ក្រសួងពាណិជ្ជកម្មចិនបាននិយាយថា ការរឹតបន្តឹងលើឧបករណ៍យន្តហោះដ្រូន រួមទាំងម៉ាស៊ីនយន្តហោះដ្រូន ឡាស៊ែរ ឧបករណ៍ទំនាក់ទំនង និង ប្រព័ន្ធប្រឆាំងយន្តហោះដ្រូនផងដែរ នឹងចូលជាធរមាននៅថ្ងៃទី១ ខែកញ្ញាខាងមុខនេះ។
អ្នកនាំពាក្យក្រសួងពាណិជ្ជកម្មចិន បាននិយាយនៅក្នុងសេចក្តីថ្លែងការណ៍មួយថា ការរឹតបន្តឹងនេះក៏ធ្វើទៅលើយន្តហោះដ្រូនសម្រាប់ប្រើប្រាស់ធម្មតាផងដែរ ហើយគ្មានយន្តហោះដ្រូនស៊ីវិលណាមួយអាចត្រូវបាននាំចេញសម្រាប់គោលបំណងយោធានោះឡើយ។
អ្នកនាំពាក្យក្រសួងពាណិជ្ជកម្មចិនបានបន្តថា ការពង្រីកវិសាលភាពនៃការគ្រប់គ្រងយន្តហោះដ្រូន ក្នុងកម្រិតតិចតួចបំផុតរបស់ប្រទេសចិននៅពេលនេះគឺជាវិធានការសំខាន់មួយដើម្បីបង្ហាញពីជំហររបស់ចិន ជាប្រទេសចេះទទួលខុសត្រូវដ៏សំខាន់ដើម្បីអនុវត្តគំនិតផ្តួចផ្តើមសន្តិសុខពិភពលោក និងរក្សាសន្តិភាពពិភពលោក។
ប្រទេសចិនមានឧស្សាហកម្មផលិតយន្តហោះដ្រូនដ៏ធំមួយ និងបាននាំចេញទៅកាន់ទីផ្សារជាច្រើន រួមទាំងសហរដ្ឋអាមេរិកផងដែរ។ សមាជិកសភាអាមេរិកបាននិយាយថា យន្តហោះដ្រូនជាង៥០%ដែលលក់នៅអាមេរិកគឺជាផលិតផលរបស់ក្រុមហ៊ុន DJI ដែលមានមូលដ្ឋាននៅប្រទេសចិន ហើយវាជាដ្រូនដ៏ពេញនិយមបំផុតដែលប្រើប្រាស់ដោយភ្នាក់ងារសុវត្ថិភាពសាធារណៈ។
អត្ថបទគួរអាន
ការទប់ស្កាត់ការនាំចេញយន្តហោះដ្រូនរបស់ប្រទេសចិននេះ បានធ្វើឡើងបន្ទាប់ពីចិនបានប្រកាសពីការគ្រប់គ្រងលើការនាំចេញលើលោហធាតុមួយចំនួនដែលប្រើប្រាស់យ៉ាងទូលំទូលាយសម្រាប់ការផលិតបន្ទះឈីបកាលពីខែមុន បន្ទាប់ពីអាមេរិកបានចាត់វិធានការដ៏តឹងរ៉ឹងមិនឱ្យចិនទទួលបានបច្ចេកវិទ្យាសំខាន់ៗដូចជាឧបករណ៍ផលិតបន្ទះឈីបជាដើម។
ក្រៅតែពីសហរដ្ឋអាមេរិកក៏មានប្រទេសជប៉ុន និងប្រទេសហូឡង់ដែលជាមូលដ្ឋានរបស់ក្រុមហ៊ុន ផលិតឧបករណ៍បន្ទះឈីបដ៏សំខាន់មួយគឺក្រុមហ៊ុន ASML បានធ្វើការរឹតបន្តឹងការនាំចេញបច្ចេកវិទ្យាបន្ទះឈីបទៅប្រទេសចិនផងដែរ។
លោក ខូលីន ហាមីលថុន (Colin Hamilton) មកពីក្រុមហ៊ុនវិនិយោគ BMO Capital Markets បានប្រាប់ទូរទស្សន៍ BBC ថា ការប្រកាសពីការរឹតបន្តឹងលើការនាំចេញលោហធាតុសំខាន់ៗរបស់ចិននេះគឺមិនមែនជារឿងចៃដន្យនោះទេ ប៉ុន្តែវាបានកើតឡើងដោយសារតែមានការរឹតបន្តឹងលើការនាំចេញបន្ទះឈីបរបស់ប្រទេសហូឡង់ និង ប្រទេសបស្ចិមលោកដទៃទៀតរួមទាំងជប៉ុនផងដែរ។
លោក ហាមីលថុន បានបន្ថែមថា វាជារឿងធម្មតាទេ បើសិនជាចិនមិនលក់បន្ទះឈីបទៅឱ្យបស្ចិមលោកទេនោះ ពួកគេក៏នឹងមិនលក់ឱ្យចិននូវសម្ភារៈសម្រាប់ផលិតបន្ទះឈីបទាំងនោះមកវិញដែរ៕
អត្ថបទ៖ សុខ ជា
