គិតត្រឹមថ្ងៃទី ១១ ខែមីនា ចំនួនអ្នកឆ្លងសរុបដែលកម្ពុជារកឃើញ មានចំនួន ១.១៦៣នាក់ ក្នុងនោះ មាន៦៥២នាក់ ជាករណីឆ្លងក្នុងព្រឹត្តិការណ៍សហគមន៍២០កុម្ភៈ។ ជាមួយគ្នានេះចំនួនអ្នកឆ្លងសរុបក៏មានការកើនឡើងដល់ទៅ៥៩៧នាក់ហើយដែរ។
ចំពោះករណីរកឃើញថ្មីចំនួន៣៩នាក់ចុងក្រោយនេះ គឺមានភាគច្រើនជាជនខ្មែរ និងត្រូវបានរកឃើញចំនួន២២នាក់ នៅភ្នំពេញ, កណ្ដាល ៩នាក់ ព្រៃវែង៦នាក់, បាត់ដំបង១នាក់ និងខេត្តព្រះសីហនុមានត្រឹមតែ១នាក់ប៉ុណ្ណោះ។
ខេត្តព្រះសីហនុប៉ុន្មានថ្ងៃមកនេះ មានករណីរកឃើញឆ្លងច្រើនលើជនជាតិចិន ប៉ុន្ដែនៅថ្ងៃទី១១ ខែមីនា ការរកឃើញ គឺមានការថយចុះមកនៅត្រឹមតែ១នាក់ប៉ុណ្ណោះ។ យ៉ាងណាក៏ដោយ ខេត្តព្រះសីហនុ ក៏នៅតែបន្ដផ្អាកការធ្វើដំណើរចេញចូលជាបណ្ដោះអាសន្ននៅឡើយ លើកលែងតែការដឹកជញ្ជូនទំនិញ។
ដោយឡែក ចំនួនអ្នកទៅចាក់វ៉ាក់សាំងកំពុងមានការសម្រុកកើនឡើងយ៉ាងគំហុក ស្របពេលដែលកម្ពុជាកំពុងតែមានស្ថានភាពឆ្លងរាតដាលកាន់តែខ្លាំង។
តួលេខពីក្រសួងសុខាភិបាលបង្ហាញថា គិតត្រឹមថ្ងៃទី១០ ខែមីនា ចំនួនអ្នកទៅចាក់វ៉ាក់សាំងបានកើនឡើងដល់ទៅជា១២ម៉ឺន៥ពាន់នាក់។ ហើយក្នុងនោះ ចំនួនដែលអ្នកបានចាក់វ៉ាក់សាំងរួចរាល់មានជិត១១ម៉ឺននាក់៕
