ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លើកឡើងថា កិច្ចប្រជុំពិសេសអាស៊ាន-អាមេរិក ដែលគ្រោងនឹងធ្វើឡើង នៅចុងខែមីនានេះ ត្រូវបានលើកទៅពេលក្រោយទៀត ដោយសារតែមេដឹកនាំអាស៊ានខ្លះ មិនអាចចូលរួមប្រជុំតាមពេលវេលាដែលបានស្នើឡើង នាពេលកន្លងមក។
ជុំវិញបញ្ហាការលើកពេលកិច្ចប្រជុំអាស៊ាន-អាមេរិកនេះដែរ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា កាលពីពេលថ្មីៗនេះ ក៏បានគូសបញ្ជាក់ដែរថា កិច្ចប្រជុំពិសេសអាស៊ាន-អាមេរិក នឹងត្រូវលើកពេលដោយសារតែប្រធានអ៊ាន មិនទាន់អាចសម្របសម្រួលពេលវេលានៃកិច្ចប្រជុំបាន។ បើតាមសម្ដេច ហ៊ុន សែន បញ្ហាប្រឈមដែលធ្វើឲ្យរាំងស្ទះដល់កិច្ចប្រជុំពិសេសអាស៊ាន-អាមេរិក គឺដោយសារតែ ក្នុងនាមប្រទេសឥណ្ឌូនេស៊ី ជាអ្នកសម្របសម្រួល នៅមិនទាន់បានសម្របសម្រួលពេលវេលានៅឡើយទេ ហើយមេដឹកនាំអាស៊ានជាច្រើនទាមទារឲ្យមានការប្រជុំនៅថ្ងៃទី២៦-២៧ ខែមីនា ខណៈសហរដ្ឋអាមេរិកឯណោះវិញ ក៏មិនអាចទទួលយកពេលវេលានៃកិច្ចប្រជុំនាថ្ងៃទី២៦-២៧ ខែមីនាបានដែរ ដោយស្នើឲ្យរៀបចំនៅថ្ងៃទី ២៨-២៩ ខែមីនាវិញ ដូច្នេះ ទើបធ្វើឲ្យកិច្ចប្រជុំនេះត្រូវលើកពេលទៅពេលក្រោយវិញ។
អត្ថបទទាក់ទង
យ៉ាងណាក៏ដោយ ក្រសួងការបរទេស និងសហប្រតិបត្តិការអន្តរជាតិនៃកម្ពុជា មិនបានបញ្ជាក់នោះទេអំពីកាលបរិច្ឆេទជាថ្មីនៃកិច្ចប្រជុំរវាងអាស៊ាន និងអាមេរិក នេះ ក៏ប៉ុន្តែ កន្លងមក សហរដ្ឋអាមេរិកបានប្រកាសថា កិច្ចប្រជុំពិសេសអាស៊ាន-អាមេរិក គ្រោងនឹងធ្វើឡើងនៅថ្ងៃទី២៨-២៩ ខែមីនា ខាងមុខនេះ។
សូមបញ្ជាក់ថា កិច្ចប្រជុំអាស៊ាននេះ គ្រោងធ្វើឡើងនៅទីក្រុងវ៉ាស៊ិនតោន សហរដ្ឋអាមេរិក ហើយកន្លងទៅនេះ មន្ត្រីជាន់ខ្ពស់អាមេរិកអះអាងថា មេដឹកនាំប្រទេសអាស៊ានតែចំនួន៩ប៉ុណ្ណោះ ដែលនឹងត្រូវចូលរួមក្នុង ខណៈដែលមេដឹកនាំប្រទេសមីយ៉ាន់ម៉ា មិនត្រូវបានអញ្ជើញឲ្យចូលរួមនោះទេ ប៉ុន្ដែ អនុញ្ញាតឲ្យអ្នកដែលមិនមែនជាអ្នកនយោបាយចូលរួមជំនួសវិញ៕
None
