កំណើននៃការនាំចេញនេះ បានបង្ហាញឲ្យឃើញថា ការឆ្លងរាតត្បាតនៃជំងឺកូវីដ-១៩ និងភាពតានតឹងភូមិសាស្ត្រនយោបាយសកល មិនបានជះឥទ្ធិពលធ្ងន់ធ្ងរដល់ការនាំចេញរបស់កម្ពុជាទៅកាន់ទីផ្សារអាមេរិកនោះទេ។ អ្នកជំនាញសេដ្ឋកិច្ចបានវាយតម្លៃថា កត្តាដែលជួយជំរុញកំណើននាំចេញពីកម្ពុជាទៅសហរដ្ឋអាមេរិក ដោយសារទំនិញនាំចេញទៅសហរដ្ឋអាមេរិកភាគច្រើនជាទំនិញបញ្ជាទិញមុនផលិត ខណៈដែលអាមេរិកក៏កំពុងមានតម្រូវការកើនឡើងដែរ។ ការទទួលបានការអនុគ្រោះពន្ធក្នុងការនាំចេញ ក៏កត្តារួមចំណែកមួយផងដែរ។
ទោះបីវិបត្តិកូវីដ-១៩ និងភាពតានតឹងភូមិសាស្ត្រនយោបាយសកល ពិសេសសង្គ្រាមនៅអ៊ុយក្រែនបានធ្វើឲ្យសេដ្ឋកិច្ចពិភពលោកស្ថិតក្នុងស្ថានភាពមិនច្បាស់លាស់នៃការរីកចម្រើនក៏ដោយ តែវាមិនបានជះឥទ្ធិពលធ្ងន់ធ្ងរដល់ខ្សែចង្វាក់ផលិតកម្មនិងការនាំចេញរបស់កម្ពុជានោះទេ។ ពោលគឺការនាំចេញរបស់កម្ពុជាទៅកាន់ទីផ្សារគោលដៅនានានៅតែបង្ហាញវិជ្ជមានគួរឲ្យកត់សម្គាល់ ដែលបង្ហាញពីសន្ទុះនៃការរីកចម្រើននៃសេដ្ឋកិច្ចរបស់កម្ពុជា។
ជាក់ស្តែងបើតាមរបាយការណ៍ពីការិយាល័យស្ថិតិអាមេរិកការនាំចេញទំនិញពីកម្ពុជាទៅកាន់សហរដ្ឋអាមេរិកសម្រេចបានក្នុងទំហំ ១ពាន់ ៧រយលានដុល្លារអាមេរិកនៅ២ខែ ដើមឆ្នាំ២០២២ នេះ មានការកើនឡើងជាង ៥៣% បើធៀបនឹងការនាំចេញក្នុងរយៈពេលដូចគ្នាកាលពីឆ្នាំមុន ដែលមានត្រឹមតែ១ពាន់១រយលានដុល្លារអាមេរិក។ ចំណែកសហរដ្ឋអាមេរិកនាំចូលទំនិញមកកម្ពុជា មានទំហំ៦៣លានដុល្លារអាមេរិកធ្លាក់ចុះជិត៦%បើធៀបនឹងរយៈពេលដូចគ្នាកាលពីឆ្នាំមុនដែលទំហំ៦៧លានដុល្លារអាមេរិក។
អត្ថបទគួរអាន
ជុំវិញកំណើននាំចេញរបស់កម្ពុជា ទៅកាន់សហរដ្ឋអាមេរិក នេះ លោកបណ្ឌិត ហុង វណ្ណៈ អ្នកជំនាញសេដ្ឋកិច្ចនៃវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជាបានគូសបញ្ជាក់ថា ការកើនឡើងនេះ គឺដោយសារកត្តាផ្គត់ផ្គង់ និងតម្រូវការមានការកើនឡើង គូបផ្សំកម្ពុជាទទួលបានការអនុគ្រោះពន្ធក្នុងការនាំចេញទំនិញទៅកាន់សហរដ្ឋអាមេរិក។ ម្យ៉ាងទៀត ទំនិញភាគច្រើនដែលនាំចេញទៅសហរដ្ឋអាមេរិកជាប្រភេទទំនិញបញ្ជាទិញមុនការផលិត ហើយភាពសុខសន្តិភាព ក៏ជាកត្តារួមចំណែកមួយផងដែរ។
ដោយឡែក ជុំវិញការនាំចូលទំនិញពីអាមេរិកមកកម្ពុជាមានការធ្លាក់ចុះ ក៏ត្រូវបានអ្នកជំនាញពន្យល់ថា គឺដោយសារតម្រូវការទំនិញពីសហរដ្ឋអាមេរិកដែលភាគច្រើនជារថយន្ត និងទំនិញដែលមានតម្លៃថ្លៃសម្រាប់ទីផ្សារកម្ពុជាមានការធ្លាក់ចុះ ស្របពេលមានកាត់បន្ថយពីក្រុមហ៊ុននាំចូល។
គួរបញ្ជាក់ថា ទំហំពាណិជ្ជកម្មរវាងកម្ពុជា និងសហរដ្ឋអាមេរិកកាលពីឆ្នាំ២០២១ មានជាង ៩ពាន់លានដុល្លារអាមេរិកកើនឡើង៣២% បើធៀបនឹងឆ្នាំ២០២០ ដែលមានជិត៧ពាន់លានដុល្លារអាមេរិក។ ក្នុងនោះកម្ពុជានាំចេញទៅសហរដ្ឋអាមេរិកសម្រេចបាន៨ពាន់៧រយលានដុល្លារ ខណៈនាំចូលពីអាមេរិកមានទំហំ៤១៣លានដុល្លារអាមេរិក។ នេះបើតាមរបាយការណ៍ពី ការិយាល័យស្ថិតិរបស់អាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
