ចិននិងអូស្ត្រាលីបានឈានដល់កិច្ចព្រមព្រៀងលើជម្លោះរឿងអង្ករ និងលើការផ្អាកបណ្ដឹងនៅអង្គការពាណិជ្ជកម្មពិភពលោក

រដ្ឋមន្ត្រីការបរទេសអូស្ត្រាលី លោកស្រី ផេន្នី វុង (Penny Wong) បាននិយាយនៅថ្ងៃអង្គារ ទី១១ មេសា ថា ប្រទេសអូស្ត្រាលីបានឈានដល់កិច្ចព្រមព្រៀងជាមួយប្រទេសចិន ដើម្បីដោះស្រាយជម្លោះរបស់ពួកគេលើការនាំចូលអង្កររបស់អូស្ត្រាលីហើយ។ នេះជាសញ្ញាវិជ្ជមានចុងក្រោយបំផុតក្នុងការកែលម្អទំនាក់ទំនងរវាងប្រទេសទាំងពីរ។

លោកស្រី ផេន្នី វុង បានប្រាប់សន្និសីទសារព័ត៌មានមួយថា ប្រទេសអូស្ត្រាលីនឹងព្យួរបណ្ដឹងរបស់ខ្លួននៅអង្គការពាណិជ្ជកម្មពិភពលោក (WTO) ខណៈពេលដែលប្រទេសចិនក៏ត្រួតពិនិត្យមើលឡើងវិញលើពន្ធគយដែលដាក់លើគ្រាប់ធញ្ញជាតិរបស់អូស្ត្រាលី។

លោកស្រីបាននិយាយថា៖ «ប្រទេសចិនបានយល់ព្រមសើរើមុនកាលកំណត់ នូវអត្រាពន្ធគយដែលបានដាក់កំហិតលើអង្ករអូស្ត្រាលី ឱ្យរួចរាល់ក្នុងរយៈពេល ៣ ខែ ឬយ៉ាងយូរក្នុងរយៈពេល ៤ ខែ ប្រសិនបើចាំបាច់»។

«ជាថ្នូរវិញ យើងបានយល់ព្រមផ្អាកជាបណ្ដោះអាសន្ននូវបណ្ដឹងរបស់យើងនៅក្នុងអង្គការពាណិជ្ជកម្មអន្តរជាតិ ក្នុងរយៈពេលដែលយើងបានព្រមព្រៀងគ្នា»។

លោកស្រីបានបន្ថែមថា រដ្ឋាភិបាលអូស្ត្រាលីរំពឹងថានឹងមានដំណើរការស្រដៀងគ្នានៅក្នុងជម្លោះទីពីរស្តីពីពន្ធស្រា។

ប្រទេសអូស្ត្រាលីបានដាក់ពាក្យបណ្តឹងជាផ្លូវការទៅកាន់អង្គការពាណិជ្ជកម្មពិភពលោក (WTO) ក្នុងឆ្នាំ ២០២០ ជុំវិញវិធានការប្រឆាំងនឹងការលក់បង្ខូចតម្លៃនិងវិធានការសងសឹក ដែលដាក់ដោយប្រទេសចិនលើអង្ករអូស្ត្រាលី។ នៅក្នុងខែឧសភាឆ្នាំ ២០២០ ប្រទេសចិនបានសម្រេចថា ខ្លួននឹងយកពន្ធ ៨០,៥ ភាគរយ លើការនាំចូលអង្កររបស់ប្រទេសអូស្ត្រាលី។ រឿងនេះជាប្រភពមួយក្នុងចំណោមប្រភពជាច្រើននៃជម្លោះពាណិជ្ជកម្មរវាងប្រទេសចិននិងប្រទេសអូស្ត្រាលីក្នុងប៉ុន្មានឆ្នាំថ្មីៗនេះ។

ទំនាក់ទំនងរវាងប្រទេសទាំងពីរបានធូរស្រាលឡើងវិញ ក្រោយពីគណបក្សការងារបានឈ្នះឆ្នោតនៅប្រទេសអូស្ត្រាលីកាលពីឆ្នាំមុន ហើយលោកស្រី វុង បានជួបសមភាគីចិន គឺលោក វ៉ាង យី (Wang Yi) នៅទីក្រុងប៉េកាំងក្នុងខែធ្នូ ដែលជាដំណើរទស្សនកិច្ចលើកដំបូងថ្នាក់រដ្ឋមន្ត្រីអូស្ត្រាលី ចាប់តាំងពីឆ្នាំ ២០១៩ មក៕