លោកស្រី ជ័យ សុគន្ធា នាយិកាទីផ្សារនៃកំពង់ផែស្វយ័តក្រុងព្រះសីហនុ បានថ្លែងក្នុងវេទិកាក្រុមហ៊ុនចុះបញ្ជី រៀបចំដោយ ក្រុមហ៊ុនផ្សារមូលបត្រកម្ពុជា ឲ្យបានដឹងថា ដោយសារភាពរីកចម្រើននៃ សេដ្ឋកិច្ចជាតិ គួបផ្សំនឹង ការធ្វើសមាហរណកម្មសេដ្ឋកិច្ចទៅក្នុង ខ្សែសង្វាក់ផ្គត់ផ្គង់សកល បានធ្វើឲ្យចរាចរណ៍នៃការដឹកជញ្ជូនទំនិញ កាន់តែមមាញឹក ដែលទាមទារឲ្យ កំពង់ផែនៅកម្ពុជា ត្រូវការពង្រីកសមត្ថភាព ដើម្បីទទួលនាវាធំៗ ដោយប្រើប្រាស់កំពង់ផែទឹកជ្រៅ។
យ៉ាងណាមិញ បញ្ហាប្រឈមមួយចំនួនទៀត គឺកង្វះដើមទុនដែលចំាបាច់ត្រូវចំណាយច្រើន ដើម្បីពង្រឹងសមត្ថភាព ហើយនឹងកង្វះខាតបច្ចេកវិទ្យា សម្រាប់ប្រើប្រាស់ទៅលើ ប្រតិបត្តិការទាំងអស់ក្នុងកំពង់ផែ។ ទោះបីជាយ៉ាងណា កំពង់ផែស្វយ័តក្រុងព្រះសីហនុ រំពឹងទទួលបានកុងតឺន័រឆ្លងកាត់ប្រមាណ ៦០ម៉ឺនទូ TEUs ក្នុងឆ្នាំ ២០១៩នេះ ដែលកើនឡើង ១៨% ធៀបនឹងពីឆ្នាំមុន។
អត្ថបទទាក់ទង!
ដោយឡែក លោកស្រី ហ៊ឺ ផានិន អគ្គនាយករងអាជីវកម្ម និងប្រតិបត្តិការផែនៃកំពង់ផែស្វយ័តភ្នំពេញ បានគូសបញ្ជាក់ស្រដៀងគ្នាដែរថា ដោយសារតែចរាចរណ៍នៃការដឹកជញ្ជូនទំនិញកាន់តែមមាញឹក បានធ្វើឲ្យ សមត្ថភាពរបស់ កំពង់ផែស្វយ័តភ្នំពេញ ឈានដល់កម្រិតអតិបរមា ដែលប្រើប្រាស់អស់ពីលទ្ធភាពប្រមាណ ៣សែនទូ TEUs សម្រាប់ដំណាក់កាលទី ១ និងទី ២។
តួយ៉ាងក្នុងរយៈពេល ១១ខែ ដើមឆ្នាំ ២០១៩នេះកំពង់ផែស្វយ័តភ្នំពេញ ទទួលបានកុងតឺន័រឆ្លងកាត់ប្រមាណ ២៥ម៉ឺនទូ TEUs ដែលកើនឡើង ៣០% ធៀបនឹងរយៈពេលដូចគ្នា កាលពីឆ្នាំមុន ដូច្នេះហើយ ក្រុមហ៊ុននឹងធ្វើការអភិវឌ្ឍគម្រោងអភិវឌ្ឍន៍ដំណាក់កាលទី ៣ ដែលនឹងបន្ថែមសមត្ថភាពទទួលកុងតឺន័រឆ្លងកាត់៣សែនទូ TEUs ចាប់ផ្តើមសាងសង់នៅដើមឆ្នាំ ២០២០ខាងមុខ។
គួរជម្រាបដែរថា កំពង់ផែស្វយ័តភ្នំពេញ ក៏មានគម្រោងសាងសង់ ផែស្ងួត នៅតាមបណ្តោយផ្លូវក្រវាត់ក្រុងទី ៣ និងគម្រោងបង្កើតតំបន់សេដ្ឋកិច្ចពិសេស និងមជ្ឈមណ្ឌលភ័ស្តុភារ ដើម្បីពង្រឹងសមត្ថភាពប្រកួតប្រជែងឲ្យកាន់តែរឹងមាំ៕
None
