ឯកឧត្តម វង្សី វិស្សុត រដ្ឋមន្ត្រីប្រតិភូអមនាយកដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុបានអះអាងថា បើទោះបីជា ការចំណាយនៅអំឡុងពេលមេរោគរាតត្បាកូវីដ១៩រីកកាន់តែធំ និងចំណូលប្រឈមនឹងការថមថយចុះក្ដី ប៉ុន្ដែ រាជរដ្ឋាភិបាលកម្ពុជា នៅតែអាចគ្រប់គ្រងស្ថានការណ៍នេះបានយ៉ាងល្អនៅរយៈពេល២ឆ្នាំកន្លងមកនេះ ហើយក្នុងនោះ កម្រិតនៃការខ្ចីបំណុលរបស់កម្ពុជាពីដៃគូក្រៅប្រទេស គឺនៅធ្វើឡើងក្នុងលក្ខណៈធម្មតា ពោលគឺ មិនមានការខ្ចីច្រើនខ្លាំងនោះទេ។
នៅក្នុងអំឡុងវិបត្តិកូវីដ១៩រីករាតត្បាតនេះ មានប្រទេសក្រីក្រ ក៏ដូចជាប្រទេសកំពុងអភិវឌ្ឍជាច្រើន មានការខ្ចីបំណុលកើនឡើងកាន់តែច្រើន ដើម្បីយកមកទប់ទល់នឹងការចំណាយទ្រទ្រង់សេដ្ឋកិច្ចសង្គម ដែលវាត្រូវបានគេមើលឃើញថា គឺជាកត្តាហានិភ័យមួយសម្រាប់ប្រទេសទាំងនោះ។ ប៉ុន្ដែ សម្រាប់កម្ពុជា កម្រិតបំណុលដែលកម្ពុជាមាននាពេលបច្ចុប្បន្ន គឺនៅក្រោមកម្រិតហានិភ័យនៅឡើយទេ។
អត្ថបទទាក់ទង!
បើតាមឯកឧត្តម វង្សី វិស្សុត តាមការគ្រោងទុកនៅឆ្នាំ២០២២នេះ បំណុលសាធារណៈរបស់កម្ពុជារំពឹងថា នឹងកើនឡើងដល់ប្រមាណ ៣៥% នៃទំហំផលិតផលក្នុងស្រុកសរុប ប៉ុន្ដែសម្រាប់តម្លៃពិតបច្ចុប្បន្ន (Net Present Value) ទើបតែមានជាង ២១%ប៉ុណ្ណោះនៃទំហំផលិតផលក្នុងស្រុកសរុប។ ការខ្ចីបំណុលរបស់កម្ពុជានៅមានកម្រិតទាប នោះក៏ដោយសារតែ កម្ពុជាមានធនធានដែលជាប្រាក់សន្សំរបស់រាជរដ្ឋាភិបាល ដែលអាចជួយបំពេញបង្គ្រប់សម្រាប់ការចំណាយ។ តួយ៉ាង នៅឆ្នាំ២០២០ កម្ពុជាបានដកសាច់ប្រាក់សន្សំមកប្រើប្រាស់ជាង ២៤០លានដុល្លារ ខណៈនៅឆ្នាំ២០២១ បានដកមកចំណាយដល់ទៅជិត ១ពាន់៤រយលានដុល្លារអាមេរិក ហើយនៅឆ្នាំ២០២២នេះគ្រោងនឹងចំណាយប្រមាណ ៥០០លានដុល្លារអាមេរិក។ នេះបើតាមការគូសបញ្ជាក់ របស់ឯកឧត្តម វង្សី វិស្សុត។
រដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុរូបនេះ បានគូសបញ្ជាក់ទៀតថា នៅឆ្នាំ២០២២នេះ ហាក់ដូចជាឆ្នាំមួយលំបាកសម្រាប់កម្ពុជា ដោយសារតែរដ្ឋាភិបាលត្រូវមានការចំណាយកាន់តែច្រើនជាងមុន ស្របពេលធនធានដែលមាន ក៏បានថយចុះផងដែរ។ តួយ៉ាង ក្រៅតែពីគ្រោងចំណាយលើការស្ដារ និងជំរុញសេដ្ឋកិច្ចពីវិបត្តិកូវីដ១៩ ប្រហែលជាង ១ពាន់លានដុល្លារនៅឆ្នាំ២០២២នេះ រាជរដ្ឋាភិបាលក៏នៅមានការចំណាយផ្សេងទៀតដែរ ពិសេសការចំណាយលើការរៀបចំធ្វើជាម្ចាស់ផ្ទះនៃកិច្ចប្រជុំអាស៊ាន ដោយគ្រោងចំណាយប្រហែល៤០ ទៅ៥០លានដុល្លារ និងការចំណាយលើការរៀបចំការបោះឆ្នោតប្រមាណ៧០លានដុល្លារអាមេរិកផងដែរ។
ជាមួយគ្នានេះ ឯកឧត្តម វង្សី វិស្សុត ក៏បានព្រមានផងដែរ អំពីការបន្ដរីករាលដាលកូវីដ១៩ និងមេរោគបំប្លែងថ្មី ប្រសិនបើនៅតែបន្ដអូសបន្លាយ វាក៏អាចជាកត្តាមួយទាញឲ្យការចំណាយរបស់រាជរដ្ឋាភិបាលកាន់តែរីកធំ តាមរយៈការផ្ដល់អន្តរាគមន៍លើវិស័យសុខភាពសាធារណៈ និងសេដ្ឋកិច្ចសង្គមជាដើម ហើយការខ្ចីបំណុលបរទេសក៏មិនជាការងាយស្រួលប៉ុន្មាននោះដែរ ស្ថិតនៅក្នុងកាលៈទេសៈបច្ចុប្បន្ននេះ។ ដូច្នេះហើយ ឯកឧត្តម ក៏បានជំរុញឲ្យការចំណាយទាំងអស់នោះ គឺបានធ្វើឡើងត្រឹមត្រូវចំគោលដៅ កុំឲ្យចាយខុសគោលដៅ ធ្លុះធ្លាយ ខាតបង់នូវថវិកាជាតិ។
សូមបញ្ជាក់ថា តាមរបាយការណ៍ពីក្រសួងសេដ្ឋកិច្ច និងហិរញ្ញវត្ថុ គិតត្រឹមដំណាច់ឆ្នាំ២០២១កម្ពុជាមានសន្និធិបំណុលសាធារណៈក្រៅប្រទេសជាង ៩ពាន់៥រយលានដុល្លារអាមេរិក ក្នុងនោះជំពាក់ប្រទេសចិនជាង៤០% បំណុលពហុភាគីមាន ៣០% បំណុលជំពាក់ប្រទេសជប៉ុន មាន៩% និងកូរ៉េខាងត្បូងមាន៥% បំណុលទ្វេភាគីផ្សេងទៀតមាន ៦% និងបំណុលមរតក ដែលកំពុងចរចាដោះស្រាយមាន៧%។
សូមបញ្ជាក់ថា រាជរដ្ឋាភិបាលកម្ពុជាក៏មានគោលដៅ ងាកមករកការខ្ចីបំណុលក្នុងស្រុកផងដែរ ដោយនៅឆ្នាំ២០២២នេះ រាជរដ្ឋាភិបាល គ្រោងនឹងបោះផ្សាយលក់មូលបត្របំណុលរដ្ឋជាលើកដំបូង ក្នុងតម្លៃប្រមាណ៣០០លានដុល្លារអាមេរិក៕
None
