សម្រាប់អ្នកឧកញ៉ា លី ហួរ បើគ្មានការប្រកួតប្រជែង ក៏មិនមានការខាត ឬចំណេញតិច ឬចំណេញច្រើននោះដែរ។ តែយ៉ាងណា អ្នកជំនាញរូបនេះស្នើឱ្យអ្នករកស៊ីត្រូវចេះគ្រប់គ្រង និងរៀបចំរបាយការណ៍ហិរញ្ញវត្ថុឱ្យបានត្រឹមត្រូវ និងហ្មតចត់ បើមិនចង់ឱ្យអាជីវកម្មរបស់ខ្លួនជួបបញ្ហា។
ក្នុងបទសម្ភាសផ្តាច់មុខជាមួយសារព័ត៌មានខេមបូណូមីស ពាក់ព័ន្ធនឹងការគ្រប់គ្រងហិរញ្ញវត្ថុ អ្នកឧកញ៉ា លី ហួរ ប្រធានក្រុមប្រឹក្សាភិបាលក្រុមហ៊ុន លី ហួរ គ្រុប និងជាអ្នកជំនួញជើងចាស់១រូបនៅកម្ពុជា បានចែករំលែកបទពិសោធន៍ជាច្រើនពាក់ព័ន្ធនឹងការធ្វើពាណិជ្ជកម្ម និងការគ្រប់គ្រងហិរញ្ញវត្ថុប្រកួតដោយគុណភាព និងត្រឹមត្រូវ។ ជាបទពិសោធន៍នៃការធ្វើជំនួញ អ្នកឧកញ៉ា លី ហួរ អះអាងថា រាល់ការធ្វើអាជីវកម្ម ឬប្រកបមុខរបរអ្វីមួយមិនថាធំ ឬតូចនោះទេ គឺសុទ្ធតែមានការប្រកួតប្រជែង គ្រាន់តែការប្រកួតប្រជែងវាមានទៅតាមកម្រិតនៃវិស័យនីមួយៗ ពោលគឺមុខរបរខ្លះមានការប្រកួតប្រជែងខ្លាំង និងខ្លះមានការប្រកួតប្រជែងតិច។ អ្នកឧកញ៉ាសង្កេតឃើញថា អ្នកជំនួញ ឬម្ចាស់អាជីវកម្មមួយចំនួនតែងតែងមានការរអ៊ូរទាំពាក់ព័ន្ធនឹងការប្រកួតប្រជែងនេះ។ បើតាមការអះអាងរបស់អ្នកជំនួញចាស់វស្សារូបនេះ បើគ្មានការប្រកួតប្រជែង ក៏គ្មានការខាត ឬចំណែញនោះដែរ។
អត្ថបទគួរអាន
សម្រាប់អ្នកឧកញ៉ា លី ហួរ ការចេះគ្រប់គ្រង និងបែងចែកហិរញ្ញវត្ថុឱ្យបានត្រឹមត្រូវ គឺជាកត្តាចាំបាច់ដែលម្ចាស់អាជីវកម្ម និងចង់ធ្វើអាជីវកម្មដោយខ្លួនឯងត្រូវចេះ ព្រោះវាជាសរសៃឈាមក្នុងការជួយទ្រទ្រង់ប្រតិបត្តិការ និងរក្សានិរន្តភាពរបស់អាជីវកម្ម។ អ្នកជំនួញរូបនេះបានលើកឡើងថា ការប្រកាសពីការរកប្រាក់ចំណូលប្រានច្រើនរបស់ក្រុមហ៊ុនមួយមិនប្រាកដថា ក្រុមហ៊ុននោះទទួលបានប្រាក់ចំណេញច្រើននោះទេ ពោលគឺប្រាក់ចំណេញរបស់ក្រុមហ៊ុនមួយអាចកំណត់ទៅបាន លុះត្រាកាត់ការចំណាយប្រតិបត្តិការ និងការចំណាយផ្សេងៗរួច។
ជាមួយគ្នានេះ អ្នកឧកញ៉ា លី ហួរ ក៏បានចែកបទពិសោធន៍មួយចំនួនដល់យុវជនផងដែរ ក្នុងនោះអ្នកឧកញ៉ាបានលើកឡើងថា បើយុវជនចង់ក្លាយជាអ្នកដឹកនាំអាជីវកម្ម ឬចង់ក្លាយជាម្ចាស់អាជីវកម្ម កុំគិត ឬប្រៀបធៀបជាមួយអ្នកដទៃ គឺត្រូវលើអ្វីដែលខ្លួនមាន។ ក្នុងន័យនេះអ្នកឧកញ៉ា លី ហួរ ចង់សំដៅដល់ការចេះគ្រប់គ្រងចំណូល និងការចំណាយ ពោលគឺយុវជនត្រូវចំណាយឱ្យសមស្របជាមួយចំណូលដែលខ្លួនរកបាន ដោយជៀសវាងប្រៀបធៀបជាអ្នកដទៃ ដែលគេរកចំណូលបានច្រើនជាងខ្លួន។ ទន្ទឹមនេះ អ្នកជំនួញចាស់វស្សារូបនេះលើកទឹកចិត្តឱ្យយុវជនត្រូវចេះគ្រប់គ្រង់ និងបែងចែកហិរញ្ញវត្ថុឱ្យបានច្បាស់លាស់ជាមុនសិន មុនឈានចូលប្រឡូកក្នុងវិស័យជំនួញ៕
None
