ការកើនឡើងខ្លាំងជាបន្តបន្ទាប់នេះ ត្រូវបានថ្នាក់ដឹកនាំជាន់ខ្ពស់ផ្សារមូលបត្រកម្ពុជា ចេញមកអំពាវនាវប្រាប់ឲ្យអ្នកវិនិយោគលើការជួញដូរ Bitcoin ត្រូវតែប្រុងប្រយ័ត្នខ្ពស់ ព្រោះការជួញដូរ ឬការវិនិយោគ Bitcoin នេះ ពីព្រោះពុំទាន់មានការទទួលស្គាល់ទូលំទូលាយនៅឡើយទេ ហើយរដ្ឋាភិបាលនៅតាមបណ្ដាប្រទេសនីមួយៗក៏ពិបាកក្នុងការលូកដៃលើកិច្ចការពារដែលអាចកើតឡើងជាយថាហេតុណាមួយនោះដែរ។
ឯកឧត្តម ហុង សុហួរ ប្រតិភូរាជរដ្ឋាភិបាល ទទួលបន្ទុកជាអគ្គនាយក ផ្សារមូលបត្រកម្ពុជា បានប្រាប់ ខេមបូណូមីស ថា ដោយមានការសង្កេតឃើញបច្ចុប្បន្នរូបិយប័ណ្ណ ប៊ីតខញ កំពុងទទួលបានការពេញនិយមក្នុងចំណោមអ្នកវិនិយោគជាយុវជន ដោយសារតែពួកគេបានឃើញពីប្រវត្តិរបស់អ្នកដែលទទួលជោគជ័យលើការវិនិយោគមួយនេះ។ ទោះជា ប៊ីតខញ ពុំទាន់មានគុណតម្លៃក្នុងការប្រើប្រាស់សម្រាប់ការទូទាត់ក៏ដោយ ប៉ុន្តែសម្រាប់អ្នកជំនាញរូបនេះ បានកត់សម្គាល់ឃើញថា វានៅតែជាឧបករណ៍វិនិយោគមួយដែលមានការពេញនិយម ទោះបីមានប្រទេសភាគច្រើនមិនទទួលស្គាល់ក៏ដោយ។ បើតាមការអះអាង របស់ មេផ្សារមូលបត្រកម្ពុជា រូបនេះ ការប្រែប្រួលទីផ្សារ នឹងធ្វើឱ្យអ្នកវិនិយោគទទួលបានទាំងផលចំណេញ និងការខាតបង់ ដែលអាចកើតឡើងជាយថាហេតុ។
អត្ថបទគួរអាន
ជុំវិញការវិនិយោគរូបិយប័ណ្ណ ប៊ីតខញ នេះ ត្រូវបាន ឯកឧត្តម ហុង សុហួរ ហាក់សម្ដែងការព្រួយបារម្ភចំពោះការវិនិយោគប៉ះចំប្រព័ន្ធវិនិយោគក្លែងក្លាយផងដែរ។ ការណ៍នេះនឹងធ្វើឱ្យរដ្ឋាភិបាលពិបាកក្នុងការជួយអន្តរាគមន៍។ សម្រាប់អ្នកជំនាញសេដ្ឋកិច្ច និង ហិរញ្ញវត្ថុ រូបនេះ ដើម្បីកុំឱ្យបាត់បង់ផលប្រយោជន៍ គឺទាមទារឱ្យវិនិយោគិន ត្រូវចេះផ្ទៀងផ្ទាត់ និងប្រយ័ត្នប្រយែងឲ្យបានខ្ពស់ ដោយត្រូវស្វែងរកភាពស្របច្បាប់របស់អ្នកផ្ដល់សេវា និងស្ថាប័នវិនិយោគឱ្យបានច្បាស់លាស់ជាមុនសិន។
ជុំវិញការវិនិយោគរូបិយប័ណ្ណ ប៊ីតខញ នេះដែរ ត្រូវបានលោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុ នៃក្រុមហ៊ុន ភីភី លីង ស៊ីឃ្យួរឹធី កត់សម្គាល់ឃើញថា នាពេលកន្លងទៅនៅកម្ពុជា ពុំទាន់មានការអនុញ្ញាតឱ្យមានការជួញដូរណាមួយនៅឡើយទេ ប៉ុន្តែលោកយល់ឃើញថា ប៊ីតខញ អាចនឹងមានការស្ទុះឡើងរហូតដល់ ១០ម៉ឺនដុល្លារ ក្នុង១ ប៊ីតខញ នាពេលខាងមុខ ដោយសារតែអ្នកវិនិយោគធំៗរបស់អាម៉េរិក បានផ្ដល់នូវទំនុកចិត្ត ស្របពេលដែលរូបិយប័ណ្ណ ប៊ីតខញ បានការចុះបញ្ជីនៅតាមនិយ័តករមួយចំនួនរបស់សហរដ្ឋអាម៉េរិកផងដែរ។
សូមបញ្ជាក់ថា គិតត្រឹមថ្ងៃទី ១៣ ខែ មីនា ឆ្នាំ២០២៤ តម្លៃ Bitcoin ហក់ឡើងដល់កម្រិតកំពូល ក្នុងមួយ Bitcoin ៧ម៉ឺន ២៦៩០ដុល្លារ ពោលគឺបានកើនឡើងដល់ទៅ៦ថ្ងៃជាប់គ្នា ដែលនាំឲ្យតម្លៃរបស់វាកើនជិត៧០% គិតត្រឹមឆ្នាំ២០២៤៕
អត្ថបទ៖ បូ ដូឡា,រូបភាព ឯកសារ
None
