បុរសរដ្ឋខ្លាំងរបស់ចិនលោក ស៊ី ជីន ពីង បានលើកឡើងយ៉ាងដូច្នេះ នៅក្នុងអំឡុងកិច្ចជំនួបប្រចាំឆ្នាំនៃវេទិកាសេដ្ឋកិច្ចពិភពលោក ឬ World Economic Forum តាមប្រព័ន្ធអនឡាញនៅថ្ងៃចន្ទដើមសប្ដាហ៍នេះ។
«សូមបញ្ឈប់នូវចិត្តគំនិតចង់បង្កើតសង្គ្រាមត្រជាក់សារជាថ្មីទៀតទៅ វាពុំមានផលចំណេញអ្វីឡើយ ក្រៅតែពីការបង្កផលលំបាក និងវិនាសកម្មធ្ងន់ធ្ងរសម្រាប់ពិភពលោកតែប៉ុណ្ណោះ» នេះជាអ្វីដែលប្រធានាធិបតីចិន លោក ស៊ី ជីនពីងបានលើកឡើងនៅក្នុងវេទិកាសេដ្ឋកិច្ចពិភពលោក។
វេទិកាសេដ្ឋកិច្ចពិភពលោកនេះ តែងតែធ្វើឡើងរៀងរាល់មួយឆ្នាំម្តង និងបានប្រមូលផ្តុំថ្នាក់ដឹកនាំតាមប្រទេសនានា អង្គការសង្គមស៊ីវិល និងក្រុមហ៊ុនអន្តរជាតិធំៗ មកជួបពិភាក្សាគ្នាលើសំណុំរឿងជាច្រើន ដែលមានជាប់ពាក់ព័ន្ធនឹងបញ្ហាសេដ្ឋកិច្ចរបស់ពិភពលោក។ មែនទែនទៅកិច្ចប្រជុំខាងលើនេះ គួរត្រូវបានធ្វើឡើងនៅទីក្រុង ដាវូស (Davos) ប្រទេសស្វីស ប៉ុន្តែដោយសារកូវីដ១៩ World Economic Forum ឬអាចហៅម្យ៉ាងទៀតបានថា Davos Forum ត្រូវធ្វើឡើងតាមប្រព័ន្ធវីដេអូអនឡាញជំនួសវិញ។
អត្ថបទគួរអាន
នៅក្នុងអំឡុងវេទិកាសេដ្ឋកិច្ចពិភពលោក លោកស៊ី ជីនពីង បានអំពាវនាវឲ្យមានកិច្ចសហប្រតិបត្តិការគ្នាដើម្បីដោះស្រាយបញ្ហាប្រឈមជាសកល។ បន្ថែមលើនេះ មេដឹកនាំកំពូលរបស់ចិននេះ ក៏បានព្រមានផងដែរថា ការប្រឈមមុខដាក់គ្នារវាងប្រទេសមហាអំណាចធំៗនឹងនាំមកនូវផលវិបាកធ្ងន់ធ្ងរ វិនាសកម្មយ៉ាងខ្លាំង។ លោកស៊ីថែមទាំងបាននិយាយដោយមិនលាក់លៀមថា ប្រទេសមហាអំណាចគួរបោះបង់ គំនិតចង់បង្កើតសង្គ្រាមត្រជាក់ថ្មីចោលទៅ។
ដោយមិននិយាយចោទប្រកាន់ប្រទេសណាមួយឡើយ មេដឹកនាំចិនបានព្រមានប្រឆាំងផងដែរនឹងការនិយមជ្រុលផ្នែកមនោគមវិជ្ជា និងនយោបាយ បញ្ហាសេដ្ឋកិច្ច វិទ្យាសាស្ត្រ ព្រមទាំងបច្ចេកវិទ្យា។ ប្រធានាធិបតីចិន លោកស៊ី ជីនពីន បន្ថែមថា ប្រវត្តិសាស្ត្របានបង្ហាញឲ្យគេឃើញច្បាស់ម្តងហើយម្តងទៀតថា ការប្រឈមមុខដាក់គ្នា មិនអាចដោះស្រាយបញ្ហាបានទេ ប៉ុន្តែវានាំមកនូវតែផលវិបាកធ្ងន់ធ្ងរតែប៉ុណ្ណោះ។
ត្រង់ចំណុចទាំងនេះ ទោះបីជា លោកស៊ី ជីនពីង មិនបានចង្អុលមុខចំៗថាជានរណាក៏ដោយ ក៏គេអាចដឹងបានថា លោកចង់សំដៅដល់សហរដ្ឋអាមេរិក ដែលជាការកត់សម្គាល់ ការអត្ថាធិប្បាយរបស់មេដឹកនាំចិនរូបនេះ ធ្វើឡើងស្របពេលដែលទំនាក់ទំនងរវាងទីក្រុងប៉េកាំង និង ទីក្រុងវ៉ាស៊ីនតោន បាននិងកំពុងមានភាពតានតឹងខ្លាំងនឹងគ្នាកាន់តែខ្លាំង ជុំវិញបញ្ហាជាច្រើនដូចជា អធិបតេយ្យភាពរបស់តៃវ៉ាន់ ជម្លោះសមុទ្រចិនខាងត្បូង កម្មសិទ្ធិបញ្ញា ពាណិជ្ជកម្ម និងបញ្ហាសិទ្ធិមនុស្សជាដើម។
សូមជម្រាបថា ក្រៅតែពីនិយាយទាក់ទងនឹងបញ្ហាភូមិសាស្ត្រនយោបាយ និង បញ្ហាភាពតានតឹងក្នុងតំបន់ ប្រមុខដឹកនាំកំពូលរដ្ឋចិន ក៏បានសន្យាដែរថា នឹងបញ្ជូនវ៉ាក់សាំងកូវីដ១៩ ចំនួន ១ពាន់លានដូសបន្ថែមទៀតទៅឲ្យប្រទេសនានា ដើម្បីបន្តទប់ទល់នឹងជំងឺរាតត្បាតកូវីដ១៩ផងដែរ៕
None
