មន្ត្រីជាន់ខ្ពស់ក្រសួងទេសចរណ៍អះអាងទៀតថា ខាងក្រសួងបាននិងកំពុងយកចិត្តទុកដាក់យ៉ាងខ្លាំង និងខិតខំស្វែងរកដំណោះស្រាយសមស្របនានាដើម្បីទប់ទល់នឹងបញ្ហាដែលកំពុងកើតឡើងនាពេលថ្មីៗនេះ។
លោក ជុក ជំនោរមន្ត្រីនាំពាក្យក្រសួងទេសចរណ៍បានឲ្យដឹងថា ក្រសួងនៅតែមានសុទិដ្ឋិនិយម និងសង្ឃឹមថា នឹងអាចសម្រេចគោលដៅក្នុងការទាក់ទាញភ្ញៀវទេសចរអន្តរជាតិឲ្យបានជាង៧លាននាក់នៅឆ្នាំ២០២០នេះ ទោះបីជាពេលនេះ វិស័យទេសចរណ៍ពិភពលោកកំពុងត្រូវបានវាយប្រហារដោយជំងឺរលាកផ្លូវដង្ហើមថ្មីកូរ៉ូណាវីរុសក៏ដោយ។ លោក ជុក ជំនោរថា គេនៅពេលវេលាវែងឆ្ងាយទៀតសម្រាប់ឆ្នាំ២០២០នេះ ដែលក្រសួងទេសចរណ៍បាននិងកំពុងបង្កើតនូវយុទ្ធសាស្ត្រថ្មីៗ ដោយមានការសហការជាមួយនឹងវិស័យឯកជន ដើម្បីទាក់ទាញភ្ញៀវទេសចរមកពីប្រទេសដទៃទៀត មិនមែនតែភ្ញៀវចិននោះទេ។
ឯកឧត្តម ថោង ខុន រដ្ឋមន្ត្រី ក្រសួងទេសចរណ៍ ចុះត្រួតពិនិត្យនៅអាកាសយានដ្ឋានខេត្តសៀមរាប (រូបភាព៖ ក្រសួងទេសចរណ៍)
(ខេមបូណូមីស)
យ៉ាងណាក៏ដោយចុះ មន្ត្រីនាំពាក្យក្រសួងទេសចរណ៍បានអះអាងថា ចង់មិនចង់វិស័យទេសចរណ៍ពិភពលោកអាចនឹងត្រូវជួបប្រទះនឹងបញ្ហា ដោយសារតែការផ្ទុះឡើងនៃជំងឺកូរ៉ូណាវីរុសក្នុងប្រទេសចិននេះ ព្រោះថាចិន គឺជាប្រភពនៃភ្ញៀវទេសចរដ៏សំខាន់របស់ពិភពលោក។
ជាមួយគ្នានេះដែរ ក្រោយពីបាន ចុះត្រួតពិនិត្យដោយផ្ទាល់នៅអាកាសយានដ្ឋានអន្តរជាតិសៀមរាប កាលពីថ្ងៃទី២៦ ខែមករានេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍បានឲ្យដឹងថា ចំនួនភ្ញៀវទេសចរពិតជាមានការថយចុះ ជាងប៉ុន្មានថ្ងៃមុន ដែលមិនទាន់មានការផ្ទុះឡើងនូវជំងឺកូរ៉ូណាវីរុស នៅប្រទេសចិន ដោយសារតែចិន បានហាមឃាត់ប្រជាជនខ្លួននៅទីក្រុងអ៊ូហាន់ មិនឲ្យធ្វើដំណើរចេញទៅក្រៅប្រទេស។
អត្ថបទគួរអាន!
ឯកឧត្តម ថោង ខុន បានកត់សម្គាល់ទៀតថា ប្រសិនបើជំងឺនេះ នៅតែរីករាលដាល ភ្ញៀវទេសចរអន្តរជាតិ នឹងកាត់បន្ថយការចេញទស្សនានៅក្រៅប្រទេសរបស់ខ្លួនផងដែរ។
រដ្ឋមន្ត្រីក្រសួងទេសចរណ៍ បានគូសបញ្ជាក់ថា ការជំរុញចលនាទេសចរណ៍ក្នុងប្រទេសនេះ គឺជាវិធានការមួយដ៏សំខាន់ដែលអង្គការទេសចរណ៍ពិភពលោកទទួលស្គាល់ ក្នុងពេលដែលវិស័យទេសចរណ៍ត្រូវទទួលរងនូវផលប៉ពាល់ពីជំងឺឆ្លង ឬវិបត្តិសេដ្ឋកិច្ចសកល។ ការធ្វើដំណើរបស់ទេសចរក្នុងស្រុក នឹងចូលរួមចំណែកទ្រទ្រង់យ៉ាងសំខាន់ ដល់មូលដ្ឋានអាជីវកម្មទេសចរណ៍ នៅពេលដែលការធ្វើដំណើររបស់ទេសចរអន្តរជាតិមានការធ្លាក់ចុះ។
បើតាមការគូសបញ្ជាក់ពីក្រសួងទេសចរណ៍ ក្នុងកាលៈទេសៈមានវិបត្តិដូចនេះ មូលដ្ឋានអាជីវកម្មទេសចរណ៍ ត្រូវការត្រឹមតែចំណូល ដើម្បីទូទាត់ថ្លៃអគ្គិសនី ទឹក និងប្រាក់ខែបុគ្គលិកមួយចំណេកប៉ុណ្ណោះ។ ដូចនេះផ្នែកឯកជនផ្ទាល់ត្រូវចាត់ការកែសម្រួលការគ្រប់គ្រងអាជីវកម្ម ដោយរស់រវើកតាមសភាពការណ៍ ចូលរួមកាត់បន្ថយកញ្ចប់ទស្សនកិច្ច កាត់បន្ថយថ្លៃចំណេញ ចូលរួមបង្កើតព្រឹត្តិការណ៍ទេសចរណ៍នានា ជាមួយរដ្ឋបាលមូលដ្ឋានជាដើម។
សូមបញ្ជាក់ថា គិតមកទល់ពេលនេះ ករណីផ្ទុះឡើងនៃវីរុស កូរ៉ូណា ដែលជាប្រភេទជំងឺរលាកផ្លូវដង្ហើមនោះ គឺមានរយៈពេលជិត ១ខែមកហើយ ហើយក៏បានសម្លាប់ជីវិតមនុស្សជាច្រើននាក់ផងដែរ។ ស្ដែង នៅប្រទេសចិនចំនួនអ្នកស្លាប់ដោយវីរុសកូរ៉ូណានេះ បានកើនឡើងដល់ ៨០នាក់ហើយ ក្នុងចំណោមករណីដែលបានកើនឡើង ជាង២.៧០០ ករណី។ ទោះយ៉ាងណា ករណីកូរ៉ូណាវីរុសនេះ មិនទាន់មានកើតឡើងនៅកម្ពុជានៅឡើយទេ ប៉ុន្ដែ ប្រទេសជិតខាងរបស់កម្ពុជា ដូចជា វៀតណាម និងថៃ ត្រូវបានរាយការណ៍ថា មានការករណីឆ្លងជំងឺកូរ៉ូណាវីរុសនេះរួចហើយ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
