តែយ៉ាងណា អ្នកជំនាញក្នុងវិស័យដឹកជញ្ជូន បានគូសបញ្ជាក់ថា ការដឹកជញ្ជូនទំនិញតាមផ្លូវអាកាសមិនទាន់មានកំណើនគួរឲ្យកត់សម្គាល់នោះទេ ហើយការដឹកតាមវិធីនេះ ក៏គេមិនសូវប្រើច្រើននោះដែរ ដ្បិតវាមានតម្លៃថ្លៃ។ ជាមួយគ្នានេះការដឹកជញ្ជូនទំនិញតាមផ្លូវទឹកមិនទាន់មានភាពល្អប្រសើរនោះទេ។ នេះបើតាមការកត់សម្គាល់របស់អ្នកជំនាញ។
ឯកឧត្តម ស៊ីន ចាន់សិរីវុត្ថា អ្នកនាំពាក្យរដ្ឋលេខាធិការអាកាសចរណ៍ស៊ីវិលបានបញ្ជាក់ប្រាប់ខេមបូណូមីសថា នៅមួយរយៈចុងក្រោយនេះការដឹកជញ្ជូនទំនិញតាមផ្លូវអាកាសបានរើបឡើងជាបណ្តើរៗហើយ ហើយវានឹងអាចវិលមករកប្រក្រតីភាពវិញក្នុងពេលឆាប់ៗខាងមុខនេះ។ បើតាមការវាយតម្លៃរបស់អ្នកនាំពាក្យរូបនេះ ការដឹកជញ្ជូនទំនិញតាមផ្លូវអាកាសកំរើកឡើងបានប្រមាណ៧០% ហើយ បើធៀបនឹងឆ្នាំមុន។ ចំណែកការដឹកជញ្ជូនអ្នកដំណើរវិញ ត្រូវបាន ឯកឧត្តម កត់សម្គាល់ឃើញថា នៅតែមានសភាពយ៉ាប់យ៉ឹនដដែល ពោលគឺមិនទាន់មានភាពល្អប្រសើរនោះទេ។
ពាក់ព័ន្ធនឹងការដឹកជញ្ជូនទំនិញតាមផ្លូវអាកាសនេះដែរ ឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជាបានគូសបញ្ជាក់ថា បច្ចុប្បន្នការដឹកជញ្ជូនទំនិញតាមផ្លូវអាកាសមិនទាន់មានភាពល្អប្រសើរប៉ុន្មាននោះទេ បើធៀបនឹងប៉ុន្មានខែមុន។ អ្នកជំនាញរូបនេះកត់សម្គាល់ឃើញថា ការដឹកជញ្ជូនតាមរបៀបនេះនៅតែមានសភាពចង្អៀតដដែល ដ្បិតវាមិនសូវមានជើងហោះហើរ ហើយបញ្ហាតម្លៃក៏ជាកត្តាមួយដែលធ្វើឲ្យគេរារែកដឹកជញ្ជូនទំនិញតាមផ្លូវអាកាសនេះដែរ។
ជាមួយគ្នានេះ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូនទំនិញមើលឃើញថា ការដឹកជញ្ជូនទំនិញតាមផ្លូវអាកាសបច្ចុប្បន្នហាក់មានភាពមមាញឹកឡើងវិញគួរសមបើធៀបនឹងរយៈពេលកាលពីឆ្នាំមុន។ លោកកត់សម្គាល់ឃើញថា ភាពល្អប្រសើរនេះ បានកើតឡើងក្រោយការជញ្ជូនទំនិញតាមផ្លូវទឹកជួបបញ្ហារឿងតម្លៃដឹកជញ្ជូនឡើងថ្លៃ និងកង្វះទូរកុងតឺន័រ ដែលធ្វើឲ្យអ្នករកស៊ីមួយចំនួនត្រូវបង្វែការដឹកជញ្ជូនរបស់ខ្លួន។
អត្ថបទគួរអាន
ប៉ុន្តែ លោក អះអាងថា ការដឹកជញ្ជូនទំនិញតាមផ្លូវអាកាសនៅតែរងការគំរាមកំហែងពីកូវីដ-១៩ និងនៅតែមានសភាពចង្អៀតដដែល ខណៈបច្ចុប្បន្នជើងហោះហើរនៅតែមានចំនួនតិចតួចនៅឡើយ។
ដោយឡែក បើយើងក្រឡេកទៅមើលការដឹកជញ្ជូនតាមផ្លូវគោក និងផ្លូវទឹកឯណេះវិញ ឧកញ៉ា ស៊ិន ចន្ធី សង្កេតឃើញថា ការដឹកជញ្ជូនតាមផ្លូវទាំងពីរមិនទាន់មានភាពល្អប្រសើរនៅឡើយទេ ពោលគឺនៅតែរងការគំរាមកំហែងពីការរាតត្បាតនៃជំងឺកូវីដ-១៩។ ជាក់ស្តែងបើមើលទៅលើការដឹកជញ្ជូនតាមផ្លូវទឹកតម្លៃដឹកជញ្ជូននៅតែបន្តឡើងថ្លៃខ្ពស់ និងខ្វះទូកុងតឺន័រដដែល។
គួររំលឹកថា ក្រោយពិភពលោក ក៏ដូចជាកម្ពុជាទទួលរងនូវការឆ្លងរាតត្បាតនៃជំងឺកូវីដ-១៩ បានធ្វើឲ្យការដឹកជញ្ជូនទំនិញតាមផ្លូវអាកាសបានដាំក្បាលចុះយ៉ាងគំហុក ខណៈការដឹកជញ្ជូនតាមផ្លូវទឹកនិងផ្លូវគោក ក៏មានការធ្លាក់ចុះគួរឲ្យកត់សម្គាល់ផងដែរ។ យើងសង្កេតឃើញថា នៅមួយរយៈចុងក្រោយនេះតម្លៃដឹកជញ្ជូនបានឡើងថ្លៃខ្ពស់កប់ពពក ដែលធ្វើឲ្យការនាំចេញរបស់កម្ពុជា ក៏ដូចមួយចំនួនមានការធ្លាក់ចុះគួរឲ្យកត់សម្គាល់។ កង្វះទូកុងតឺន័រ និងចន្លោះសម្រាប់ដឹកទំនិញ ក៏ជាបញ្ហាចោទសម្រាប់វិស័យដឹកជញ្ជូនផងដែរ៕
None
