អតីត​មន្រ្តី​ការពារ​ជាតិ​អាមេរិក៖ បើ​សិន​ជា​មាន​វត្តមាន​មូលដ្ឋាន​យោធា​បរទេស​មែន វា​ជា​អស្ថិរភាព​សម្រាប់​កម្ពុជា​និង​តំបន់

លោកស្រី Lindsey Ford ជា​នាយិកា​​កិច្ចការ​នយោបាយ សន្តិសុខ និង​ជា​នាយិកា​រង​នៃ​វិទ្យាស្ថាន​គោល​នយោបាយ​សង្គម​អាស៊ី (ASPI) ប្រចាំ​រដ្ឋធានី​វ៉ាស៊ីងតោន។ កាល​ពី​ជំនាន់​ប្រធានាធិបតី បារ៉ាក់ អូបាម៉ា លោកស្រី Lindsey Ford គឺ​ជា​ទីប្រឹក្សា​ជាន់​ខ្ពស់​នៃ​ឧបការី​រដ្ឋមន្រ្តី​ក្រសួង​ការពារ​ជាតិ​សម្រាប់​កិច្ចការ​សន្តិសុខ​នៅ​អាស៊ី​និង​ប៉ាស៊ីហ្វិក។

លោកស្រី Lindsey Ford បាន​ជួប​ជាមួយ​អ្នក​សារព័ត៌មាន​កម្ពុជា​ជា​ច្រើន​នាក់ កាលពី​ថ្ងៃ​អង្គារ ទី១២ ខែ​មិថុនា ដែល​នៅ​ពេល​នោះ លោកស្រី​បាន​និយាយ​ជាទូទៅ អំពី​ទំនាក់​ទំនង​រវាង​សហរដ្ឋ​អាមេរិក​ជាមួយ​កម្ពុជា ក៏ដូចជា​ជាមួយ​អាស៊ាន​ទាំង​មូល​ផងដែរ។

ឆ្លើយតប​ទៅ​នឹង​សំណួរ​ថា តើ​លោកស្រី​យល់​យ៉ាងម៉េច​ដែរ ប្រសិន​ជា​មាន​មូលដ្ឋាន​ទ័ព​បរទេស​នៅ​កម្ពុជា​មែន​នោះ លោកស្រី Lindsey Ford បាន​និយាយ​ថា វា​នឹង​បង្ក​អស្ថិរភាព​សម្រាប់​កម្ពុជា ក៏​ដូចជា​តំបន់​អាស៊ាន​ទាំង​មូល​ផងដែរ។

លោកស្រី Lindsey Ford បាន​និយាយ​ដូច្នេះ​ថា ៖ «សំណួរ​សួរ​ថា តើ​ហេតុអ្វី? អ្វី​ទៅ​ជា​គោលបំណង? ពី​ព្រោះ​ថា ចំពោះ​ខ្ញុំ វា​ហាក់​ដូចជា នេះ​ជា​អស្ថិរភាព មិនមែន​តែ​សម្រាប់​ប្រទេស​កម្ពុជា​ទេ ប៉ុន្តែ​សម្រាប់​តំបន់​ទាំងមូល ដូច្នេះ វា​ពិបាក​សម្រាប់​ខ្ញុំ​ក្នុង​ការ​យល់​ បើ​មាន​ករណី​នេះ​កើត​ឡើង​មែន។»

លោកស្រី Lindsey Ford បាន​បន្ត​ដូច្នេះ​ថា ៖ «វា​ពិបាក​សម្រាប់​ខ្ញុំ ក្នុង​ការ​យល់​ថា តើ​រដ្ឋាភិបាល​កម្ពុជា​ឬ​រដ្ឋាភិបាល​ចិន នឹង​លើក​ឡើង​មូលហេតុ​អ្វី​ដែល​ល្អ​សម្រាប់​ស្ថិរភាព​ក្នុង​តំបន់។»

លោកស្រី Lindsey Ford បាន​និយាយ​ផងដែរ​ថា ក្តី​បារម្ភ​ជា​ចម្បង​នោះ​គឺ​រដ្ឋធម្មនុញ្ញ​កម្ពុជា​មិន​អនុញ្ញាត​ឲ្យ​មាន​មូលដ្ឋាន​ទ័ព​បរទេស​ទេ ដូច្នេះ វា​មិន​មែន​ជា​បញ្ហា​ឬ​ក៏​ជា​ការ​គំរាម​កំហែង​ដល់​សហរដ្ឋ​អាមេរិក​នោះ​ទេ។

ការលើក​ឡើង​របស់​លោកស្រី  Lindsey Ford មិន​ឆ្លុះ​បញ្ចាំង​ពី​ជំហរ​របស់​រដ្ឋាភិបាល​សហរដ្ឋ​អាមេរិក​នោះ​ទេ នេះ​បើ​យោងតាម​មន្រ្តី​ស្ថានទូត​អាមេរិក​ប្រចាំ​នៅ​ភ្នំពេញ។

អនុប្រធានាធិបតី​អាមេរិក លោក Mike Pence ធ្លាប់​បាន​សម្តែង​ការព្រួយ​បារម្ភ​ បន្ទាប់​ពី​មាន​របាយការណ៍៍​ថា នឹង​មាន​មូលដ្ឋាន​ទ័ព​ចិន​នៅ​កម្ពុជា កាលពី​ខែ​មករា កន្លង​ទៅ។

កន្លងមក អាជ្ញាធរ​កម្ពុជា រួមទាំង​សម្តេច​នាយក​រដ្ឋមន្ត្រី ហ៊ុន សែន ផង ធ្លាប់​បាន​បដិសេធ​រួច​មក​ហើយ​ថា មិន​មាន​វត្តមាន​មូលដ្ឋាន​ទ័ព​ចិន​នៅ​កម្ពុជា​ទេ ហើយ​ក៏​នឹង​មិន​មាន​ការ​ធ្វើ​វិសោធនកម្ម​រដ្ឋធម្មនុញ្ញ​ដើម្បី​ឲ្យ​មាន​វត្តមាន​យោធា​ចិន​នោះ​ដែរ។

សារព័ត៌មាន អេស៊ា ថែមស៍ បាន​សរសេរ​ដោយ​យោង​ប្រភព​ការទូត​មិន​បញ្ចេញ​ឈ្មោះ ថា ចិន​ចង់​មាន​មូលដ្ឋាន​កងទ័ព​ជើង​ទឹក​នៅ​ខេត្ត​កោះកុង នៃ​ប្រទេស​កម្ពុជា។

អ្នកនាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន ធ្លាប់​បាន​ហៅ​ការ​ចោទ​ប្រកាន់​ថា​មាន​​មូលដ្ឋាន​យោធា​ចិន​នៅ​កម្ពុជា ជា​ការ​គួរ​ឲ្យ​អស់​សំណើច ហើយ​បាន​វាយ​បក​ទៅ​វិញ​ថា ចុះ​ប្រទេស​ខ្លះ មាន​មូលដ្ឋាន​ទ័ព​នៅ​ច្រើន​កន្លែង នៅ​គ្រប់​ជ្រុង​នៃ​ពិភពលោក ហេតុ​ម្ដេច​មិន​ចោទ​សួរ​ផង៕