កិច្ចប្រជុំនេះអាចនឹងធ្វើនៅទីក្រុងហ្សាកាតា ឥណ្ឌូនេស៊ី ប៉ុន្តែ ពុំទាន់មានការកំណត់បរិច្ឆេទថាគ្រោងនឹងធ្វើនៅពេលណានៅឡើយទេ ។
មីយ៉ាន់ម៉ាបានធ្លាក់ចូលក្នុងវិបត្តិវឹកវរ បន្ទាប់ពីក្រុមយោធាបានធ្វើរដ្ឋប្រហារកាលពីថ្ងៃទី១ ខែកុម្ភៈមក ដោយបានចាប់ខ្លួនមេដឹកនាំជាប់ឆ្នោតលោកស្រី អ៊ុងសាន ស៊ូជី ដាក់ពន្ធនាគារ ។ ហើយតាំងពីពេលនោះមក ប្រជាជនជាង ៥០០នាក់ហើយ ដែលត្រូវបានសម្លាប់ ក្រោមការបង្ក្រាបដោយហិង្សាពីសំណាក់កម្លាំងយោធាទៅលើបាតុកម្មនិងការតវ៉ារបស់ប្រជាជននៅទូទាំងប្រទេស ។
នៅក្នុងសេចក្ដីថ្លែងការណ៍រួមជាមួយប្រទេសម៉ាឡេស៊ី កាលពីថ្ងៃទី៥ ខែមេសា ប្រ៊ុយណេបាននិយាយថា ប្រទេសទាំងពីរបានស្នើឲ្យរដ្ឋមន្ត្រីនិងមន្ត្រីជាន់ខ្ពស់របស់ខ្លួន រៀបចំការងារចាំបាច់ដើម្បីត្រៀមសម្រាប់កិច្ចប្រជុំដែលនឹងប្រព្រឹត្តទៅនៅឯលេខាធិការដ្ឋានអាស៊ាន ដែលស្ថិតក្នុងទីក្រុងហ្សាកាតា ឥណ្ឌូនេស៊ី ។
អត្ថបទទាក់ទង
អាស៊ានមានគោលការណ៍មួយគឺមិនធ្វើអត្ថាធិប្បាយលើបញ្ហាក្នុងស្រុករបស់រដ្ឋជាសមាជិកនីមួយៗ ហើយកន្លងមក ដោយសារតែការខ្វែងគំនិតគ្នា អាស៊ានមិនសូវជាអាចធ្វើអ្វីបានទេ ជុំវិញវិបត្តិដែលកំពុងកើតមាននៅប្រទេសមីយ៉ាន់ម៉ា ។
កន្លងមក ម៉ាឡេស៊ី ឥណ្ឌូនេស៊ី ហ្វ៊ីលីពិន និងសិង្ហបុរីបានសម្ដែងការព្រួយបារម្ភយ៉ាងខ្លាំងចំពោះអំពើសម្លាប់ផ្ដាច់ផ្ដិលជីវិតពលរដ្ឋស៊ីវិលនៅមីយ៉ាន់ម៉ា និងបានគាំទ្រឲ្យមានជំនួបថ្នាក់កំពូលរបស់អាស៊ាន ដើម្បីពិភាក្សាវិបត្តិនៅមីយ៉ាន់ម៉ា ។
កាលពីសប្ដាហ៍មុន រដ្ឋមន្ត្រីការបរទេសនៃប្រទេសទាំងបួននេះ បានជួបគ្នាដាច់ដោយឡែកៗជាមួយសមភាគីរបស់ខ្លួននៅប្រទេសចិន ដែលជាប្រទេសភូមិផងរបងជាមួយមីយ៉ាន់ម៉ា ៕
