ថ្លែងក្នុងសន្និសីទអន្តរជាតិលើកទី២៥ ស្តីពី «អនាគតរបស់អាស៊ី» នៅប្រទេសជប៉ុន សម្តេច ហ៊ុន សែន បានបញ្ជាក់បានថា កម្ពុជានឹងមិនធ្លាក់ចូលអន្ទាក់បំណុលរបស់ចិននោះទេ។
សម្តេច ហ៊ុន សែន បានថ្លែងដូច្នេះថា ៖ «ប្រទេសខ្លះជំពាក់បំណុលគេរហូតទៅដល់ ២០០ភាគរយ ៣០០ភាគរយ ឬ ៥០០ភាគរយនៃ GDP ប៉ុន្តែ មិនមែនបានជំពាក់ចិនឯណា។ អ៊ីចឹង វាមិនមែនអន្ទាក់របស់ចិនទេ។ ប្រទេសខ្លះអត់ទាំងជំពាក់ចិនផង ប៉ុន្តែ ជំពាក់មុនតាំងពីចិនមាននយោបាយផ្លូវនិងខ្សែក្រវាត់ឯណោះ។»
សម្តេច ហ៊ុន សែន បានអះអាងថា កម្ពុជាបានរក្សានូវអធិបតេយ្យនៅក្នុងការខ្ចី គឺបានខ្ចីទៅតាមគម្រោងដែលត្រូវការ ហើយចិនបានគោរពនូវការសម្រេចរបស់កម្ពុជា។
តើបានអានអត្ថបទនេះ ឬនៅ?
សម្តេច ហ៊ុន សែន បានបន្តថា ៖ «ចិនមិនបានបង្ខំឲ្យយើងធ្វើនេះ ឬធ្វើនោះទេ ប៉ុន្តែ ចិនបានគោរពនូវការសម្រេចចិត្តរបស់យើង តើប្រើប្រាស់ឥណទានខ្ចីនេះ តើយកទៅធ្វើអ្វី។»
សម្តេច ហ៊ុន សែន បាននិយាយផងដែរថា ដោយសារអត្រាការប្រាក់ទាប និងរយ:ពេលសងវែង មកដល់ពេលនេះ កម្ពុជាទើបតែជំពាក់បំណុលគេស្មើនឹង ២១,៥ភាគរយនៃអនុបាត ៤០ភាគរយ នៃការអនុញ្ញាតឲ្យខ្ចី អ៊ីចឹង កម្ពុជាមិនធ្លាក់ចូលអន្ទាក់បំណុលចិននោះទេ។
កម្ពុជាមានបំណុលសាធារណៈសរុបប្រហែលជា ៧ពាន់លានដុល្លារគិតត្រឹមឆ្នាំ២០១៨។ នេះបើយោងតាមក្រសួងសេដ្ឋកិច្ចនិងហិរញ្ញវត្ថុ។ ក្រសួងនេះក៏ធ្លាប់បានអះអាងផងដែរថា កម្ពុជាបានសងវិញរួចហើយ ចំនួន ១៩ភាគរយនៃបំណុលសរុបទាំងអស់នេះ៕
None
