កម្ពុជាកំពុងពន្លឿនការសិក្សាគម្រោងផ្លូវរថភ្លើងក្រោមដីនៅភ្នំពេញ និងគម្រោងផ្លូវរថភ្លើងមួយចំនួនទៀត

ឯកឧត្តម ផន រឹម អ្នកនាំពាក្យក្រសួងសាធារណៈការ និងដឹកជញ្ជូន បានគូសបញ្ជាក់ថា គម្រោងផ្លូវរថភ្លើងធុនស្រាលតភ្ជាប់ពីរាជធានីភ្នំពេញ ទៅព្រលានយន្តហោះអន្តរជាតិ តេជោ និងផ្លូវរថភ្លើងក្រោមដីនៅរាជធានីភ្នំពេញ បាននិងកំពុងដាក់ឱ្យក្រុមហ៊ុនវិនិយោគសិក្សាពីសមិទ្ធិលទ្ធភាព ដើម្បីអាចឈានទៅរកការបើកដំណើរការសាងសង់នៅពេលខាងមុខ។ ជាក់ស្តែងគម្រោងទាំងពីរនេះ ត្រូវបានក្រុមហ៊ុន China Metro Group និងក្រុមហ៊ុន Guangzhou Metro Group ធ្វើបទបង្ហាញជូនគណៈកម្មការអន្តរក្រសួង ដើម្បីពិនិត្យស្នើសុំធាតុចូលបន្ថែមកាលពីពេលថ្មីៗនេះ។ តែយ៉ាងណា ចំពោះទំហំថវិការដើម្បីសាងសង់ និងរយៈពេលសិក្សាលើគម្រោងនេះ នៅមិនមិនទាន់អាចកំណត់បាននៅឡើយនោះទេ។ នេះបើតាមការបញ្ជាក់របស់ឯកឧត្តម ផន រឹម។

យ៉ាងណាមិញ សម្រាប់វឌ្ឍនភាពនៃការសិក្សា និងកិច្ចខិតខំប្រឹងរបស់រាជរដ្ឋាភិបាល និងក្រុមហ៊ុនវិនិយោគទៅលើគម្រោងសាងសង់ផ្លូវរថភ្លើងធុនស្រាលពីអាកាសយានដ្ឋានអន្តរជាតិ សៀមរាបអង្គរ ទៅក្រុងសៀមរាបវិញ ឯកឧត្តម ផន រឹម បានឱ្យដឹងថា គម្រោងនេះក៏កំពុងមានដំណើរឆ្ពោះទៅមុខជាបន្តបន្ទាប់ផងដែរ។ បើតាមអ្នកនាំពាក្យរូបនេះ ជាទស្សនវិស័យរបស់រាជរដ្ឋាភិបាល ការសាងសង់ផ្លូវរថភ្លើងធុនស្រាលទាំងនេះ គឺដើម្បីសម្រួលដល់ការធ្វើដំណើររបស់ប្រជាពលរដ្ឋ និងភ្ញៀវទេសចរ ដែលធ្វើដំណើរក្នុងទីក្រុង ក៏ដូចជាតំបន់ទីប្រជុំជន ទៅកាន់ប្រលានយន្តហោះឱ្យកាន់តែងាយស្រួលបន្ថែមទៀត​។

គួរជម្រាបដែរថា គម្រោងផ្លូវរថភ្លើងធុនស្រាល តភ្ជាប់ពីរាជធានីភ្នំពេញ ទៅព្រលានយន្តហោះថ្មី និងផ្លូវរថភ្លើងក្រោមដីនៅរាជធានីភ្នំពេញ ក៏ដូចជាគម្រោងសាងសង់ផ្លូវរថភ្លើងធុនស្រាលពីអាកាសយានដ្ឋានអន្តរជាតិសៀមរាបអង្គរ ទៅក្រុងសៀមរាប គឺផ្ដោតសំខាន់តែលើការដឹកជញ្ជូនអ្នកដំណើរតែប៉ុណ្ណោះ៕