ឯកឧត្តម ផន រឹម អ្នកនាំពាក្យ ក្រសួងសាធារណការនិងដឹកជញ្ជូន បានប្រាប់ខេមបូណូមីសថា មកទល់ពេលនេះ ក្រសួងបានបញ្ចប់ការសិក្សាសមិទ្ធិលទ្ធភាពរួចរាល់ហើយ ហើយក៏បានបញ្ចប់ការរៀបចំ ការស្នើសុំសំណើ(RFP) សម្រាប់ជ្រើសរើសទីប្រឹក្សាបច្ចេកទេសរួចផងដែរ។ ទន្ទឹមនេះ យោងតាមកាលវិភាគបណ្តោះអាសន្ន ក្រសួងនឹងអញ្ជើញក្រុមហ៊ុនទីប្រឹក្សាបច្ចេកទេស ដែលបានជាប់ក្នុងដំណាក់កាលជ្រើសរើសបឋម ដាក់ពាក្យ នៅសប្តាហ៍ទី១ ក្នុងខែមេសា ឆ្នាំ២០២៤។
បើតាមអ្នកនាំពាក្យរូបនេះ គម្រោងសាងសង់ស្ពានមិត្តភាពកម្ពុជា-កូរ៉េ អាចនឹងបើកការដ្ឋានសាងសង់ក្នុងត្រីមាសទី៣ ឆ្នាំ២០២៥។ ក្រោយពេលសាងសង់រួច ស្ពាននេះនឹងជួយជំរុញកំណើនសេដ្ឋកិច្ចក្នុងតំបន់ខាងកើតទន្លេមេគង្គ និងដើរតួនាទីយ៉ាងសំខាន់ក្នុងការធ្វើឱ្យប្រសើរឡើងនូវលំហូរ Logistics ពីភ្នំពេញទៅកាន់ផ្លូវជាតិលេខ ១, ២, ៣, ៤, ៥, ៦ និងលេខ ២១ តាមរយៈតំណភ្ជាប់ពីភ្នំពេញ ទៅកាន់ផ្លូវក្រវាត់ក្រុងទី៣ ដែលឆ្លើយតប នឹងផែនការយុទ្ធសាស្ត្រអភិវឌ្ឍន៍ជាតិ ២០១៩-២០២៣ ក្នុងការពង្រឹងវិស័យសេវាសាធារណៈ សម្រាប់ការកែលម្អបរិយាកាសវិនិយោគទាក់ទងនឹងប្រសិទ្ធភាពគោលដៅ។
គួរបញ្ជាក់ដែរថា គម្រោងស្ពានមិត្តភាពកម្ពុជា-កូរ៉េ នឹងសាងសង់ចេញពីម្តុំផ្សារចាស់ឆ្លងកាត់ទន្លេសាបឆ្ពោះទៅជ្រោយចង្វារ ហើយបន្តទៅអរិយក្សត្រដោយឆ្លងកាត់ទន្លេមេគង្គ។ គម្រោងនេះ គ្រោងចំណាយថវិកាប្រមាណ២៤៦លានដុល្លារ ដែលជាកម្ចីហិរញ្ញប្បទានរបស់សាធាររណរដ្ឋកូរ៉េ ដែលបានចុះហត្ថលេខាផ្តល់ និងទទួលកាលពីថ្ងៃទី៩ ខែធ្នូ ឆ្នាំ២០២២ ក្រោមអធិបតីភាពរបស់សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា៕
អត្ថបទ៖ បូ ដូឡា
