២០២០ ថា “ស្ថានទូតអូស្រ្តាលីប្រចាំនៅកម្ពុជា និងក្រសួងការបរទេសនិងពាណិជ្ជកម្ម នៅទីក្រុងកង់បេរ៉ា បានធ្វើការរួមគ្នា ដើម្បីជួយប្រជាជនអូស្ត្រាលី និងគ្រួសារចំនួន ១៨៤នាក់ ឱ្យចាកចេញពីរាជធានីភ្នំពេញនៅថ្ងៃនេះ។ យើងសូមថ្លែងអំណរគុណចំពោះការងារល្អដែលបានកើតឡើង។”
យោងតាមព័ត៌មានអូស្រ្តាលី អ្នកទាំងនេះនឹងត្រូវបានដាក់ឱ្យនៅដាច់ដោយឡែកពីគេ រយៈពេល១៤ថ្ងៃ នៅក្នុងសណ្ឋាគារមួយក្នុងទីក្រុងស៊ីដនី។
អត្ថបទទាក់ទង
ឯកអគ្គរដ្ឋទូតអូស្ត្រាលីប្រចាំនៅប្រទេសកម្ពុជា លោក Pablo Kang បាននិយាយថា លោកពិតជាមានអារម្មណ៍អស្ចារ្យណាស់ ដែលអាចជួយជនជាតិអូស្រ្តាលីឱ្យបានជួបជាមួយមនុស្សជាទីស្រឡាញ់របស់ខ្លួនវិញតាមរយៈការហោះហើរនេះ។
តាមរយៈ Twitter លោក Pablo Kang បានថ្លែងថា "យើងសូមថ្លែងអំណរគុណដល់អ្នកពាក់ព័ន្ធទាំងអស់ ដែលរួមមានរដ្ឋាភិបាលកម្ពុជាផងដែរ សម្រាប់ការគាំទ្រនិងអ្នកដំណើររបស់យើង ចំពោះការអត់ធ្មត់និងការយោគយល់។”
កម្ពុជាដែលបានដាក់កំហិតការធ្វើដំណើរក្នុងប្រទេស ពុំបានរកឃើញករណីឆ្លងថ្មីមេរោគកូវីដ១៩ នោះទេ នៅថ្ងៃទី១៣ ខែមេសា ឆ្នាំ២០២០នេះ ដោយរក្សាចំនួនករណីសរុបចំនួន ១២២ដដែល៕
