លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា បានលើកឡើងថា កិច្ចសហប្រតិបត្តិការរវាងក្រុមហ៊ុនទាំងពីរ គឺធនាគារអេស៊ីលីដា និងធនាគារឯកទេសវីងនេះ នឹងសម្រួលដល់អតិថិជនរបស់ក្រុមហ៊ុនទាំងពីរ ក្នុងការទទួលបានសេវាផ្ទេរប្រាក់ទៅមកតាមរយៈធនាគារទាំងពីរ ក៏ដូចជាការទូទាត់កាន់តែប្រសើរជាងឡើង។
លោក បណ្ឌិត អ៊ិន ចាន់នី មានប្រសាសន៍ថា «ដូចយើងដឹងហើយថា ធនាគារអេស៊ីលីដា បើគិតជាការិយាល័យ និងសាខា គឺមានធំមែន ប៉ុន្ដែ មានតែចំនួន ២៦២ ទេ ប៉ុន្ដែ យើងមានម៉ាស៊ីនឆូតកាត ៤ពាន់ជាង មានដៃគូរបស់យើងប្រមាណជា ៣ម៉ឺន ប៉ុន្ដែបូកវីងថែមទៀត វីងធ្វើឲ្យបណ្ដាញទូទាត់ [ជាដៃគូរបស់ធនាគារអេស៊ីលីដាទាំងអស់] មានទំហំធំណាស់...មានរហូតដល់ជិត៤ម៉ឺនឯណោះ»។
អត្ថបទទាក់ទង!
ប្រធាននាយកប្រតិបត្តិធនាគារអេស៊ីលីដារូបនេះ បានបន្ថែមទៀតថា កិច្ចសហការគ្នារវាងធនាគារទាំងពីរនេះ គឺមិនមែនជាការបន្ថែមនូវការយកថ្លៃសេវាពីអតិថិជននោះទេ ប៉ុន្ដែវាគឺជាការជួយផ្ដល់ជម្រើសកាន់តែច្រើនសម្រាប់អ្នកប្រើប្រាស់ដែលចង់ផ្ទេរប្រាក់ ឬធ្វើការទូទាត់ប្រាក់ ដោយពួកគាត់អាចផ្ទេរប្រាក់ពីភ្នាក់ងារវីង ទៅកាន់ធនាគារអេស៊ីលីដា ឬផ្ទេរប្រាក់ពីគណនីធនាគារអេស៊ីលីដា ទៅកាន់គណនីវីងក៏បាន ឬបង់ការប្រាក់ធនាគារអេស៊ីលីដា តាមរយៈភ្នាក់ងារវីងជាដើម។
ធនាគារអេស៊ីលីដា និងវីង ចាប់ដៃគ្នាពង្រីកវិសាលភាពសេវាផ្ទេរប្រាក់នៅកម្ពុជា
(រូបភាព៖ ហេង ភារម្យ)
លោក ម៉ានូ រ៉ាចាន់ អគ្គនាយកធនាគារឯកទេសវីង បានលើកឡើងដែរថា បើមើលពីចក្ខុវិស័យ និងបេសកម្មរវាងធនាគារអេស៊ីលីដា និងធនាគារឯកទេសវីង គឺមានភាពដូចគ្នាច្រើន ពោលគឺមានទិសដៅធ្វើយ៉ាងណាឲ្យជីវភាពរស់របស់ប្រជាជនមានភាពប្រសើរឡើង ពិសេសតាមរយៈការផ្ដល់សេវាហិរញ្ញវត្ថុងាយស្រួល។ ការមានទិសដៅ ក៏ដូចជាចក្ខុវិស័យដូចគ្នានេះហើយ ទើបជំរុញឲ្យធនាគារទាំងពីរនេះ ឈានដល់ការចុះកិច្ចសហការលើសេវាផ្ទេរប្រាក់រួមគ្នា។
សូមជម្រាបដែរថា បើតាមការគូសបញ្ជាក់របស់លោកបណ្ឌិត អ៊ិន ចាន់នី ការសហការរវាងធនាគារអេស៊ីលីដា និងវីងនេះ ក៏ជាការជួយជំរុញឲ្យប្រជាពលរដ្ឋដែលមិនមានប្រើប្រាស់សេវាធនាគារ អាចនឹងមានការយល់ដឹងជាងមុន ពីសេវាធនាគារ ពិសេសគឺសេវាសន្សំតែម្ដង៕
ធនាគារអេស៊ីលីដា និងវីង ចាប់ដៃគ្នាពង្រីកវិសាលភាពសេវាផ្ទេរប្រាក់នៅកម្ពុជា
(រូបភាព៖ ហេង ភារម្យ)
None
