នៅក្នុងជំនួបជាមួយនឹងសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នាទីក្រុងហានូយ លោក ផាម មិញជីង នាយករដ្ឋមន្ត្រីវៀតណាម បានបញ្ជាក់ច្បាស់ៗថា វៀតណាមមានគោលនយោបាយផ្ដល់អាទិភាពខ្ពស់ចំពោះទំនាក់ទំនងជាមួយអ្នកជិតខាងល្អ មិត្តភាពប្រពៃណី ជាមួយនឹងកិច្ចសហប្រតិបត្តិការលើគ្រប់ជ្រុងជ្រោយ និរន្ដរភាព និងយូរអង្វែង។ នេះបើតាមការអះអាងនៅក្នុងសេចក្ដីថ្លែងការណ៍របស់ក្រសួងការបរទេសវៀតណាម។
ជាមួយគ្នានេះ សម្តេចធិបតី ហ៊ុន ម៉ាណែត ដែលត្រូវបានស្រង់ប្រសាសន៍យកមកចុះផ្សាយដោយសារព័ត៌មានក្នុងស្រុកវៀតណាម VN Express បានឲ្យដឹងថា ដំណើរទស្សនកិច្ចរបស់សម្តេចនៅលើទឹកដីវៀតណាមនេះ គឺមានបំណងពង្រឹងរក្សានូវប្រពៃណីដ៏ល្អរបស់ប្រទេសទាំងពីរ និងដើម្បីលើកកម្ពស់ភាពជាដៃគូទ្វេភាគីឲ្យកើនដល់កម្រិតថ្មីមួយទៀត។
អត្ថបទគួរអាន
សម្រាប់ក្របខណ្ឌសេដ្ឋកិច្ច ពាណិជ្ជកម្ម និងការវិនិយោគ មេដឹកនាំនៃប្រទេសទាំងពីរបានយល់ព្រមគាំទ្រគ្នាទៅវិញទៅមកក្នុងការកសាងសេដ្ឋកិច្ចឯករាជ្យ និងពឹងផ្អែកលើខ្លួនឯង ដែលត្រូវបានរួមបញ្ចូលយ៉ាងស៊ីជម្រៅជាមួយពិភពលោក។ បន្ថែមពីនេះ ប្រទេសទាំងពីរក៏គួរតែពង្រឹងទំនាក់ទំនងរវាងសេដ្ឋកិច្ចជាមួយគ្នា តាមរយៈការជំរុញពាណិជ្ជកម្មទ្វេភាគី ពិសេសពាណិជ្ជកម្មតាមព្រំដែន និងកិច្ចសហប្រតិបត្តិការអភិវឌ្ឍន៍សេដ្ឋកិច្ចតាមព្រំដែនជាដើម។
ក្នុងន័យនេះ សម្តេចធិបតី ហ៊ុន ម៉ា ណែត និងលោក ផាម មិញជីង បានប្តេជ្ញាជំរុញឲ្យប្រទេសកម្ពុជា និងវៀតណាម ឈានទៅសម្រេចគោលដៅពាណិជ្ជកម្មទ្វេភាគីឲ្យបានដល់ ២០ពាន់លានដុល្លារ និងយល់ព្រមរវាងគ្នាក្នុងការអភិវឌ្ឍកិច្ចសហប្រតិបត្តិការផ្នែក វិនិយោគ និងអាជីវកម្មផងដែរ។
សូមបញ្ជាក់ថា កាលពីឆ្នាំ២០២២កន្លងទៅ ទំហំពាណិជ្ជកម្មទ្វេភាគីរវាងកម្ពុជា និងវៀតណាមសម្រេចបានលើ១០ពាន់លានដុល្លារ ខណៈដែលនៅ៩ខែដំបូងឆ្នាំនេះ សម្រេចបាន ៦,៥ពាន់ដុល្លារ។ នេះបើតាមទិន្នន័យពីរដ្ឋាភិបាលវៀតណាម។
វៀតណាម គឺជាដៃគូពាណិជ្ជកម្មធំបំផុតទី៣របស់កម្ពុជា ខណៈមកទល់បច្ចុប្បន្ន ក្រុមហ៊ុនវៀតណាមកំពុងវិនិយោគនៅកម្ពុជាមានប្រមាណជាង ២០០គម្រោង ក្នុងតម្លៃទុនវិនិយោគសរុបជិត ៣ពាន់លានដុល្លារ។
None
