លោកស្រី ម៉ារ អមរា អនុប្រធាននាយកប្រតិបត្តិធនាគារ អេស៊ីលីដា បានបញ្ជាក់ថានៅឆ្នាំនេះ ធនាគារអេស៊ីលីដា មានគម្រោងពង្រីកទំហំឥណទានប្រមាណ៦០០លានដុល្លារបន្ថែមទៀត លើសឆ្នាំ២០២០។ ក្នុងនោះ សម្រាប់វិស័យកសិកម្ម គ្រោងនឹងពង្រីកបន្ថែម១២០លានដុល្លារអាមេរិក ខណៈកាលពីឆ្នាំ២០២០ ឥណទានក្នុងវិស័យនេះមានតែ ៨៨៨ លានដុល្លារអាមេរិកប៉ុណ្ណោះ។ ដូច្នេះវានាំឲ្យសមតុល្យឥណទាន របស់អេស៊ីលីដានៅក្នុងវិស័យកសិកម្មគិតត្រឹមដំណាច់ឆ្នាំ២០២១ នឹងកើនដល់ ១ពាន់លានដុល្លារអាមេរិក
បើតាមលោកស្រី ម៉ា កាលពីឆ្នាំ២០២០ សមតុល្យឥណទានសរុបរបស់ធនាគារអេស៊ីលីដា មានជាង ៤ពាន់លានដុល្លារអាមេរិក។
អត្ថបទទាក់ទង
ស្របគ្នាជាមួយនឹងការពង្រីកទំហំឥណទានបន្ថែមនេះលោកស្រី អមរ៉ា បង្ហាញក្តីរំពឹងថា ឆ្នាំ២០២១ នេះដែរ ធនាគារអេស៊ីលីដា រំពឹងថា ប្រាក់ចំណេញសុទ្ធនឹងកើនឡើងប្រហែល១០ភាគរយទៀត ខណៈដែលកាលពីឆ្នាំ២០២០ ប្រាក់ចំណេញសុទ្ធរបស់ធនាគារនេះ មានជាង១៤១លានដុល្លារ។
ដើម្បីសម្រេចបាននូវគោលដៅនេះ លោកស្រី ម៉ារ អមរា បានបង្ហាញថា ផែនការស្នូលសំខាន់ៗ របស់អេស៊ីលីដា ដើម្បីបង្កើនប្រាក់ចំណេញប្រកបដោយចីរភាពនោះគឺ ការបង្កើនការផ្តល់ឥណទានប្រកបដោយគុណភាព បង្កើនការកៀរគរប្រាក់បញ្ញើ អភិវិឌ្ឍផលិតផលបច្ចេកវិទ្យាហិរញ្ញវត្ថុ និងបន្តការគ្រប់គ្រងចំណាយប្រតិបត្ថិការឲ្យកាន់តែមានប្រសិទ្ធភាព។
លើសពីនេះ នៅឆ្នាំ២០២១នេះផងដែរ ធនាគារ អេស៊ីលីដា ភីអិលស៊ី នឹងចូលរួមជាមួយរាជរដ្ឋាភិបាលក្នុងការបន្តការជួយគាំទ្រដល់វិស័យ SME ឱ្យកាន់តែមានការរីកចម្រើនបន្តទៀត៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
