អ្នកជំនាញ និងជាអ្នកជំនួញក្នុងវិស័យកសិកកម្ម បានអះអាងថា ការនាំចេញផ្លែចេកស្រស់អំបូងលឿងទៅជប៉ុន ថ្វីដ្បិតតែនៅមានចំនួនតិចតួចក៏ពិតមែន ប៉ុន្ដែ វាគឺជាការបង្ហាញឲ្យឃើញពីគុណភាពខ្ពស់របស់ផ្លែចេកកម្ពុជា ដែលអាចឈានជើងនាំចេញទៅកាន់ទីផ្សារប្រទេសជប៉ុន ជាលើកដំបូង។
ឧកញ៉ា ហ៊ុន ឡាក់ ជានាយកក្រុមហ៊ុន Longmate Agriculture ដែលមានការដាំដុះ និង នាំចេញចេកអំបូងលឿងទៅកាន់ទីផ្សារក្រៅប្រទេស បានអះអាង ប្រាប់ ខេមបូណូមីស ថា ជាទូទៅ ការនាំចេញផ្លែចេកស្រស់របស់កម្ពុជា គឺនាំចេញភាគច្រើនបំផុតទៅកាន់ទីផ្សារប្រទេសចិន និង វៀតណាម។ ប៉ុន្ដែ នៅ៧ខែដំបូងឆ្នាំ២០២១នេះ តាមតួលេខពីក្រសួងកសិកម្មកម្ពុជាបង្ហាញថា ប្រទេសជប៉ុនក៏បាននាំចូលផ្លែចេកពីកម្ពុជាជិត ៥០០តោនដែរ ដែលវាបង្ហាញថា ផ្លែចេកស្រស់របស់កម្ពុជាគឺពិតជាមានគុណភាពខ្ពស់ ព្រោះទម្រាំនាំចេញផ្លែឈើស្រស់ទៅកាន់ប្រទេសជប៉ុនបាន វាត្រូវឆ្លងកាត់ការត្រួតពិនិត្យស្ដង់ដារគុណភាព ភូតគាមអនាម័យតឹងរ៉ឹងណាស់។
ឧកញ៉ា ហ៊ុន ឡាក់ បន្ថែមទៀតថា បច្ចុប្បន្នក្រុមហ៊ុនលោកក៏កំពុងសិក្សាជាមួយនឹងក្រុមហ៊ុនដៃគូពីជប៉ុន ក្នុងការជ្រើសរើសពូជចេកមកដាំនៅកម្ពុជាឲ្យត្រូវតាមស្ដង់ដារគុណភាពជប៉ុនចង់បានផងដែរ ដើម្បីជំរុញការនាំចេញទៅកាន់ទីផ្សារសក្ដានុពលមួយនេះ។
របាយការណ៍ពីក្រសួងកសិកម្មបង្ហាញថា នៅ៧ខែឆ្នាំ២០២១ កម្ពុជាបាននាំចេញផ្លែចេកស្រស់ជាង ២៧ម៉ឺនតោន កើនឡើង៦១% ធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ នាំចេញទៅទីផ្សារចិនមានជាង២៤ម៉ឺនតោន, នាំទៅវៀតណាមមានជិត៣ម៉ឺនតោន,ជប៉ុនមានជិត៥០០តោន និង សិង្ហបុរីមានជាង៤៨០តោន។
អត្ថបទទាក់ទង
ជុំវិញទៅនឹងការនាំចេញផ្លែចេកស្រស់នេះដែរ ត្រូវបានឧកញ៉ា ហ៊ុន ឡាក់ លើកឡើងថា ការដឹកជញ្ជូនក៏មានការឡើងថ្លៃខ្លះដែរ ប៉ុន្ដែ មិនឡើងថ្លៃខ្ពស់ដូចការនាំចេញអង្ករនោះទេ ហើយក៏មិនជួបបញ្ហាកង្វះខាតទូកុងទ័រនឺនោះដែរ។ មិនជួបញ្ហាដឹកជញ្ជូនឡើងថ្លៃ និងខ្វះទូកុងតឺន័រ ក៏ដោយសារតែ ការនាំចេញចេក គឺភាគច្រើនដឹកជញ្ជូនក្នុងរយៈចម្ងាយជិតជាងការនាំចេញអង្ករទៅកាន់ទីផ្សារតំបន់អឺរ៉ុប។
ឧកញ៉ា ហ៊ុន ឡាក់បានគូសបញ្ជាក់ទៀតថា ទោះបីជាបច្ចុប្បន្នមានការរាតត្បាតកូវីដ-១៩ក៏ដោយ ប៉ុន្ដែ វាមិនបានបង្កផលប៉ះពាល់ធ្ងន់ធ្ងរ ចំពោះការនាំចេញផ្លែចេកស្រស់របស់កម្ពុជាទៅទីផ្សារក្រៅប្រទេសនោះទេ។ ជាក់ស្ដែង ក្រុមហ៊ុនរបស់លោកផ្ទាល់នៅឆមាសទី១ឆ្នាំនេះ មានកំណើនទាំងទិន្នផល និង បរិមាណនាំចេញក្នុងរង្វង់ ៦០% ធៀបនឹងឆមាសទី១ឆ្នាំ២០២០។
លោកជឿជាក់ថា នៅឆ្នាំ២០២២ ការដាំដុះ និងនាំចេញផ្លែចេកស្រស់របស់ក្រុមហ៊ុនលោក នឹងមានកំណើនជាងនេះទៅទៀត ស្របពេលតម្រូវការទីផ្សារកំពុងមានការកើនឡើងកាន់តែច្រើន។
សូមបញ្ជាក់ថា បើតាមរបាយការណ៍ពីក្រសួងកសិកម្ម នៅរយៈពេល៧ខែឆ្នាំ២០២១ កម្ពុជាសម្រេចបានការនាំចេញផលិតផលកសិកម្មសរុបជិត៣ពាន់លានដុល្លារអាមេរិក៕
អត្ថបទ៖ ហួន ស្រីនីត
None
