ក្រសួងហិរញ្ញវត្ថុថៃ បានរាយការណ៍ទៅគណៈរដ្ឋមន្រ្តីថៃអំពីតម្រូវការខ្ចីប្រាក់ ដើម្បីទូទាត់ទៅនឹងឱនភាពថវិកាជាតិនៅក្នុងឆ្នាំ ២០២១ ដូច្នេះហើយ រដ្ឋពិតជាត្រូវការកញ្ចប់ថវិកា ដើម្បីជួយស្តារសេដ្ឋកិច្ចជាតិឡើងវិញ។
កញ្ចប់ថវិកាចំណាយប្រចាំឆ្នាំ ២០២០ ត្រូវបានកំណត់ដល់ទៅជាង ១០៣ពាន់លានដុល្លារអាមេរិក ដោយមានគោលដៅប្រាក់ចំណូល ៨៨ពាន់លានដុល្លារអាមេរិក ដូច្នេះហើយ នៅមានឱនភាពថវិកាជាង ១៣ពាន់លានដុល្លារអាមេរិកទៀត។
លើសពីនេះ គណៈរដ្ឋមន្រ្តីថៃ បានអនុម័តរួចជាស្រេច កាលពីខែមិថុនា ទៅលើ កញ្ចប់ថវិកាជាតិ សម្រាប់ការចំណាយក្នុងឆ្នាំ ២០២១ ដែលមានជាង ១០៦ពាន់លានដុល្លារអាមេរិក និងកំណត់គោលដៅប្រាក់ចំណូល ៨៦ពាន់លានដុល្លារអាមេរិក ដែលធ្វើឲ្យឱនភាពថវិកា ស្ថិតនៅរង្វង់ ២០ពាន់លានដុល្លារអាមេរិក។
អត្ថបទទាក់ទង!
ក្រសួងហិរញ្ញវត្ថុថៃ ក៏គ្រោងនឹងចុះហត្ថលេខាលើ គម្រោងកម្ចីនេះ ដោយកំណត់យកអត្រាការប្រាក់អណ្តែត យោងទៅលើ អត្រារបស់ អន្តរធនាគារនៅទីក្រុងឡុងដ៍ បូក ០,៥% ក្នុងមួយឆ្នាំ។
ដោយឡែក ការសងត្រលប់ទៅវិញ ត្រូវបានបែងចែកជា ២ដំណាក់កាល ដោយដំណាក់កាលទី ១ សង ៥០០លានដុល្លារអាមេរិក ក្នុងរយៈពេល ១០ឆ្នាំ និងដំណាក់កាលទី ២ សងត្រលប់ ១ពាន់លានដុល្លារអាមេរិក ក្នុងរយៈពេល ៥ឆ្នាំ ដោយដំណាក់កាលនីមួយៗ ភ្ជាប់ជាមួយរយៈពេលអនុគ្រោះ ៣ឆ្នាំ។
ទោះយ៉ាងណាក៏ដោយ រាជរដ្ឋាភិបាលថៃ មានលក្ខខណ្ឌ ត្រូវតែបែងចែក និងប្រើប្រាស់ប្រាក់កម្ចីនេះ មុនដំណាច់ខែ មិថុនា ឆ្នាំ ២០២១ខាងមុខ។
ធនាគារអភិវឌ្ឍន៍អាស៊ី បានគូសបញ្ជាក់ថា កញ្ចប់កម្ចីបន្ទាន់នេះ នឹងអាចជួយគាំទ្រដល់ កញ្ចប់ថវិកាសង្គ្រោះរបស់ប្រទេសថៃ ដែលមានគោលដៅ ធ្វើឲ្យប្រសើរឡើងនូវ ប្រព័ន្ធសុខាភិបាល ក៏ដូចជា ការពារសហគ្រាសធុនតូច និងមធ្យម នៅក្នុងវិស័យដែលរងគ្រោះខ្លាំងជាងគេ ដូចជា វិស័យទេសចរណ៍ និងឧស្សាហកម្មជាដើម។
គួរជម្រាបដែរថា ធនាគារអភិវឌ្ឍន៍អាស៊ី បានព្យាករណ៍ថា សេដ្ឋកិច្ចថៃ នឹងធ្លាក់ចុះ ៦,៥% នៅក្នុងឆ្នាំ ២០២០នេះ ហើយឥទ្ធិពលនេះ នឹងប៉ះពាល់ដល់ ជំនួញពាណិជ្ជកម្មក្នុងតំបន់ ការវិនិយោគ និងខ្សែបណ្តាញកម្លាំងពលកម្ម៕
None
