នាយកទីភ្នាក់ងារសុខាភិបាលនៃកោះបាលី បាននិយាយថា ការខ្វះអុកស៊ីសែននេះបានកើតឡើងចាប់តាំងពីថ្ងៃទី១៤ ខែកក្កដាមកម្ល៉េះ ហើយស្ថានភាពកាន់តែអាក្រក់ឡើងៗជារៀងរាល់ថ្ងៃ ។
កោះបាលី រួមទាំងកោះជ្វា និងតំបន់ ១៥ផ្សេងទៀត នៅក្នុងប្រទេសឥណ្ឌូនេស៊ី បានស្ថិតនៅក្រោមវិធានការរឹតត្បិតប្រឆាំងកូវីដ១៩ ដែលវិធានការនេះនឹងផុតកំណត់នៅថ្ងៃអាទិត្យនេះហើយ ប៉ុន្តែ អាជ្ញាធរថ្នាក់ជាតិកំពុងពិចារណាថា តើនឹងបន្តវិធានការរឹតត្បិតនោះបន្តទៀត ឬយ៉ាងណានោះ ។
ឥណ្ឌូនេស៊ីជាប្រទេសដែលមានប្រជាជនច្រើនជាងគេបំផុតទីបួននៅលើពិភពលោក ។ យោងតាមទិន្នន័យផ្លូវការ ប្រទេសនេះមានករណីឆ្លងកូវីដ-១៩ ជាង ៣លានករណី និងស្លាប់មនុស្ស ជាង ៨ម៉ឺននាក់ ហើយការឆ្លងរាលដាលកូវីដ-១៩ ហាក់ពុំទាន់មានសញ្ញាចុះថមថយនៅឡើយទេ ដោយសារតែមេរោគបំប្លែងថ្មី «ឌែលតា» ។
អត្ថបទទាក់ទង
បើយោងតាមអង្គការស្រាវជ្រាវ ឈ្មោះ Our World in Data បាននិយាយថា ឥណ្ឌូនេស៊ីមានអត្រាឆ្លងកូវីដ-១៩ ខ្ពស់ជាងអត្រាមធ្យមភាគសកលលោក ដល់ទៅ ៣ដង ។
នាយកទីភ្នាក់ងារសុខាភិបាលកោះបាលី បាននិយាយនៅថ្ងៃព្រហស្បតិ៍ សប្ដាហ៍នេះ ថា អ្នកជំងឺនៅកោះបាលីត្រូវការអុកស៊ីសែន ប្រមាណជាង ១១៣តោន ហើយមន្ទីរពេទ្យនានាមានអុកស៊ីសែនត្រឹមតែ ៤០តោនប៉ុណ្ណោះ ។ នៅកោះមួយទៀត គឺ កោះជ្វា កង្វះអុកស៊ីសែនក៏ត្រូវបានគេរាយការណ៍ផងដែរ ។
រដ្ឋាភិបាលឥណ្ឌូនេស៊ីបានចាប់ផ្ដើមនាំចូលអុកស៊ីសែន ពីប្រទេសនានា ដូចជា សហរដ្ឋអាមេរិក និងចិន ដើម្បីដោះស្រាយវិបត្តិខ្វះអុកស៊ីសែនសម្រាប់អ្នកជំងឺកូវីដ-១៩ ៕ (ប្រភព៖ ទីភ្នាក់ងារ រ៉យទ័រ)
