អគ្គនាយកដ្ឋានកសិកម្មបានគូសបញ្ជាក់ថា នៅក្នុងឆ្នាំ២០២៤ ផលិតផលដំណាំសម្រេចរបស់កម្ពុជាមានចំនួន៣៩លានតោនកើនឡើងជាង២,៧លានតោនបើធៀបនឹងឆ្នាំ២០២៣។ នៅក្នុងចំណោមកសិផលទាំងនេះបរិមាណផលស្រូវទទួលបានជាង១៣លានតោនកើនលើសឆ្នាំ២០២៣ ចំនួន១,៤លានតោន។
ឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានគូសបញ្ជាក់ថា ទោះបីជាឆ្នាំ២០២៤ កម្ពុជាបានជួបបញ្ហាប្រឈមនឹងភាពរាំងស្ងួត និងការផ្ទុះនូវការបំផ្លាញដោយសត្វល្អិតក៏ដោយ តែផលិតកម្មដំណាំមានការកើនឡើងទាំងបរិមាណផលិត និងការនាំចេញ បើធៀបទៅនឹង២០២៣។ មន្ត្រីជាន់ខ្ពស់រូបនេះអះអាងថា បញ្ហាសន្តិសុខស្បៀងនៅកម្ពុជាត្រូវបានធានាដោយតម្លៃស្បៀងសំខាន់ៗ ជាពិសេសតម្លៃអង្ករត្រូវបានរក្សាលំនឹងបានល្អ។ បើតាមការគូសបញ្ជាក់របស់ ឯកឧត្តម យ៉ង សាំងកុមារ កិច្ចការអាទិភាពសម្រាប់ឆ្នាំ២០២៥ កម្ពុជានឹងបង្កើនគុណភាពនៃការផលិតសម្រាប់ទីផ្សារ និងកាត់បន្ថយថ្លៃដើមផលិត ដើម្បីបង្កើនប្រាក់ចំណូលជូនកសិករ និងបន្តរក្សាលំនឹងថ្លៃស្បៀងអាហារសំខាន់ៗជូនប្រជាជនគ្រប់រូប៕
អត្ថបទ៖ បូ ដូឡា,រូបភាព ឯកសារ
