ធនាគារកណ្តាលចិនសន្យា «ជួយគាំទ្រសេដ្ឋកិច្ច» ចំពេលកូវីដ១៩កំពុងរាតត្បាតខ្លាំង

ការអត្ថាធិប្បាយរបស់ធនាគាកណ្តាលចិនអំពីការគាំទ្រដល់សេដ្ឋកិច្ចបានធ្វើឡើង ចំពេលដែលអ្នកវិភាគមួយចំនួនបានកាត់បន្ថយការព្យាករណ៍កំណើនប្រទេសចិន ដោយសារតែការបន្តការប្រើវិធានការបិទខ្ទប់ ដោយសារមានការឆ្លងនៃកូវីដ១៩ នៅក្នុងទីក្រុងធំៗជាច្រើន ដែលបានធ្វើឲ្យប៉ះពាល់ដល់ការធ្វើដំណើរ ការដឹកជញ្ចួន កំពង់ផែ និងការផ្អាកអាជីវកម្មក្រុមហ៊ុនធំៗជាច្រើនទៀត។

លោក Yi Gang ទេសាភិបាលធនាគារនៃប្រជាជនចិន (PBOC) បាននិយាយនៅក្នុងសុន្ទរកថា ប្រចាំឆ្នាំសម្រាប់អាស៊ីថា នៅក្នុងវេទិកាប៉ូអាវនាពេលថ្មីៗនេះថា គោលនយោបាយរូបិយវត្ថុរបស់ប្រទេសចិនដើម្បីគាំទ្រដល់សេដ្ឋកិច្ច គឺមានស្ថិរភាពល្អ ដូច្នេះជាមួយនឹងទស្សនវិស័យនៃគោលនយោបាយនេះប្រាកដជាអាចជួយជំរុញដល់សេដ្ឋកិច្ចបានពេញមួយឆ្នាំ។

យ៉ាងណាមិញ ក្រុមស្ថាប័នអ្នកឃ្លាំមើលនៅប្រទេសចិនបាននិយាយថា វិធានការជំរុញបន្ថែមនេះ នឹងត្រូវការអនុវត្តក្នុងពេលឆាប់ៗនេះ ប្រសិនបើរដ្ឋាភិបាលចង់សម្រេចបាននូវគោលដៅកំណើនសេដ្ឋកិច្ចនៅឆ្នាំ ២០២២ របស់ខ្លួនឲ្យបានក្នុងកម្រិត ៥,៥ %។

គួរកត់សម្គាល់ថា តម្លៃទំនិញ ម្ហូបអាហារ និងលំនៅដ្ឋានបានកើនឡើងទូទាំងពិភពលោកកាលពីឆ្នាំមុន ហើយសង្រ្គាមអ៊ុយក្រែនបានបន្ថែមសម្ទុះកាន់តែខ្លាំងដល់អតិផរណាពិភពលោក ដែលគំរាមកំហែងដល់ការងើបឡើងវិញនៃសេដ្ឋកិច្ចទូទាំងពិភពលោក និងស្ថិរភាពហិរញ្ញវត្ថុសកល។ ក្នុងនោះ អតិផរណាតម្លៃទំនិញប្រើប្រាស់ក្នុងប្រទេសចិនបានកើនឡើងលឿនជាងការរំពឹងទុកពី ០,៩% នៅក្នុងខែកុម្ភៈ ទៅដល់ ១,៥% នៅក្នុងខែមីនា ខណៈរដ្ឋាភិបាលចិនបានដាក់គោលដៅថា អតិផរណប្រចាំឆ្នាំនៅប្រទេសចិននៅឆ្នាំ២០២២នឹងមានត្រឹមរង្វង់ ៣%។

គួរជម្រាបថា មូលនិធិរូបិយវត្ថុអន្តរជាតិកាលកាលពីថ្ងៃទី ១៩មេសា បានកាត់បន្ថយការព្យាករកំណើនរបស់ខ្លួនសម្រាប់ប្រទេសចិនក្នុងឆ្នាំនេះមកនៅត្រឹម ៤,៤% ដោយសារតែមានវិធានការបិទខ្ទប់ ដើម្បីទប់ស្កាត់ការរីករាលដាលកូវីដ១៩ ដែលបណ្តាលឲ្យមានការរំខានដល់ខ្សែចង្វាក់ផ្គត់ផ្គង់យ៉ាងធ្ងន់ធ្ងរ៕

អត្ថបទ វ៉ាន់ ស្រីរ័ត្ន