រដ្ឋមន្ត្រីថាមពលអាស៊ានជួបប្រជុំគ្នា ដើម្បីរកវិធីទប់ទល់នឹងវិបត្តិប្រេង ដែលកំពុងហក់ឡើងខ្ពស់

សារព័ត៌មាន CNA បានរាយការណ៍ថា សង្គ្រាមរវាងអាម៉េរិក-អ៊ីស្រាអែល ប្រឆាំងនឹងអ៊ីរ៉ង់ ដែលបន្តអូសបន្លាយ ស្ទើរតែបិទច្រកដង្ហើមថាមពល និងបានបង្កើតក្តីបារម្ភយ៉ាងខ្លាំងដល់បណ្តារដ្ឋអាស៊ាន ដែលត្រូវបានរំពឹងថា អាចនឹងឈានដល់ការចុះកិច្ចព្រមព្រៀងក្របខណ្ឌអាស៊ាន ដើម្បីការពារសន្តិសុខប្រេងឥន្ធនៈរួមគ្នានៅសប្តាហ៍នេះ។
 ស្របពេលដែលភ្លើងសង្គ្រាមរវាងសហរដ្ឋអាម៉េរិក-អ៊ីស្រាអែល ប្រឆាំងនឹងអ៊ីរ៉ង់ នៅតែបន្តឆាបឆេះយ៉ាងសន្ធោសន្ធៅ រដ្ឋមន្ត្រីថាមពលអាស៊ានគ្មានជម្រើសអ្វីក្រៅពីប្រញាប់ប្រញាល់ពិនិត្យមើលផែនការសន្តិសុខថាមពលបន្ទាន់នោះឡើយ។ បំណងសំខាន់បំផុត គឺកាត់បន្ថយហានិភ័យ និងទប់ស្កាត់ការហក់ឡើងថ្លៃភ្លាមៗ ដែលបណ្តាលមកពីការវាយប្រហារលើហេដ្ឋារចនាសម្ព័ន្ធ និងផ្លូវដឹកជញ្ជូនប្រេងសំខាន់ៗនៅមជ្ឈិមបូព៌ា។
ជំនួបជាន់ខ្ពស់របស់រដ្ឋមន្ត្រីថាមពលអាស៊ាននៅទីក្រុងម៉ានីល ប្រទេសហ្វីលីពីន ដែលកំពុងចាប់ផ្ដើម និងគ្រោងបញ្ចប់នៅថ្ងៃទី៩ ខែតុលា ខាងមុខនេះ កំពុងផ្តោតលើរបៀបវារៈដ៏សំខាន់មួយ គឺការពង្រឹងសន្តិសុខថាមពលតំបន់។ បច្ចុប្បន្នអាស៊ានបានពឹងផ្អែកលើការនាំចូលប្រេងឆៅជាងពាក់កណ្តាលពីតំបន់មជ្ឈិមបូព៌ា ដើម្បីផ្គត់ផ្គង់រោងចក្រចម្រាញ់ប្រេងរបស់ខ្លួន។ ដូច្នេះនៅពេលដែលសង្គ្រាមនៅជ្ឈិមបូព៌ាផ្ទុះឡើង វានឹងធ្វើឱ្យប៉ះពាល់ដល់ចរន្តសេដ្ឋកិច្ចអាស៊ានដោយផ្ទាល់។ កាន់តែធ្ងន់ធ្ងរជាងនេះទៀតនោះ គឺក្រុមហ៊ុនចម្រាញ់ប្រេងធំៗរបស់ចិនបានប្រកាសផ្អាកការនាំចេញប្រេងនៅក្នុងខែតុលា នេះ។
ស្ថិតក្នុងស្ថានភាពដ៏ស្រួចស្រាល់នេះ លោក ហ្វេលិក ហ្វេនតេបេឡា (Felix Fuentebella) អនុរដ្ឋមន្ត្រីថាមពលហ្វីលីពីនបានសង្កត់ធ្ងន់ថា វិបត្តិនេះបានដាស់តឿនឱ្យអាស៊ានមើលឃើញពីភាពចាំបាច់ នៃភាពធន់ខាងថាមពល។ លោកបានបញ្ជាក់ថា បញ្ហាសន្តិសុខថាមពលលែងជាបញ្ហាបច្ចេកទេសធម្មតាទៀតហើយ ប៉ុន្តែវាបានក្លាយជារឿងអាទិភាពខ្ពស់បំផុតនៅលើតុចរចារបស់មេដឹកនាំអាស៊ាន។
សារព័ត៌មាន The Star បានរាយការណ៍ថា ប្រសិនបើស្ថានការណ៍នៅមជ្ឈិមបូព៌ាវិវត្តកាន់តែអាក្រក់ទៅៗ នោះតម្លៃប្រេងឆៅលើទីផ្សារអន្តរជាតិអាចស្ទុះឡើងដល់ប្រមាណ១០៧ដុល្លារក្នុងមួយបារ៉ែល ហើយប្រសិនបើជម្លោះនេះកាន់តែរីករាលដាលខ្លាំង តម្លៃប្រេងអាចនឹងហក់ឡើងលើស១១២ដុល្លារក្នុងមួយបារ៉ែល ដែលនេះជាសម្ពាធសេដ្ឋកិច្ចយ៉ាងធ្ងន់ធ្ងរសម្រាប់ពិភពលោក និងតំបន់អាស៊ាន៕

ដោយៈ សរ សុជាតិ