ឆ្លើយតបជាមួយនឹងសំណួររបស់ខេមបូណូមីស តាមរយៈប្រព័ន្ធតេឡេក្រាម លោកស្រី ម៉ារ អមរា អនុប្រធាននាយកប្រតិបត្តិធនាគារអេស៊ីលីដា បានបញ្ជាក់ថា ដំណើរការអាជីវកម្មរបស់ធនាគារ អេស៊ីលីដា នៅឆ្នាំ២០២០ ស្ថិតក្រោមស្ថានភាពលំបាកនៃការរាតត្បាតជាសកលនៃជំងឺកូវីដ-១៩ ប៉ុន្ដែ ធនាគារនេះ នៅតែមានប្រតិបត្តិការរឹងមាំល្អ ជាមួយនឹងប្រាក់ចំណេញខ្ពស់ គឺដោយសារតែកត្តាពីរយ៉ាងខាងក្រោមនេះ ៖
ទី១, កំណើនសំពៀតឥណទាន ដោយសារតម្រូវការខ្ពស់នៅលើទីផ្សារលើផលិតផលឥណទានរបស់ធនាគារ ជាពិសេសវិស័យ SME។
ទី២, កំណើនប្រាក់បញ្ញើ-សន្សំ របស់ធនាគារ រួមជាមួយផលិតផល និងសេវាកម្មផ្សេងទៀត។
អត្ថបទទាក់ទង!
លោកស្រី ម៉ារ អមរា បានគូសបញ្ជាក់ទៀតថា «កត្តាទាំងពីរនេះត្រូវបានផ្សាភ្ជាប់ជាមួយនឹងការអភិវឌ្ឍឥតឈប់ឈរនៃប្រព័ន្ធឌីជីថលរបស់ធនាគារ ដែលផ្តល់ជូនអតិថិជននូវផលិតផល និងសេវាកម្មហិរញ្ញវត្ថុប្រកបដោយភាពច្នៃប្រឌិត និងទាន់សម័យ។ ការបង្កើនភាពងាយស្រួលដល់អតិថិជន និងពង្រឹងប្រព័ន្ធសុវត្ថិភាពអ៊ិនធើណែត គឺជាចំណុចដែលធនាគារ អេស៊ីលីដា ផ្ដោតការយកចិត្តទុកដាក់បំផុត»។
បើតាមអនុប្រធាននាយកប្រតិបត្តិអេស៊ីលីដារូបនេះ ដើម្បីសម្រេចនូវវឌ្ឍនភាពគោលដៅដ៏រឹងមាំទាំងនេះ ធនាគារនឹងបន្តលើកកម្ពស់ហេដ្ឋារចនាសម្ព័ន្ធបច្ចេកវិទ្យាព័ត៌មាន តាមរយៈការវិនិយោគលើបច្ចេកវិទ្យាទំនើបចុងក្រោយ ពង្រឹងសមត្ថភាពធនធានមនុស្ស ព្រមទាំងពង្រីក និងកែលម្អដំណើរការអាជីវកម្ម។ លោកស្រី ម៉ារ អមរា បន្ថែមទៀតថា «ជាយុទ្ធសាស្ត្រ ធនាគារកំពុងអភិវឌ្ឍប្រព័ន្ធទូទាត់ដែលអាចឱ្យដៃគូទាំងក្នុង និងក្រៅប្រទេសអាចភ្ជាប់ប្រព័ន្ធនេះដើម្បីបម្រើអតិថិជនទៅវិញទៅមក និងឆ្លងព្រំដែន។ ប្រព័ន្ធនេះ មិនត្រឹមតែផ្ដល់អត្ថប្រយោជន៍ដោយផ្ទាល់ដល់អតិថិជនដ៏ឆ្លាតវៃរបស់យើងប៉ុណ្ណោះទេ ប៉ុន្តែថែមទាំងដៃគូអាជីវកម្មរបស់យើងផងដែរ។ យើងខ្ញុំទទួលស្គាល់ថាអតិថិជន និងដៃគូអាជីវកម្មទាំងអស់គឺជាបណ្ដាញតភ្ជាប់ដ៏មានសារសំខាន់សម្រាប់ពង្រីកសេវាកម្មរបស់ធនាគារ និងរីកចម្រើនជាមួយគ្នា»។
លោកស្រី ម៉ារ អមរា អនុប្រធាននាយកប្រតិបត្តិធនាគារអេស៊ីលីដា
(រូបភាព៖ ធនាគារអេស៊ីលីដា)
អេស៊ីលីដាម៉ូបាល បានកែលម្អយ៉ាងទូលំទូលាយ និងផ្លាស់ប្តូររូបរាងថ្មី កាន់តែទំនើប ងាយស្រួល និងមានសុវត្ថិភាពខ្ពស់ ជាមួយនឹងមុខងារពិសេសៗជាច្រើន ។ ឥឡូវនេះ អតិថិជនទាំងអស់អាចប្រតិបត្តិការប្រាក់បញ្ញើ-សន្សំ (សំចៃ ចរន្ត និងមានកាលកំណត់) តាមរយៈ អេស៊ីលីដាម៉ូបាល បានភ្លាមៗ ថែមទាំងទទួលបានការប្រាក់ខ្ពស់ទៀតផង។ លោកអ្នកក៏អាចដាក់ប្រាក់បញ្ញើមានកាលកំណត់ដោយខ្លួនឯងបានយ៉ាងងាយស្រួល ជាមួយម៉ាស៊ីនដាក់ប្រាក់បញ្ញើមានកាលកំណត់ផងដែរ។
ធនាគារក៏បាន និងកំពុងបន្តវិនិយោគក្នុងការពង្រីកទីតាំងស្វ័យសេវាធនាគារ ដោយធ្វើការដំឡើងបន្ថែមនូវម៉ាស៊ីនអេធីអឹម ម៉ាស៊ីនដក-ដាក់ប្រាក់ ម៉ាស៊ីនឆូតកាត និងការពង្រីកបណ្ដាញទូទាត់តាម QR របស់ខ្លួន។
ធនាគារបានពង្រីកបណ្តាញស្វ័យប្រតិបត្តិការ អភិវឌ្ឍសេវាធនាគារឌីជីថលឲ្យកាន់តែងាយស្រួល រហ័សទាន់ចិត្ត និងមានសុវត្ថិភាពខ្ពស់។ មិនតែប៉ុណ្ណោះ ធនាគារតែងតែខិតខំធ្វើឲ្យប្រតិបត្តិការរបស់ខ្លួនកាន់តែប្រសើរឡើង ដោយបន្តធ្វើទំនើបកម្ម និងនវានុវត្តន៍ផលិតផល-សេវាកម្ម និងពង្រឹងគុណភាពការបម្រើសេវាកម្មនៅក្នុងវិស័យធនាគារ និងហិរញ្ញវត្ថុ។ បង្កើតឲ្យមានកម្មវិធីសំណើសុំឥណទានដែលមានភាពសាមញ្ញ និងងាយស្រួលប្រើប្រាស់ដោយមធ្យោបាយឌីជីថល តាមរយៈកម្មវិធី “អេស៊ីលីដាម៉ូបាល” ហើយវាក៏អាចប្រើជាមួយគណនីប្រាក់បញ្ញើ-សន្សំ (សំចៃ ចរន្ត និងមានកាលកំណត់) ផងដែរ រួមជាមួយអត្រាការប្រាក់ដែលមានភាពបត់បែន។
ម្យ៉ាងវិញទៀតធនាគារ អេស៊ីលីដា ភីអិលស៊ី បានបញ្ចុះអត្រាការប្រាក់ពី ០,៤% រហូតដល់ ១% ក្នុង ១ឆ្នាំ បន្ថែមទៀតលើការស្នើសុំឥណទានថ្មីគ្រប់ប្រភេទ ដើម្បីចូលរួមគាំទ្រការរីកលូតលាស់អាជីវកម្មរបស់អតិថិជន និងដោយកាន់តែមានភាពងាយស្រួល អតិថិជនទាំងអស់អាចដាក់សំណើសុំឥណទានតាមរយៈ អេស៊ីលីដាម៉ូបាល។ ជាលទ្ធផល សមតុល្យឥណទានដុលសរុបនៅត្រីមាសទី៤ ឆ្នាំ២០២០ មានការកើនឡើងចំនួនជាង ៣៦២ លានដុល្លារអាមេរិក ធៀបនឹងត្រីមាសទី៣ ឆ្នាំ២០២០៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
