ទំហំពាណិជ្ជកម្មរវាងកម្ពុជា និងសិង្ហបុរីដាំក្បាលចុះប្រហែល៦០% នៅត្រីមាសទី១ឆ្នាំនេះ

អ្នកជំនាញក្នុងវិស័យសេដ្ឋកិច្ចបានគូសបញ្ជាក់ថា កត្តាដែលជួយជំរុញកំណើននាំចេញរបស់កម្ពុជាទៅសិង្ហបុរី គឺដោយសារតែប្រទេសនេះ បានបង្កើនការបញ្ជាទិញទំនិញពីកម្ពុជា ក្រោយប្រទេសជាដៃគូរបស់ពួកគេមួយចំនួនជួបបញ្ហាក្នុងការផ្គត់ផ្គង់ គួបផ្សំទំនាក់ទំនងការទូតល្អប្រសើរនៃប្រទេសទាំងពីរផងដែរ។ កំណើននៃការនាំចេញនេះ ក៏បង្ហាញពីគុណភាពផលិតផលកម្ពុជាអាចឆ្លើយតបនឹងលក្ខខណ្ឌតម្រូវរបស់សិង្ហបុរីផងដែរ។ ទំនិញកម្ពុជានាំចេញទៅសិង្ហបុរីភាគច្រើនជាផលិត​ផលកសិកម្ម ខណៈកម្ពុជានាំចូលពីសិង្ហបុរីភាគច្រើនគ្រឿងអេឡិចត្រូនិក និងរបស់របរមានតម្លៃ។

ស្ថិតិពាណិជ្ជកម្មរបស់អគ្គនាយកដ្ឋានគយ និងរដ្ឋាករបានបង្ហាញឲ្យឃើញថា កម្ពុជាសម្រេចបានការនាំចេញទំនិញទៅកាន់ទីផ្សារសិង្ហបុរីក្នុងទំហំជាង៤៧លានដុល្លារអាមេរិក នៅត្រីមាសទី១ឆ្នាំ២០២២ កើនឡើង៣៣៣% បើធៀបនឹងរយៈពេលដូចគ្នាកាលពីឆ្នាំមុន ដែលមានត្រឹមតែជិត​១១លានដុល្លារអាមេរិកតែប៉ុណ្ណោះ។ ចំណែកការនាំចូលទំនិញ​ពីសិង្ហបុរីមកកម្ពុជាវិញ បានដាំក្បាលចុះ​យ៉ាងគំហុកពីជាង២ពា​ន់៤០០លានដុល្លារនៅត្រីមាសទី១កាលពីឆ្នាំ២០២១មកនៅត្រឹមជាង៩៣០លានដុល្លារនៅត្រីមាសទី១ឆ្នាំនេះ មានការធ្លាក់ចុះជិត៦២%។ 

ការធ្លាក់ចុះនៃទំហំនាំចូលទំនិញពីសិង្ហបុរីនេះបានទាញទម្លាក់ទំហំពាណិជ្ជកម្មរវាងប្រទេសទាំងពីរពីជាង២ពាន់៤០០លានដុល្លារ កាលពីត្រីមាសទី១នៅឆ្នាំ២០២១ មកនៅត្រឹមជិត៩៨០លានដុល្លារអាមេរិកប៉ុណ្ណោះ នៅត្រីមាសទី១ឆ្នាំនេះ ដោយបានធ្លាក់ចុះជិត៦០%។ 

ពាក់ព័ន្ធបញ្ហានេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ច នៃវិទ្យាស្ថានទំទាក់ទំនងអន្តរជាតិ នៃរាជបណ្ឌិតសភាកម្ពុជា បានលើកឡើងថា កត្តាចម្បងដែលធ្វើឲ្យមានភាពខុសគ្នាក្នុងការធ្វើពាណិជ្ជកម្មរវាងប្រទេសកម្ពុជា និងសិង្ហបុរី គឺកត្តាតម្រូវការ។ ពោលគឺនៅប៉ុន្មានខែចុងក្រោយ តម្រូវកា​រទំនិញពីកម្ពុជានាំចេញទៅសិង្ហបុរីមានការកើនឡើង ខណៈតម្រូវការទំនិញសិង្ហបុរីនៅកម្ពុជាមានការធ្លាក់ចុះ។ អ្នកជំនាញរូបនេះវាយតម្លៃថា កត្តាដែលជួយជំរុញកំណើននាំចេញរបស់កម្ពុជា គឺដោយសារសិង្ហបុរីបានបង្កើនការបញ្ជាទិញទំនិញពីកម្ពុជាក្រោយប្រទេសមួយចំនួនជួបបញ្ហាផ្គត់ផ្គង់ទំនិញ​ឲ្យសិង្ហបុរី បន្ទាប់ពីពួកគេជួបបញ្ហាវិបត្តិជំងឺកូវីដ-១៩ និងរងឥទ្ធិពលនៃសង្គ្រាមនៅអ៊ុយក្រែន។

បើតាមលោកបណ្ឌិត ហុង វណ្ណៈ ទំនិញដែលកម្ពុជានាំចេញទៅសិង្ហបុរីភាគច្រើនជាផលិតផលកសិកម្ម ហើយក្រៅពីនេះ ក៏មានផលិតផលវាយនភណ្ឌ ស្បែកជើង គ្រឿងបន្លាស់ម៉ាស៊ីន ផលិតផលធ្វើពីលោហៈ និងរ៉ែជាដើម។ ចំណែកកម្ពុជានាំចូលទំនិញពីសិង្ហបុរី រួមមានគ្រឿងអលង្ការ គ្រឿងអេឡិចត្រូនិក ផលិតផលធ្វើពីក្រដាស ប្លាស្ទិក ផលិតផលខូស្មិចទិក និងសម្ភារៈបន្ទប់ទឹកជាដើម៕