ភ្លាមៗក្រោយការប្រកាសដាក់គំនាបពន្ធពីសំណាក់លោក ដូណាល់ ត្រាំ មកលើទំនិញខ្លួន ទាំងប្រទេសកាណាដា ម៉ិកស៊ិក និងចិនសុទ្ធតែបានចេញមកប្រតិកម្ម និងដាក់ចេញគោលនយោបាយ ក៏ដូចជារិះរកវិធានការតបត ដើម្បីឆ្លើយតបនឹងវិធានការពន្ធរបស់លោក ត្រាំ។ ជាមួយគ្នានេះ ដើម្បីកាត់បន្ថយហានិភ័យ និងឆ្លើយតបនឹងគំនាបពន្ធរបស់អាម៉េរិក រដ្ឋាភិបាលកាណាដានឹងដាក់ចេញនូវយន្តការសម្របសម្រួលមួយ ដើម្បីទទួលបានឱកាសសមស្របក្រោយលោក ត្រាំ ប្រកាសដំឡើងពន្ធ២៥% មកលើទំនិញរបស់ខ្លួន។ រដ្ឋាភិបាលកាណាដា នឹងដាក់ចេញយន្តការបន្ធូរបន្ថយពន្ធ និងលក្ខខណ្ឌមួយចំនួននៅធនាគារ ហើយក្រុមហ៊ុន ដែលរងវិបត្តិពួកគេសុទ្ធតែមានសិទ្ធិទទួលបានជំនួយ។
លោក ដូមីនុច ឡឺម្លង់ ( Dominic LeBlanc ) រដ្ឋមន្រ្តីហិរញ្ញវត្ថុរបស់ប្រទេសកាណាដា បាននិយាយថា កាណាដា ចង់រក្សាទំនាក់ទំនងល្អជាមួយសហរដ្ឋអាម៉េរិក ប៉ុន្តែនៅចំពោះមុខពន្ធមិនសមហេតុផលរបស់សហរដ្ឋអាម៉េរិក ប្រឆាំងនឹងទំនិញរបស់ខ្លួន ខ្លួនត្រូវតែចាត់វិធានការដើម្បីការពារសេដ្ឋកិច្ច កម្មករ និងអាជីវកម្មរបស់កាណាដា។
បន្ថែមលើវិធានការខាងលើ រដ្ឋាភិបាលកាណាដា ក៏បានប្រកាសដំឡើងពន្ធសងសឹក ដែលមានតម្លៃ៣០ពាន់លានដុល្លារ ហើយកំពុងពិចារណារៀបចំដំឡើងពន្ធលើផលិតផលមួយចំនួនទៀត ដែលមានតម្លៃសរុប១២៥ពាន់លានដុល្លារបន្ថែមទៀត។
ដោយឡែក ប្រធានាធិបតីម៉ិកស៊ិក លោកស្រី ក្លូឌា សឹងបំ ( Claudia Sheinbaum ) កាលពីថ្ងៃសៅរ៍ សប្តាហ៍មុនបានបញ្ជាឱ្យដំឡើងពន្ធសងសឹកជាការឆ្លើយតបទៅនឹងការសម្រេចចិត្តរបស់សហរដ្ឋអាម៉េរិក។ លោកស្រីបានបង្ហោះលើបណ្តាញសង្គមថា រដ្ឋាភិបាលបានស្វែងរកការសន្ទនាជាជាងការប្រឈមមុខជាមួយដៃគូពាណិជ្ជកម្មកំពូលរបស់ខ្លួន ប៉ុន្តែថា ម៉ិកស៊ិកត្រូវបានបង្ខំចិត្តឱ្យឆ្លើយតបបែបនេះ។
ដោយឡែកសម្រាប់ប្រទេសចិន ដែលធ្លាប់រងសម្ពាធនេះម្តងរួចមកហើយកាលពីអាណត្តិមុន ហាក់ស៊ាំនឹងសង្រ្គាមបែបនេះ ហើយបានឆ្លើយតបតាមនយោបាយ និងការទូត។ ក្រសួងពាណិជ្ជកម្មចិន បាននិយាយនៅក្នុងសេចក្តីថ្លែងការណ៍មួយថា ទង្វើរបស់សហរដ្ឋអាម៉េរិក កំពុងបំពានយ៉ាងធ្ងន់ធ្ងរចំពោះច្បាប់ពាណិជ្ជកម្មអន្តរជាតិ ហើយគ្រោងដាក់ពាក្យប្តឹងសហរដ្ឋអាម៉េរិក ទៅអង្គការពាណិជ្ជកម្មពិភពលោក៕
ដោយៈ សរ សុជាតិ
