រង្វាស់ពាណិជ្ជកម្មទំនិញរបស់អង្គការពាណិជ្ជកម្មពិភពលោកបានកើនដល់១០២ពិន្ទុនៅខែកក្កដា បើធៀបនឹងជិត១០២ពិន្ទុក្នុងខែមិថុនា។ កម្រិតលើស១០០ពិន្ទុបង្ហាញថា ពាណិជ្ជកម្មកំពុងដំណើរការល្អជាងនិន្នាការរយៈពេលវែង។ ក្នុងចំណោមកត្តាសំខាន់ៗ គ្រឿងបន្លាស់អេឡិចត្រូនិកមានសន្ទុះខ្លាំងជាងគេដោយឈានដល់ជិត១០៥ពិន្ទុ។ នេះឆ្លុះបញ្ចាំងពីការកើនឡើងកាន់តែខ្លាំងនូវតម្រូវការផលិតផលដែលប្រើប្រាស់ក្នុងការអភិវឌ្ឍបច្ចេកវិទ្យា AI។ ការបញ្ជាទិញក៏បានកើនឡើងដល់ជាង១០៣ពិន្ទុដែរ ដែលនេះបង្ហាញថា ពាណិជ្ជកម្មអាចបន្តមានសម្ទុះនៅប៉ុន្មានខែខាងមុខ។
ការដឹកជញ្ជូនតាមផ្លូវអាកាសទទួលបានជិត១០៣ពិន្ទុ វត្ថុធាតុដើមកសិកម្មទទួលបានជាង១០២ពិន្ទុ និងផលិតផលរថយន្តទទួលបានជាង១០១ពិន្ទុ។ ចំណែកឯការដឹកជញ្ជូនតាមកុងតឺន័រទទួលបានជិត១០០ពិន្ទុ និងជាវិស័យសំខាន់តែមួយគត់ដែលស្ថិតក្រោមកម្រិតនិន្នាការ។
WTO បានព្យាករថា ការដោះដូរពាណិជ្ជកម្មពិភពលោកនឹងសម្រេចបានកំណើនជិត២% ក្នុងឆ្នាំ២០២៦ ប៉ុន្តែអាចនឹងថយមកនៅត្រឹម១,៤% ប្រសិនបើតម្លៃថាមពលនៅតែខ្ពស់ដោយសារជម្លោះនៅតំបន់មជ្ឈិមបូព៌ា។ WTO ក៏ព្យាករដែរថា ការវិនិយោគលើបច្ចេកវិទ្យា AI ដែលបន្តកើនឡើង អាចនឹងធ្វើឱ្យកំណើនពាណិជ្ជកម្មទំនិញពិភពលោកកើនឡើង០,៥%បន្ថែមទៀត។
ទោះជាយ៉ាងណាផលប៉ះពាល់ពេញទំហឹងពីការរាំងស្ទះការដឹកជញ្ជូនតាមច្រកសមុទ្រ Hormuz នៅមិនទាន់បង្ហាញច្បាស់នៅឡើយ ហើយនឹងត្រូវបានឆ្លុះបញ្ចាំងបន្ថែមនៅក្នុងទិន្នន័យពាណិជ្ជកម្មនាពេលខាងមុខ៕
ដោយ: តែម សុខុម
