លោក សែ ឈុនទ្រី ប្រធានច្រកទ្វារព្រំដែនអន្តរជាតិជ្រៃធំ នៅខេត្តកណ្តាល បានប្រាប់សារព័ត៌មាន ខេមបូណូមីសតាមប្រព័ន្ធតេឡក្រាមថា នៅច្រកព្រំដែនកម្ពុជាវៀតណាម (ជ្រៃធំ-ឡុងបិញ) ដូចមិនទាន់ឃើញមានការដាក់ពង្រាយកងកម្លាំងយោធារបស់វៀតណាម ដូចនៅច្រកព្រំដែននៅខេត្តផ្សេងៗនោះទេ ហើយទំនិញចេញចូលជាធម្មតា គ្រាន់តែថា មានការរឹតបន្តឹងតិចតួចលើបញ្ហាកូវីដ-១៩ខ្លះប៉ុណ្ណោះ។ តែអ្វីដែលបញ្ហានោះ គឺមានអាជីវករភាគច្រើនលើកឡើងថា នៅមានបញ្ហាប្រឈមមួយចំនួន ទាក់ទងនឹងការដឹកជញ្ជូនទៅកាន់រាជធានីភ្នំពេញ ដូច្នេះត្រូវកាត់បន្ថយការនាំចូល និងខ្លះទៀតថា គ្មានម៉ូយកម្ម៉ង់ ព្រោះផ្សារជាច្រើនត្រូវបិទជាដើម។
ក្រោយរាជរដ្ឋាភិបាលសម្រេចបិទបញ្ចប់ការបិទខ្ទប់រាជធានីភ្នំពេញ និងក្រុងតាខ្មៅហើយ លោក សែ ឈុនទ្រី បានរំពឹងថា ការនាំចូលនាំចូលទំនិញអាចនឹងមានការកើនឡើង ជាងកាលពីនៅអំឡុងបិទខ្ទប់ ព្រោះថា ថ្វីត្បិតតែនៅមានបែងចែកតំបន់ក្រហម លឿងទុំ និងលឿងក៏ពិតមែន តែយ៉ាងហោចណាស់ ការដឹកជញ្ជូនទំនិញ ជាពិសេសបន្លែផ្សេងៗឆ្លងកាត់រាជធានីភ្នំពេញក៏ងាយស្រួលជាងមុនដែរ។
អត្ថបទទាក់ទង!
តាមការរាយការណ៍របស់សារព័ត៌មាន VN Express កាលពីថ្ងៃចន្ទសប្ដាហ៍នេះ បានឲ្យដឹងថា នៅថ្ងៃទី ០២ ខែឧសភា វៀតណាមបានបញ្ជូនយោធាជាង៣០០នាក់ ទៅកាន់តំបន់ក្បែរនឹងកម្ពុជា ដើម្បីការពារការមិនឲ្យមានការឆ្លងដែនខុសច្បាប់ ដោយសារមានការបារម្ភពីការឆ្លងរីករាលដាលកូវីដ-១៩។
ការដាក់ពង្រាយកម្លាំងនៅតាមតំបន់ព្រំដែនវៀតណាម និង កម្ពុជានោះ មានដូចជានៅតាមតំបន់ព្រំដែននៃខេត្តតៃនិញ និងនៅខេត្តបិញផុកជាដើម។ ហើយមិនមែនតែ ដាក់ពង្រាយកម្លាំងតាមព្រំដែនក្បែរកម្ពុជានោះទេ វៀតណាមក៏មានពង្រាយកម្លាំងតាមព្រំដែនឡាវ និងចិនផងដែរ។
សូមជម្រាបថា គិតត្រឹមថ្ងៃទី០៥ឧសភា តួលេខអ្នកឆ្លងជំងឺកូវីដ១៩សរុបនៅប្រទេសវៀតណាម មានតែជិត៣ពាន់នាក់ប៉ុណ្ណោះ ដោយចំនួនអ្នកឆ្លងថ្មីមាន ១០នាក់ អ្នកស្លាប់ជាង៣០នាក់ ខណៈដែលកម្ពុជាមានអ្នកឆ្លងកូវីដ១៩សរុបជិត១៧.០០០នាក់ហើយ និងអ្នកស្លាប់ជាង១០០នាក់ហើយ៕
None
