អេស៊ីលីដា សហការជាមួយស្ថាប័នរដ្ឋ និងឯកជនចំនួន៣ រៀបចំព្រឹត្តិការណ៍ “បន្លឺសំឡេងកណ្តឹង ដើម្បីសមភាពយេនឌ័រ”

ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា បាន​លើកឡើងថា ការបន្លឺសំឡេងកណ្ដឹងនាពេលនេះ គឺជាការដាស់តឿនបន្ថែមទៀត ឲ្យភាគីពាក់ព័ន្ធ ពិសេសនៅក្នុងវិស័យមូលបត្រ​ត្រូវតែរួមគ្នាថែមទៀត ដើម្បីធ្វើឲ្យសមភាពយេនឌ័រនៅកម្ពុជា​កាន់តែ​មានភាពល្អប្រសើរឡើង ខណៈកន្លងមក​រាជរដ្ឋាភិបាល​ក៏មានគោលនយោបាយ ជំរុញគាំទ្រ​ជាច្រើន ក្នុងការលើកម្ពស់សមភាពយេនឌ័រទាំងនៅក្នុងស្ថាប័នរដ្ឋ និងឯកជន។

ឯកឧត្តម ហុង សុហួរ ប្រតិភូរាជរដ្ឋាភិបាលទទួលបន្ទុក ជាអគ្គនាយកផ្សារមូលបត្រកម្ពុជា បានគូសបញ្ជាក់បន្ថែមថា កន្លងមក តាមរយៈបទបញ្ញត្តិដែលមានស្រាប់ ​ផ្សារមូលបត្រ​កម្ពុជា​​បាននិងកំពុងធ្វើកិច្ចការងារជាច្រើនរួចមកហើយក្នុងការលើកកម្ពស់សមភាពយេនឌ័រនេះ តួយ៉ាងនៅក្នុងការបោះផ្សាយសញ្ញាបណ្ណសង្គមមួយចំនួន ក៏មានការលើកទឹកចិត្ត​ដល់អ្នកវិនិយោគ​ជាស្ត្រីផងដែរ។

ជាមួយគ្នានេះ លោកស្រី ម៉ារ អមរ៉ា តំណាងប្រធាននាយកប្រតិបត្តិធនាគារ អេស៊ីលីដា បានគូសលើកឡើងដែរថា ក្នុងនាមជាធនាគារពាណិជ្ជដ៏ធំដំបូងគេ ដែលបាន​បោះផ្សាយមូលបត្រ នៅក្នុងផ្សារមូលបត្រ​កម្ពុជា អេស៊ីលីដា ​តែងតែសហការ និងគាំទ្រយ៉ាងពេញទំហឹង​រាល់ដំណើរការ​អភិវឌ្ឍវិស័យមូលបត្រ រួមទាំងសមភាពយេនឌ័រនៅក្នុងវិស័យនេះផងដែរ។ លោកស្រី បន្ថែមថា អេស៊ីលីដា គឺជាស្ថាប័នមួយ ដែលមានសមភាពយេឌ័រល្អ ដ្បិតនៅធនាគារខ្មែរមួយនេះ មិនត្រឹមតែ​មានបុគ្គលិកជាស្ត្រីច្រើនលើសលុបប៉ុណ្ណោះទេ ប៉ុន្ដែ ក្នុងតួនាទីថ្នាក់ដឹកនាំកំពូល, ស្ត្រី ក៏មានចំនួន​ប្រហាក់​ប្រហែលនឹងបុរសដែរ។ លោកស្រីបន្ថែមថា អេស៊ីលីដា មានគោលនយោបាយដ៏ល្អ ដើម្បីបង្កលក្ខណៈងាយស្រួលសម្រាប់ស្ត្រី នៅក្នុងការ​ទទួលបានឱកាសអភិវឌ្ឍសមត្ថភាពរបស់ខ្លួន។

យោងតាមប្រសាសន៍របស់ឯកឧត្តម ស៊ូ សុជាតិ ដែលគូសរំលេចអំពីរបាយការណ៍របស់ស្ថាប័ន​ប្រឹក្សាការគ្រប់គ្រងសកល McKinsey បានឲ្យដឹងថា នៅក្នុងក្រុមហ៊ុន​ខាងផ្នែកប្រតិបត្តិការ ដែលមាន​ចម្រុះភាពផ្នែកយេនឌ័រ​ ក្រុមហ៊ុននោះ​មានប្រតិបត្តិការល្អប្រសើរ អាចរកប្រាក់ចំណេញ​បានលើសពីដៃគូរបស់ពួកគេដល់ទៅ​២៥%។ រីឯវេទិកាសេដ្ឋកិច្ចពិភពលោក​វិញ ក៏បាន​ចង្អុលបង្ហាញដែរថា ការមិនមានគម្លាតយេនឌ័រ ក៏អាចជួយជំរុញបន្ថែមដល់សម្ទុះផលចំណេញចូលទៅ​ក្នុង​ផលិតផលក្នុងស្រុកសរុប​របស់ប្រទេសជាតិផងដែរ៕