សេវាកម្មដឹកជញ្ជូនដល់ដៃអតិថិជនមិនមែនជារឿងថ្មីនោះទេក្នុងទីផ្សារអាជីវកម្មប្រកួតប្រជែងដូចពេលបច្ចុប្បន្ន ប៉ុន្តែវាអាចជារឿងថ្មីសម្រាប់ហាង 7-Eleven នៅក្នុងប្រទេសជប៉ុន ព្រោះមិនមែនគ្រប់សាខាទាំងអស់របស់ហាងមួយនេះ សុទ្ធតែមានសេវាកម្មដឹកជញ្ជូននោះទេ។ ជាមួយនឹងសេវាកម្មថ្មីនេះ ក្រុមហ៊ុនរំពឹងថា នឹងអាចដឹកជញ្ជូនម្ហូបអាហារ និងផលិតផលប្រើប្រាស់ផ្សេងៗ ទៅដល់ដៃអតិថិជន យ៉ាងយូរត្រឹមពេល ៣០នាទី ជាមួយនឹងសាខា 7-Eleven ជាង ២ម៉ឺនកន្លែងក្នុងប្រទេសជប៉ុន។
ទោះមិនបានគូសបញ្ជាក់ចំៗក៏ពិតមែន តែនេះសបញ្ជាក់ឲ្យឃើញពីមហិច្ឆតារបស់ ក្រុមហ៊ុនលក់រាយដ៏ធំមួយនេះ ក្នុងការប្រកួតប្រជែងនឹងក្រុមហ៊ុនធំៗ ដែលផ្តល់សេវាដឹកជញ្ជូនទៅដល់ផ្ទះអតិថិជន ដូចជាក្រុមហ៊ុន Amazon ជាដើម។
គម្រោងបន្ថែមប្រតិបត្តិការថ្មីរបស់ 7-Eleven នេះធ្វើឡើងចំពេលដែលទីផ្សារហាងលក់ទំនិញ របស់ជប៉ុនកំពុងដាំក្បាលចុះ។ ការលក់នៅក្នុងវិស័យនេះបានធ្លាក់ចុះជាង៦% ស្មើនឹងប្រមាណ ១១០ពាន់លានដុល្លារអាមេរិកកាលពីឆ្នាំ២០២០ ដែលនេះជាការធ្លាក់ចុះខ្លាំងបំផុតដំបូងគេក្នុងប្រវត្តិសាស្ត្រចាប់តាំងពីឆ្នាំ ១៩៨១មក។ នេះបើយោងតាមការស្ទង់មតិរបស់សារព័ត៌មាន Nikkei។
អត្ថបទគួរអាន
យ៉ាងណាមិញ ទីផ្សារនៃវិស័យពាណិជ្ជកម្មឌីជីថល (e-commerce) របស់ជប៉ុនបានកើនឡើងប្រមាណ ២២%ក្នុងទឹកប្រាក់ជាង១១២ពាន់លានដុល្លារអាមេរិក ដោយសារតែតម្រូវការបញ្ជាទិញរបស់ពលរដ្ឋបានកើនឡើងអំឡុងពេលពួកគេធ្វើការពីផ្ទះ ក្នុងបរិបទនៃជំងឺកូវីដ១៩។
សូមជម្រាបថា 7-Eleven ក្នុងប្រទេសជប៉ុនរំពឹងកំណើនប្រាក់ចំណូលបន្ថែមទៀត ពីការលក់ដោយភ្ជាប់មកជាមួយសេវាកម្មដឹកជញ្ជូននេះ ក្រោយមើលឃើញពីភាពវិជ្ជមាននៅហាងសាខាក្នុងសហរដ្ឋអាមេរិក ជាមូលដ្ឋានដែលហាង 7-Eleven កកើតឡើងដំបូង។ ជាក់ស្តែងនៅអាមេរិក ការចំណាយរបស់អតិថិជនតាមរយៈការកម្មង់ទិញពីចម្ងាយ និងដឹកជញ្ជូន មានចំនួនច្រើនជាងការចូលទិញនៅក្នុងហាងដល់ទៅជិត២ដង៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
