ផ្សារហ៊ុននៅអាស៊ីស្ទុះហក់ឡើង ខណៈអ្នកវិនិយោគទន្ទឹងរង់ចាំការចេញផ្សាយទិន្នន័យអតិផរណារបស់សហរដ្ឋអាម៉េរិក

សារព័ត៌មានធំៗបានរាយការណ៍ថា នៅព្រឹកថ្ងៃអង្គារ ទី៩ ខែមករា សន្ទស្សន៍ផ្សារហ៊ុន MSCI ដែលជាផ្សារហ៊ុនធំបំផុតនៅអាស៊ី-ប៉ាស៊ីហ្វិក បានហក់ឡើង០,២%។ ទោះជាយ៉ាងណា ផ្សារហ៊ុនអាម៉េរិក S&P 500 បានធ្លាក់ចុះតិចតួចក្នុងរង្វង់០,១% ខណៈផ្សារហ៊ុនអូស្ត្រាលី បានហក់ឡើង០,៩៥% ផ្សារហ៊ុនជប៉ុន Nikkei បានហក់ឡើង១,១៤% ហើយផ្សារហ៊ុនហុងកុង Hang Seng បានហក់ឡើង០,២៦%។

ដោយឡែកការជួញដូរនៅអឺរ៉ុប ក៏បានហក់ឡើងដែរ ដោយផ្សារហ៊ុនអឺរ៉ុប Euro Stoxx 50 បានហក់ឡើង០,២៩% ផ្សារហ៊ុនអាល្លឺម៉ង់ German DAX បានហក់ឡើង០,២៧% ហើយផ្សារហ៊ុនអង់គ្លេស FTSE 100 បានហក់ឡើង០,៣៤%។

ពាក់ព័ន្ធនឹងស្ថានភាពនេះ អ្នកវិភាគបានអះអាងថា អត្រាអតិផរណានៅសហរដ្ឋអាម៉េរិក នៅតែជាកត្តា និងជាមូលហេតុចម្បង ដែលជំរុញឱ្យសន្ទស្សន៍ផ្សារហ៊ុននៅអាស៊ី ហក់ឡើង។

លោក រ៉ាហ្វាអែល បូស្ទិក (Raphael Bostic) ប្រធានធនាគារកណ្តាលអាម៉េរិកសាខាក្រុងអាត្លង់តា (Atlanta) បាននិយាយថា នៅពេលនេះការកំណត់អត្រាការប្រាក់នៅអាម៉េរិក ស្ថិតក្នុងសភាពស្រពេចស្រពិលនៅឡើយ ដោយសារតែគោលដៅបញ្ចុះអត្រាអតិផរណារបស់ធនាគារកណ្តាលអាម៉េរិកឱ្យមកនៅត្រឹម២% គឺពិបាកនឹងសម្រេចបាន។ លោក រ៉ាហ្វាអែល គ្រាន់តែបង្ហាញក្តីសង្ឃឹមផ្ទាល់ខ្លួនថា ការបញ្ចុះអត្រាការប្រាក់នៅសហរដ្ឋអាម៉េរិក អាចនឹងធ្វើឡើងនៅចុងឆ្នាំ២០២៤ ឯណោះ៕

ដោយៈ សរ សុជាតិ