សហព័ន្ធស្រូវអង្ករកម្ពុជាបានគូសបញ្ជាក់ថា ការឈ្នះពានរង្វាន់អង្ករល្អប្រណិតផ្តាច់គេលើពិភពលោកជាលើកទី៦នេះ វាមិនមែនជារឿងដៃដន្យនោះទេ ពោលគឺកើតចេញពីការខិតខំដាំដុះរបស់ប្រជាកសិករកម្ពុជា និងការខិតខំសម្រិតសម្រាំងរបស់រោងម៉ាស៊ីនកិនស្រូវ និងកិនកែច្នៃអង្ករបានយ៉ាងល្អរហូតទទួលបានជ័យជម្នះជូនប្រទេសជាតិ។ បើតាមសហព័ន្ធស្រូវអង្ករកម្ពុជា អង្ករម៉ាក "ម្លិះអង្គរ" គឺជាអង្ករដែលមានគុណភាព និងទុកចិត្តបានសម្រាប់អង្ករក្រអូបប្រណិតកម្ពុជា។
សូមបញ្ជាក់ថា នេះគឺជាលើកទី៦ហើយ ដែលអង្ករខ្មែរបានទទួលពានរង្វាន់ជាអង្ករល្អដាច់គេលើលោក ដោយលើកទី១ទទួលបាននៅឆ្នាំ២០១២, លើកទី២នៅឆ្នាំ ២០១៣, លើកទី៣នៅឆ្នាំ២០១៤, លើកទី៤ នៅឆ្នាំ២០១៨, លើកទី៥នៅឆ្នាំ២០២២, និងលើកទី៦នៅឆ្នាំ២០២៤។
យោងតាមទិន្ន័យពីសហព័ន្ធស្រូវអង្ករកម្ពុជា នៅក្នុងរយៈពេល១០ខែឆ្នាំ២០២៤ ការនាំចេញអង្កររបស់កម្ពុជាសម្រេចបានចំនួនជាង៥០ម៉ឺ៧ពាន់តោន គិតជាទឹកប្រាក់មានចំនួនជាង៣៧៦លានដុល្លារ។ អង្កររបស់កម្ពុជាត្រូវបាននាំចេញទៅកាន់ប្រទេសចំនួន៧នៅតំបន់អាស៊ាន តំបន់អឺរ៉ុប ចិន ព្រមទាំងតំបន់រដ្ឋបាលស្វយ័ត និង៣០ប្រទេសផ្សេងទៀតនៅអាហ្រ្វិក និងមជ្ឈិមបូព៌ាជាដើម។ ទន្ទឹមនេះ កម្ពុជា ក៏នាំចេញស្រូវបានចំនួនជាង៤លាន៤៦ម៉ឺនតោនក្នុងទំហំជិត១,២ពាន់លានដុល្លារទៅប្រទេសជិតខាងផងដែរ៕
អត្ថបទ៖ បូ ដូឡា,រូបភាព ឯកសារ
