លោក គ្រីស មីហ្គឺរ (Chris Meagher) ជំនួយការរដ្ឋមន្ត្រីការពារជាតិសហរដ្ឋអាមេរិក ទទួលបន្ទុកកិច្ចការសាធារណៈ បាននិយាយថា ឯកសារដែលផ្សព្វផ្សាយតាមអ៊ីនធឺណិតកាលពីពេលថ្មីៗ បានបង្កហានិភ័យយ៉ាងធ្ងន់ធ្ងរដល់សន្តិសុខជាតិ ហើយទំនងជាអាចជាការផ្សព្វផ្សាយព័ត៌មានក្លែងផង។ ប៉ុន្តែមន្ត្រីអាមេរិករូបនេះ មិនបានបញ្ជាក់ថា បណ្ដាឯកសារទាំងនោះជាឯកសារដើមឬយ៉ាងណានោះទេ។
លោក គ្រីស មីហ្គឺរ បានប្រាប់អ្នកកាសែតថា៖ «យើងនៅតែបន្តការស៊ើបអង្កេតថាតើរឿងនេះកើតឡើងយ៉ាងដូចម្តេច ហើយវាមានវិសាលភាពកម្រិតណា។ យើងមានដំណាក់កាលផ្សេងៗ ដើម្បីពិនិត្យមើលរបៀបដែលព័ត៌មានប្រភេទនេះត្រូវបានចែកចាយនិងគោលដៅនៃការចែកចាយឱ្យកាន់តែច្បាស់»។
គួរជម្រាបថា មកទល់នឹងពេលនេះ ឯកសារដែលលេចធ្លាយទាំងនោះត្រូវបានរដ្ឋាភិបាលអាមេរិកលុបចោលអស់ហើយ ពីគេហទំព័រដែលផ្សព្វផ្សាយនោះ។ បើតាមអ្នកនាំពាក្យសន្តិសុខជាតិរបស់សេតវិមានលោក ចន ឃើប៊ី (John Kirby) លោកប្រធានាធិបតី ចូ បៃឌិន (Joe Biden) ត្រូវបានគេរាយការណ៍ឱ្យដឹងតាំងពី«ចុងសប្តាហ៍មុន»ម្ល៉េះ ចំពោះការលេចធ្លាយឯកសារសម្ងាត់ទាំងនោះ។
ក្នុងនោះ ឯកសារជាច្រើននិយាយពីរឿងអ៊ុយក្រែន ជាអាទិ៍ព័ត៌មានស្តីពីការការពារដែនអាកាស និងកិច្ចខិតខំប្រឹងប្រែជាអន្តរជាតិក្នុងការកសាងកងកម្លាំងយោធាអ៊ុយក្រែន ដើម្បីទប់ទល់នឹងការវារលុករបស់រុស្ស៊ី។ លើសពីនោះទៀត ឯកសារផ្សេងៗទៀតទម្លាយឱ្យដឹងអំពីការឃ្លាំមើលរបស់សហរដ្ឋអាមេរិកចំពោះសម្ព័ន្ធមិត្តរបស់ខ្លួន រឿងមេដឹកនាំទីភ្នាក់ងារស៊ើបការណ៍សម្ងាត់ ម៉ូសាត (Mossad) របស់អ៊ីស្រាអែល បាននិងកំពុងគាំទ្រការតវ៉ារបស់ប្រជាជនអ៊ីស្រាអែល ដែលប្រឆាំងនឹងផែនការកំណែទម្រង់ប្រព័ន្ធតុលាការដ៏ចម្រូងចម្រាសរបស់លោកនាយករដ្ឋមន្ត្រី នេតាន់យ៉ាហ៊ូ៕
