ការជួបចរចារនេះ ធ្វើឡើងក្រោយវៀតណាមបាត់ភាពជាសមាជិកក្នុងកិច្ចព្រមព្រៀងវិធានប្រភពដើមទំនិញរួមគ្នាជាមួយកម្ពុជា និងប្រទេសសមាជិកអាស៊ានមួយចំនួនទៀត បន្ទាប់ពីប្រទេសនេះបានចុះហត្ថលេខា និងដាក់ឲ្យចូលជាធរមាននូវកិច្ចព្រមព្រៀងពាណិជ្ជកម្មសេរីរវាងសហភាពអឺរ៉ុប និងវៀតណាម។
បើតាមការអះអាងរបស់មន្ត្រីជាន់ខ្ពស់ក្រសួងពាណិជ្ជកម្មកម្ពុជា គោលបំណងនៃកិច្ចពិភាក្សារវាងភាក្រសួងពាណិជកម្មកម្ពុជា និងភាគីវៀតណាមនេះ គឺកម្ពុជាកំពុងបញ្ចុះបញ្ចូលឲ្យវៀតណាមបន្តផ្គត់ផ្គង់វត្ថុធាតុដើមមួយចំនួន ក្នុងការផលិតកង់នៅកម្ពុជា ដើម្បីនាំចេញទៅទីផ្សារអឺរ៉ុប និងសហរដ្ឋអាមេរិក។
ឯកឧត្តម សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មបានជួបពិភាក្សាជាមួយឯកឧត្តម ត្រឹង វឹកខាន់ អនុរដ្ឋមន្ត្រីក្រសួងឧស្សាហកម្ម និងពាណិជ្ជកម្មវៀតណាម ថ្មីៗនេះ ដោយផ្ដោតលើការពិភាក្សាជុំវិញបញ្ហាការបន្តតភ្ជាប់ខ្សែច្រវាក់ឧស្សាហកម្មរវាងប្រទេសទាំងពីរ។ នៅក្នុងជំនួបនោះ ដែរ បើតាមការគូសបញ្ជាក់របស់ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្ម គឺគោលបំណង ភាគីកម្ពុជាគឺខិតធ្វើយ៉ាងណា ដើម្បីរិះរកវិធីជំរុញឲ្យប្រទេសវៀតណាម អាចបន្តផ្គត់ផ្គង់វត្ថុធាតុដើមសម្រាប់ក្នុងការផលិតកង់នៅកម្ពុជា សម្រាប់នាំចេញទៅកាន់ទីផ្សារអឺរ៉ុប និងសហរដ្ឋអាមេរិក។
ឯកឧត្តមបានបន្តថា ការជួបចរចាជាមួយភាគីវៀតណាមនេះ គឺបន្ទាប់ពីវៀតណាមបានបាត់បង់ភាពជាសមាជិកនៃវិធានវត្ថុធាតុដើមទំនិញរួមគ្នា ដែលមានកម្ពុជានិងប្រទេសសមាជិកអាស៊ានមួយចំនួនទៀត ក្រោយពេលដែលវៀតណាមបានចុះហត្ថលេខា និងដាក់ឲ្យចូលជាធរមាននូវកិច្ចព្រមព្រៀងពាណិជ្ជកម្មសេរីវៀតណាម-សហភាពអឺរ៉ុបកាលពីពេលថ្មីៗ។ ឯកឧត្តម ប៉ែន សុវិជាតិ បានពន្យល់ថា វិធានវត្ថុធាតុដើមទំនិញរួមគ្នានេះ គឺជាយន្តការមួយ ដែលអនុញ្ញាតឲ្យប្រទេសជាសមាជិកអាចនាំចូលវត្ថុធាតុដើមពីប្រទេសសមាជិកផ្សេងៗដើម្បីផលិតផលិតផលអ្វីមួយសម្រាប់នាំចេញទៅកាន់ទីផ្សារអឺរ៉ុប និងសហរដ្ឋអាមេរិក ហើយវិធានការនេះត្រូវបានផ្តល់ដោយសហភាពអឺរ៉ុប។
អត្ថបទគួរអាន
អ្នកនាំពាក្យរូបនេះអះអាងថា ប្រសិនបើកម្ពុជាមិនបន្តភ្ជាប់ខ្សែចង្វាក់ឧស្សាហកម្មជាមួយវៀតណាមទេនោះ កម្ពុជាអាចនឹងជួបបញ្ហាប្រឈមក្នុងការផលិតកង់ និងផលិតផលផ្សេងៗមួយចំនួនទៀត ខណៈដែលក្នុងមួយឆ្នាំៗកម្ពុជាបាននាំចូលវត្ថុធាតុពីវៀតណាមសម្រាប់ផលិតកង់ សម្លៀកបំពាក់ និងស្បែងជើងជាដើមមានតម្លៃរាប់រយលានដុល្លារអាមេរិកឯណោះ។
បើតាមការគូសបញ្ជាក់របស់ឯកឧត្តម សុខ សុភ័ក្ត្រ រដ្ឋលេខាធិការក្រសួងពាណិជ្ជកម្ម ភាគីកម្ពុជា និងវៀតណាមបានយល់ស្របគ្នា ក្នុងការរក្សាឱ្យបាននូវនិរន្តរភាពនៃខ្សែចង្វាក់តម្លៃរវាងឧស្សាហកម្មរវាងប្រទេសទាំងពីរ ដែលជាកិច្ចការដ៏ចាំបាច់និងសំខាន់បំផុត ដើម្បីរក្សាបាននូវការវិនិយោគផលិតកង់នៅកម្ពុជា សម្រាប់នាំចេញទៅកាន់ទីផ្សារអឺរ៉ុប និងអង់គ្លេស ដែលមានការនាំចូលគ្រឿងបន្លាស់មួយចំនួនដែលផលិតនៅវៀតណាម មករួមបញ្ចូលក្នុងផលិតកម្មនៅកម្ពុជា។ ឯកឧត្តមបន្តថា ការរួមគ្នាបន្តខ្សែចង្វាក់តម្លៃនេះ នឹងផ្តល់ផលចំណេញដល់ការរីកចម្រើននៃឧស្សាហកម្មនៃប្រទេសទាំងពីរ និងជំរុញឱ្យមានការតភ្ជាប់ខ្សែចង្វាក់តម្លៃក្នុងតំបន់អាស៊ានផងដែរ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
