ឯកឧត្តម ស៊ាង ថៃ រដ្ឋលេខាធិការ និងជាអ្នកនាំពាក្យក្រសួងពាណិជ្ជកម្មបានគូសបញ្ជាក់ថា ការឆ្លងរាតត្បាតនៃជំងឺកូវីដ-១៩ក្នុងព្រឹត្តិការណ៍សហគមន៍២០កុម្ភៈដែលបានអូសបន្លាយជាង៣ខែកន្លងមកនេះមិនបានរារាំងអ្វីជាធំដុំ ដល់ដំណើរនៃការរៀបចំបង្កើតកិច្ចព្រមព្រៀងពាណិជ្ជកម្មសេរីរវាងកម្ពុជាកូរ៉េនោះទេ។ ប៉ុន្តែ វាគ្រាន់តែបានបង្កឲ្យមានភាពយឺតយ៉ាងជាងផែនការ ចំពោះការចុះហត្ថលេខាលើកិច្ចព្រមព្រៀងនេះតែប៉ុណ្ណោះ ខណៈដែលកន្លងមកខាងក្រសួងពាណិជ្ជកម្មធ្លាប់បានលើកឡើងថា ភាគីកម្ពុជា និងកូរ៉េខាងត្បូងគ្រោងនឹងចុះហត្ថលេខាលើកិច្ចព្រមព្រៀងពាណិជ្ជកម្មសេរីនេះ នៅពាក់កណ្ដាលឆ្នាំ២០២១នេះ។
ទោះជាបែបនេះក្ដី បើតាមឯកឧត្តម ស៊ាង ថៃ ក្រសួងពាណិជ្ជកម្មនៅតែកំពុងបន្ដរៀបចំនីតិវិធីផ្ទៃក្នុង ដើម្បីស្នើសុំសិទ្ធិពីប្រមុខរាជរដ្ឋាភិបាលកម្ពុជាក្នុងការអនុញ្ញាតឲ្យឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មចុះហត្ថលេខាធិការលើកិច្ចព្រមព្រៀងខាងលើ រួមជាមួយនឹងភាគីកូរ៉េខាងត្បូង។
អត្ថបទទាក់ទង!
ឯកឧត្តម ស៊ាង ថៃ បានបញ្ជាក់យ៉ាងដូច្នេះថា៖«ភាគីទាំងពីរ នឹងរកពេលវេលាសមស្រប ដើម្បីចុះហត្ថលេខាលើកិច្ចព្រមព្រៀងនោះ។ ជាការពិត ការរាតត្បាតនៃជំងឺកូវីដ-១៩ បានបង្កផលប៉ះពាល់ខ្លះដែរ តែមិនអាចរារាំងដំណើរការនៃការចរចាបង្កើតកិច្ចព្រមព្រៀងពាណិជ្ជកម្មសេរីកម្ពុជាកូរ៉េបានទេ គ្រាន់តែយឺតជាងផែនការបន្តិច»។
កិច្ចព្រមព្រៀងពាណិជ្ជកម្មសេរីកម្ពុជា-កូរ៉េ បានចាប់ផ្តើមបើកកិច្ចចរចាកាលពីថ្ងៃទី៩ ខែកក្កដា ឆ្នាំ២០២០ បន្ទាប់មកនៅថ្ងៃទី៣ កុម្ភៈ ឆ្នាំ២០២១ភាគីទាំងពីរបានសម្រេចចុះហត្ថលេខាបិទបញ្ចប់កិច្ចចរចាលើកិច្ចព្រមព្រៀងពាណិជ្ជកម្មសេរីកម្ពុជា-កូរ៉េជាផ្លូវការ ក្រោមវត្តមានឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងលោកស្រី Yoo Myung-hee រដ្ឋមន្ត្រីក្រសួងពាណីជ្ជកម្មកូរ៉េខាងត្បូង នៅក្នុងកិច្ចប្រជុំ ដែលធ្វើឡើងតាមវីដេអូអនឡាញ។
របាយការណ៍ពីក្រសួងពាណិជ្ជកម្មបង្ហាញថា ទំហំពាណិជ្ជកម្មរវាងកម្ពុជា និងកូរ៉េខាងត្បូងនៅ៤ខែ ឆ្នាំ២០២១ សម្រេចបានជាង២៣២លានដុល្លារ ធ្លាក់ចុះជាង៧% ក្នុងនោះ ការនាំចេញរបស់កម្ពុជាទៅកូរ៉េមានជាង៦៣លានដុល្លារ ធ្លាក់ចុះជាង៣% ខណៈដែលកូរ៉េនាំចូលមកកម្ពុជាវិញមានប្រមាណ ១៧០លានដុល្លារ ធ្លាក់ចុះប្រមាណ៩%៕
None
