តំបន់អាស៊ានមិនត្រឹមតែជាភូមិសាស្ត្រនយោបាយដ៏សំខាន់មួយ ដែលប្រទេសមហាអំណាចធំៗកំពុងតាមប្រជែងឥទ្ធិពលគ្នាប៉ុន្ណោះទេ ប៉ុន្ដែ តំបន់នេះ ក៏ជាប្លុកពាណិជ្ជកម្មដែលកំពុងមានការស្ទុះងើបឡើងយ៉ាងឆាប់រហ័សផងដែរ។ ជាក់ស្ដែង តាមរបាយការណ៍របស់ក្រុមហ៊ុនដឹកជញ្ជូនលំដាប់ពិភពលោក DHL បានបញ្ចេញរបាយការណ៍របស់ខ្លួនដោយបានព្យាករថា អាស៊ាន នឹងឈានមុខគេនៅលើពិភពលោកទាក់ទងនឹងកំណើននាំចេញចាប់ពីឆ្នាំ២០២១ ដល់ឆ្នាំ២០២៦ និងតាមពីក្រោយដោយតំបន់អាស៊ីខាងត្បូង និងអាស៊ីកណ្តាល។ តើមានកត្តាអ្វីខ្លះជំរុញឲ្យអាស៊ានមានកំណើននាំចេញខ្លាំងក្លានៅ៥ឆ្នាំខាងមុខនេះ?
តំបន់អាស៊ានត្រូវបានក្រុមហ៊ុនដឹកជញ្ជូនទំនិញលំដាប់ពិភពលោក DHL ព្យាករថា នឹងឃើញមានកំណើនទំហំនាំចេញ ៥,៦% ក្នុងរយៈពេល ៥ ឆ្នាំខាងមុខនេះ ដែលតាមពីក្រោយដោយអាស៊ីខាងត្បូង និងកណ្តាលដែលមានកំណើន ៥% និងអនុតំបន់សាហារ៉ានៅទ្វីបអាហ្វ្រិកមានកំណើន ៤,៤%។
ផ្អែកលើរបាយការណ៍ថ្មីរបស់ក្រុមហ៊ុន DHL Trade Growth Atlas ដែលបានវាយតម្លៃអំពីនិន្នាការសំខាន់ៗ និងក្ដីរំពឹងទុកសម្រាប់ពាណិជ្ជកម្មសកលគ្របដណ្តប់លើប្រទេសចំនួន ១៧៣ បានបង្ហាញថា តំបន់ទាំង៣នេះ រួមមាន អាស៊ាន អាស៊ីខាងត្បូង និងកណ្ដាល និងតំបន់សាហារ៉ានៅទ្វីបអាហ្វ្រិក គឺសុទ្ធតែជា«សសរស្ដម្ភថ្មី»នៃកំណើនពាណិជ្ជកម្មពិភពលោក។
របាយការណ៍នេះបានឱ្យដឹងថា ទីផ្សារអាស៊ាន និងទីផ្សារកំពុងរីកចម្រើនមួយចំនួននឹងដើរតួនាទីកាន់តែធំនៅក្នុងពាណិជ្ជកម្មពិភពលោកនាពេលអនាគត។
លោក John Pearson នាយកប្រតិបត្តិនៃក្រុមហ៊ុន DHL Express បាននិយាយថា ពាណិជ្ជកម្មនឹងនៅតែជាកត្តាជំរុញដ៏សំខាន់ក្នុងការធ្វើឱ្យមានភាពរីកចម្រើន ដូចដែលគេបានឃើញជាច្រើនសតវត្សរ៍មកហើយ។
លោក Pearson បានបញ្ជាក់ថា ពាណិជ្ជកម្មអន្តរជាតិត្រូវបានចាត់ទុកថា មានសារៈសំខាន់ជាពិសេសនៅពេលនេះតែម្ដង ដោយសារតែអំណាចរបស់វាក្នុងការពន្លឿនកំណើនសេដ្ឋកិច្ច កាត់បន្ថយអតិផរណា និងអាចឱ្យប្រទេសនានាធ្វើពិពិធកម្មប្រភពនៃធាតុចូលសំខាន់ៗសម្រាប់ភាពធន់នឹងសេដ្ឋកិច្ច។
អត្ថបទគួរអាន
តាមរបាយការណ៍របស់ក្រុមហ៊ុន DHL និងសាកលវិទ្យាល័យញូវយ៉កបានបង្ហាញថា ជំងឺកូវីដ១៩មិនមែនជាឧបសគ្គធំដុំសម្រាប់ពាណិជ្ជកម្មសកលដូចការរំពឹងទុកពីមុនមកនោះទេ ដោយសារពាណិជ្ជកម្មអន្តរជាតិលើទំនិញបានកើនឡើងដល់ ១០% លើសពីកម្រិតនៅមុនពេលជំងឺរាតត្បាតនេះកើតឡើងទៅទៀត។
ទោះបីជាមានសង្រ្គាមរុស្ស៊ី-អ៊ុយក្រែនក៏ដោយ ការព្យាករនាពេលថ្មីៗនេះបានបង្ហាញថា ពាណិជ្ជកម្មសកលត្រូវគេរំពឹងថា នឹងមានល្បឿនកំណើនយឺតបន្ដិចក្នុងឆ្នាំ២០២២ និង២០២៣ បើធៀបនឹងកំណើនដែលធ្លាប់មានកាលពី១ទសវត្សរ៍កន្លងមកនេះ។
របាយការណ៍ដដែលនេះបានឱ្យដឹងថា ពាណិជ្ជកម្មតាមប្រព័ន្ធអេឡិចត្រូនិក (E-commerce) មានការកើនឡើងនៃការលក់ក្នុងអំឡុងពេលជំងឺរាតត្បាតនេះ ហើយកំណើនពាណិជ្ជកម្មអេឡិចត្រូនិកឆ្លងដែនដ៏រឹងមាំក៏ត្រូវបានព្យាករណ៍ថា នឹងបន្តកើនឡើងផងដែរ។ ការលក់បែបពាណិជ្ជកម្មអេឡិកត្រូនិកឆ្លងដែនជាសកលត្រូវគេរំពឹងថា នឹងកើនឡើងពី៣០០ ពាន់លានដុល្លារក្នុងឆ្នាំ២០២០ មកដល់ ១ទ្រីលានដុល្លារនៅក្នុងឆ្នាំ២០៣០។
លោក Steven Altman អ្នកស្រាវជ្រាវជាន់ខ្ពស់ និងជាប្រធានផ្នែកនៅក្រុមហ៊ុន DHL បាននិយាយថា ទិដ្ឋភាពពាណិជ្ជកម្មកំពុងតែមានការប្រែប្រួល និងមានបញ្ហាប្រឈមថ្មីៗ ប៉ុន្តែរបាយការណ៍នេះបដិសេធដាច់ខាត ចំពោះការព្យាករពីការធ្លាក់ចុះខ្លាំងនៃពាណិជ្ជកម្មសកល។
ទាក់ទងនឹងប្រទេសមានសេដ្ឋកិច្ចដែលកំពុងរីកចម្រើនវិញ របាយការណ៍នេះបានបង្ហាញថា ពួកគេកំពុងក្លាយជាអ្នកនាំចេញដ៏សំខាន់កាន់តែខ្លាំងឡើង នូវសម្ភារៈបរិក្ខារទំនើបៗដូចជាឧបករណ៍ឧស្សាហកម្ម និងម៉ាស៊ីនជាដើម។
យ៉ាងណាមិញ ផ្អែកតាមការព្យាកររបស់មូលនិធិ IMF របាយការណ៍នេះបាននិយាយថា ប្រទេសចិននឹងនៅតែសម្រេចបាននូវកំណើនពាណិជ្ជកម្មច្រើនបំផុតពីឆ្នាំ២០២១ដល់ឆ្នាំ២០២៦ ប៉ុន្តែចំណែកនៃពាណិជ្ជកម្មរបស់ចិននៅក្នុងកំណើនសេដ្ឋកិច្ចពិភពលោកនឹងធ្លាក់ចុះមកនៅត្រឹម១៣%ប៉ុណ្ណោះ៕
អត្ថបទ៖ សុខ ជា
