បញ្ហាវិវាទនៅបុរី ម៉ន ដានី ទទួលបានគោលការណ៍ដោះស្រាយពីក្រសួងសេដ្ឋកិច្ចហើយ

ការផ្តល់គោលការណ៍ដោះស្រាយបញ្ហាវិវាទនេះធ្វើឡើងក្រោយតុលាការរាជធានីភ្នំពេញចេញដីកាបង្គាប់ឱ្យអាជ្ញាធរចាប់ខ្លួនលោកស្រី ម៉ន ដានី ដែលជាម្ចាស់បុរី ពាក់ព័ន្ធនឹងការមិនបំពេញកាតព្វកិច្ចចំពោះឧបករណ៍អាចជួញដូរបានកាលពីពេលកន្លងទៅ។

ឯកឧត្តម ជូ វណ្ណៈ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករអាជីវកម្មអចលនវត្ថុ និងបញ្ចាំ បានបញ្ជាក់ប្រាប់ខេមបូណូមីសថា ឯកឧត្តមឧបនាយករដ្ឋមន្រ្តី អូន ព័ន្ធមុនីរ័ត្ន រដ្ឋមន្រ្តី ក្រសួងសេដ្ឋកិច្ច និងហិរញ្ញវត្ថុបានណែនាំឱ្យនិយ័តករអចលនវត្ថុ និងបញ្ចាំរៀបចំយន្តការដោះស្រាយបញ្ហាវិវាទរវាងអតិថិជនជាមួយម្ចាស់បុរី ម៉ន ដានី ដែលបានអូសបន្លាយអស់រយៈពេលពេលជាច្រើនខែកន្លងមកនេះ។ ក្រោយទទួលបានគោលការណ៍អនុញ្ញាតនេះ ជាកិច្ចការបន្ទាប់ និយ័តករនេះ នឹងចូលរួមសហការជាមួយក្រសួងរៀបចំដែនដីដើម្បីជួយដោះស្រាយបញ្ហាវិវាទនេះ ដោយគ្រោងអនុវត្តដូចទៅនឹងអ្វីដែលក្រសួងរៀបចំដែនដីកំពុងអនុវត្តដោះស្រាយវិវាទរបស់អតិថិជនជាមួយម្ចាស់បុរី VIP។

បើតាមឯកឧត្តម ជូ វណ្ណៈ យន្តការដែលក្រសួងរៀបចំដែនដី កំពុងអវត្តដោះស្រាយបញ្ហានៅបុរី VIP គឺតម្រូវឱ្យម្ចាស់គម្រោងបង់ប្រាក់ឱ្យម្ចាស់ដី បន្ទាប់មកម្ចាស់ដីត្រូវកាត់ដីទៅតាមទំហំទឹកប្រាក់ដែលម្ចាស់គម្រោងបានបង់ រួចបំបែកជាប្លង់តូចៗប្រគល់ជូនអតិថិជនដែលបានបង់ប្រាក់គ្រប់ជូនម្ចាស់គម្រោង។ ប៉ុន្តែករណីនៅបុរី ម៉ន ដានី អាចនឹងមានលក្ខណៈខុសប្លែកតិចតួចពីគម្រោងរបស់បុរី VIP។

សូមបញ្ជាក់ថា ក្រៅពីមានបញ្ហាជាមួយម្ចាស់ដីដែលខ្លួនបានទិញដើម្បីសាងសង់បុរី លោកស្រី ម៉ន ដានី ក៏មានបញ្ហាជាមួយអតិថិជន និងរងបណ្ដឹងរក្សាការពារផងដែរ។ តុលាការបានចេញដីកាឱ្យចាប់ខ្លួនលោកស្រី ម៉ន ដានី ម្ចាស់បុរី ម៉ន ដានី ពាក់ព័ន្ធនឹងការមិនបំពេញកាតព្វកិច្ចចំពោះឧបករណ៍អាចជួញដូរបាន ឬចេញសែកគ្មានសាច់ប្រាក់ជាង៦០ម៉ឺនដុល្លារកាលពីថ្ងៃទី៣០ ខែមេសា ឆ្នាំ២០២៣។ ក្នុងដីកាបញ្ជានេះ បានបង្គាប់ឱ្យភ្នាក់ងារនៃកងកម្លាំងសាធារណៈស្វែងរកចាប់ខ្លួនតាំងពីថ្ងៃទី១០ ខែមករា ឆ្នាំ២០២៤ មកម្ល៉េះ៕

អត្ថបទ៖ បូ ដូឡា​