តើការវិនិយោគផ្សារទំនើបបរទេសធំៗនៅកម្ពុជាដូចជាអ៊ីអនជាដើមនេះ បានបង្ហាញពីសញ្ញាអ្វីខ្លះជុំវិញបរិយាកាសធុរកិច្ចនៅកម្ពុជា?
វិស័យលក់រាយនៅកម្ពុជា នាប៉ុន្មានឆ្នាំចុងក្រោយនេះ បានបង្ហាញពីសន្ទុះងើបឡើងគួរឲ្យកត់សម្គាល់់ ខណៈដែលមានហាងតូចធំជាច្រើន បានបើកដំណើរការលក់ផលិតផលយ៉ាងព្រោងព្រាត។ ក្នុងនោះ ការវិនិយោគលើផ្សារទំនើបធំ ក៏បានក្លាយជាបណ្ដុំពាណិជ្ជកម្មលក់ដុំ លក់រាយ យ៉ាងសកម្មនៅក្នុងទីផ្សារកម្ពុជាផងដែរ ស្របពេលដែល ចំនួនផ្សារទំនើបធំៗ បាននិងកំពុងពង្រីកការវិនិយោគរបស់ខ្លួនបន្ថែមជាបន្តបន្ទាប់។
កំណើនផ្សារទំនើបធំៗ កាន់តែច្រើនឡើងនេះ គឺសបញ្ជាក់ឲ្យឃើញពីអំណាចនៃការទិញរបស់ប្រជាពលរដ្ឋខ្មែរ ដ្បិតថា អ្នកចំណូលមធ្យម និងខ្ពស់កាន់តែមានការកើនឡើងជាងមុន។ មិនតែប៉ុណ្ណោះ វាក៏បង្ហាញឲ្យឃើញពី បរិយាកាសសេដ្ឋកិច្ច និងការវិនិយោគល្អនៅកម្ពុជា ក៏ដូចជាការឆ្លុះបញ្ចាំងពីភាពទំនើបស៊ីវិល័យនៃការរស់នៅរបស់ប្រជាជន ស្របទៅតាមនិន្នាការនៃសម័យភាវូបនីយកម្មផងដែរ។
ក្រៅពីការវិនិយោគបង្កើតផ្សារទំនើបក្នុងស្រុកជាច្រើន គេសង្កេតឃើញថា វិនិយោគ ជប៉ុន គឺជាអ្នកវិនិយោគផ្សារទំនើបបរទេសធំជាងគេនៅកម្ពុជា។ តួយ៉ាង បន្ទាប់ពីទទួលបានភាពជោគជ័យខ្លាំងនៅក្នុងវិស័យលក់រាយនៅក្នុងប្រទេសកម្ពុជា ជាមួយនឹងផ្សារទំនើប AEON ទី១ ដែលស្ថិតនៅជាប់ទន្លេបាសាក់ សង្កាត់ទន្លេបាសាក់ ក្រុមហ៊ុន ផ្សារទំនើប AEON ក៏ទើបតែបានបើកសម្ពោធសាកល្បងផ្សារទំនើប AEON សាខាទី២ របស់ខ្លួនកាលពីព្រឹកមិញនេះ ដែលមានទីតាំងស្ថិតនៅតំបន់ដែលកំពុងមានសក្ដានុពលខ្លាំងបំផុត គឺតំបន់ សែនសុខ។
ផ្សារទំនើបអ៊ីអន ទី២ សែនសុខ នេះ ត្រូវបានដឹងថា វិនិយោគក្នុងទំហំទឹកប្រាក់ ១២០លានដុល្លារអាមេរិក ហើយក៏ផ្សារទំនើបដែលមានទំហំធំជាងគេមួយនៅកម្ពុជាផងដែរ។
អត្ថបទទាក់ទង!
ក្រុមអ្នកជំនាញផ្នែកអចលនទ្រព្យ យល់ឃើញថា ការវិនិយោគផ្សារទំនើបធំៗនេះ ក៏ជាមេដែកស្រូបទាញវិនិយោគិន កាន់តែច្រើន ដើម្បីវិនិយោគគម្រោងផ្សេងៗនៅតំបន់ក្បែរនោះ។ តួយ៉ាង នៅក្បែរផ្សារទំនើប AEON 2 នេះ គេសង្កេតឃើញថា ក៏មានគម្រោងលំនៅដ្ឋានលំដាប់ខ្ពស់ The Premier Land ដែលបានវិនិយោគរាប់លានដុល្លារ ក៏មានអភិវឌ្ឍនៅក្បែរនោះផងដែរ ខណៈដែលគម្រោង មជ្ឍមណ្ឌលសន្និបាត និងពិព័រណ៍សែនសុខ ដ៏ធំជាងគេនៅកម្ពុជា ក៏កំពុងសាងសង់នៅទល់មុខ នឹង ផ្សារទំនើប អ៊ីអន ២ នេះផងដែរ ហើយគម្រោងនេះ ត្រូវបានដឹងថា នឹងសាងសង់បញ្ចប់នៅចុងឆ្នាំនេះ។
បើតាមលើកឡើងពីអ្នករកស៊ីក្នុងវិស័យដីធ្លីមានបទពិសោធន៍ចាស់ទុំមួយរូប ដែលសុំមិនបញ្ចេញឈ្មោះ បានប្រាប់ខេមបូណូមីសថា ផ្សារទំនើបអ៊ីអន នេះ នឹងមិនទាន់បញ្ចប់ការពង្រីកសាខារបស់ខ្លួនត្រឹមសាខាទី២នេះនោះទេ ពោលគឺ ក្រុមហ៊ុននេះ កំពុងត្រៀមនឹងសាងសង់សាខាទី៣ និងទី៤ របស់ខ្លួនក្នុងពេលឆាប់ៗនេះដែរ ខណៈដែល សាខាទី៣ ត្រូវបានប្រភពច្បាស់ការបានឲ្យដឹងថា នឹងត្រូវសាងសង់នៅតំបន់ភាគខាងត្បូងរាជធានីភ្នំពេញ។
បើមើលទៅប្រទេសក្បែរខាងកម្ពុជាវិញ ក្រុមហ៊ុនផ្សារទំនើបអ៊ីអនរបស់ជប៉ុនមួយនេះ ក៏បានពង្រីកខ្លួនជាច្រើនសាខាហើយដែរ ពោលគឺមាន ៦សាខាហើយនៅវៀតណាម ខណៈសាខាទី៧ ក៏គ្រោងនឹងសាងសង់ឆាប់ៗនេះដែរ។
ក្រៅពីផ្សារទំនើប AEON ទាំង២សាខានេះ នៅរាជធានីភ្នំពេញ ក៏នៅមានផ្សារទំនើបដ៏ធំមួយទៀត គឺផ្សារទំនើប Parkson ដែលកំពុងសាងសង់បញ្ចប់គម្រោងរបស់ខ្លួននាពេលឆាប់ៗនេះដែរ ខណៈផ្សារទំនើបមួយនេះ បានពន្យាពេលបើកដំណើរការអស់រយៈពេលជាយូរណាស់ហើយដែរ។ ដោយឡែក ចំពោះទីផ្សារនៅប្រទេសវៀតណាមវិញ ផ្សារទំនើប Parkson នេះ ក៏បានបិទជាច្រើនសាខាហើយដែរ។
យ៉ាងណាក៏ដោយចុះ បន្ទាប់ពីផ្សារទំនើបទាំងនេះ បើកដំណើរការពេញលេញ គេជឿជាក់ថា រាជធានីភ្នំពេញ និងផ្លាស់ប្តូរនូវមុខមាត់ថ្មីរបស់ខ្លួនមួយកម្រិតទៀត ពិសេសគឺការផ្ដល់នូវបរិបថរស់នៅថ្មីរបស់ប្រជាជនក្នុងទីក្រុង។ ប៉ុន្ដែ វត្តមានរបស់ផ្សារទំនើបគ្រាក់ៗ ដែលមានទុនវិនិយោគរាប់រយលានដុល្លារទាំងនេះ ក៏កំពុងធ្វើឲ្យផ្សារទំនើបក្នុងស្រុកមួយចំនួនកំពុងមានភាពរង្គោះរង្គើទីផ្សារផងដែរ ខណៈដែលមានផ្សារទំនើបក្នុងស្រុកមួយចំនួនហាក់មានភាពស្ងប់ស្ងាត់ភ្ញៀវចេញចូល ខុសពីប៉ុន្មានមុនៗ។
តួយ៉ាង ដើម្បីឆ្លើយតបនឹងឥទ្ធិពលនៃការហូរចូល នៃផ្សារទំនើបបរទេសធំៗនេះ កាលពីពេលចុងឆ្នាំ ២០១៧កន្លងទៅ ផ្សារទំនើបសូរិយា ដែលជាផ្សារទំនើបក្នុងស្រុកវ័យចំណាស់ជាងគេនៅកម្ពុជានោះ បានធ្វើការកែប្រែសោភ័ណភាពថ្មីនៃទ្រង់ទ្រាយខាងក្នុង និងក្រៅអគាររបស់ខ្លួន ឲ្យកាន់តែប្រសើរឡើង ព្រមទាំងបានដូរឈ្មោះថ្មីទៅជា ផ្សារទំនើបសូរិយា សេនធ័រ ភ័នធ៍ ផងដែរ។
ផ្សារទំនើប អ៊ីអន 2 បើកដំណើរការសាកល្បងនៅថ្ងៃដំបូង
អ្នកឧកញ៉ាពុង ឃាវសែ ប្រធានក្រុមប្រឹក្សាភិបាលធនាគារ កាណាឌីយ៉ា និងជាប្រធានក្រុមប្រឹក្សាភិបាលនៃក្រុមហ៊ុនសបភីង សេនធ័រ សូរិយា ធ្លាប់បានលើកឡើងថា ការចូលមកដល់នៃផ្សារទំនើបបរទេសធំៗ ដែលបាននិងកំពុងពង្រីកខ្លួនជាបន្តបន្ទាប់នៅកម្ពុជា ក៏បានធ្វើឲ្យផ្សារទំនើបក្នុងស្រុកមួយចំនួន ត្រូវប្រឈមនឹងការបាត់បង់ចំណែកទីផ្សារផងដែរ។
លោកបន្តថា កន្លងមក ដោយសារតែក្រុមហ៊ុនលោកមានគំនិតអភិរក្សនិយមខ្លាំងពេក បានធ្វើឲ្យគំនិតនេះហួសសម័យ និងបានធ្វើឲ្យផ្សារទំនើបសូរិយាបានបាត់បង់អតិថិជនរបស់ខ្លួនមួយចំនួន។ ដូច្នេះហើយទើប ក្រុមហ៊ុនផ្សារទំនើបសូរិយា សម្រេចចិត្តបោះទុនវិនិយោគបន្ថែម៥លានដុល្លារ និងបានអញ្ជើញអ្នកឯកទេសខាងរចនាជាច្រើន ដើម្បីសាងសង់រចនាបថថ្មី តម្រូវតាមសេចក្ដីត្រូវការរបស់អតិថិជនបច្ចុប្បន្ន និងអនាគត។
None
