បើតាមទិន្នន័យពី ក្រុមហ៊ុនស្រាវជ្រាវ Coresight Research ដែលដកស្រង់ដោយសារព័ត៌មាន CNN បានគូសបញ្ជាក់ថា ហាងទំនិញរាយនៅសហរដ្ឋអាមេរិក បានប្រកាសបិទទ្វារអស់ ៨ពាន់ ៤រយកន្លែងក្នុងឆ្នាំ ២០២០នេះ។
ការស្រាវជ្រាវនេះ បានបង្ហាញទៀតថា ការបិទទ្វារអាជីវកម្មនេះ នឹងមានកំណើនបន្ថែមទៀត ក្នុងខែធ្នូ ចុងឆ្នាំ ២០២០នេះ ហើយនឹងអាចបំបែកកំណត់ត្រាថ្មី ដែលមានការបិទទ្វារ ៩ពាន់ ៣រយកន្លែង កាលពីឆ្នាំ២០១៩កន្លងទៅ។
បើតាមរបាយការណ៍ពី សមាគមភោជនីយដ្ឋានជាតិអាមេរិក បានរកឃើញថា វិស័យឧស្សាហកម្មម្ហូបអាហារនៅអាមេរិកគឺ កាន់តែអាប់អួរ ដូចៗគ្នា ហើយភោជនីយដ្ឋានប្រមាណ ១១ម៉ឺនកន្លែង ឬស្មើនឹង ១៧% នៃចំនួនភោជនីយដ្ឋានទូទាំងប្រទេស បានបិទទ្វារអាជីវកម្មជាអចិន្រ្តៃយ៍ហើយ ខណៈមានភោជនីយដ្ឋានជាច្រើនពាន់កន្លែងទៀត កំពុងប្រឈមនឹងការក្ស័យធន។
អត្ថបទទាក់ទង!
បើតាមសារព័ត៌មាន CNN បានធ្វើការវិភាគថា នៅក្នុងឆ្នាំ ២០២០នេះ គឺជាឆ្នាំដ៏ឃោរឃៅបំផុត សម្រាប់ភោជនីយដ្ឋាន និងហាងទំនិញ ដោយសារតែវិបត្តិកូវីដ១៩ ធ្វើឲ្យមានការប្រែប្រួលលើការចំណាយទិញទំនិញ ក៏ដូចជាផ្លាស់ប្តូរទម្លាប់នៃការទទួលទានអាហារ ដែលធ្វើឲ្យភោជនីយដ្ឋាន និងហាងទំនិញជាច្រើន ត្រូវដួលរលំជាបន្តបន្ទាប់។
យ៉ាងណាក៏ដោយ ចំនួនអត្រាអ្នកគ្មានការងារធ្វើ បន្តកើនឡើងជារៀងរាល់សប្តាហ៍ ហើយសេតវិមានអាមេរិក ក៏បានស្នើកញ្ចប់ថវិកាជំនួយជាង ៩០០ពាន់លានដុល្លារអាមេរិកបន្ថែមទៀត ដើម្បីគាំទ្រដល់សេដ្ឋកិច្ចជាតិ កុំឲ្យធ្លាក់ចុះកាន់តែដុនដាបខ្លាំង ក៏ប៉ុន្តែពុំទាន់ទទួលបានការអនុម័តសម្រេចនោះទេ។
សូមជម្រាបដែរថា គិតមកដល់ថ្ងៃទី ១៤ ខែធ្នូឆ្នាំ ២០២០ ចំនួនករណីឆ្លងមេរោគកូវីដ១៩ នៅក្នុងសហរដ្ឋអាមេរិក បានកើនឡើងដល់ជាង ១៦លានករណីហើយ និងបានសម្លាប់មនុស្សជិត ៣សែននាក់ផងដែរ៕
None
