aទីភ្នាក់ងារព័ត៌មានស៊ីនហួបានអះអាងថា ច្រករបៀងពាណិជ្ជកម្មផ្លូវគោកនិងផ្លូវសមុទ្រថ្មី ដែលរួមគ្នាសាងសង់ដោយបណ្តាខេត្តនៅភាគខាងលិចប្រទេសចិន និងបណ្តាប្រទេសអាស៊ាន ក៏ជាគម្រោងដ៏សំខាន់មួយក្រោមគំនិតផ្តួចផ្តើមខ្សែក្រវ៉ាត់និងផ្លូវរបស់ប្រទេសចិន។
លោក ចាង ស៊ីងយ៉ាន ( Zhang Xingyan) អ្នកគ្រប់គ្រងទូទៅនៃក្រុមហ៊ុន សឺរ៉េស ហ្រ្គូប (SERES Group ) បាននិយាយថា "បើធៀបទៅនឹងផ្លូវចាស់ដែលភ្ជាប់តាមទន្លេនិងសមុទ្រ ច្រករបៀងពាណិជ្ជកម្មថ្មីអាចជួយឲ្យក្រុមហ៊ុនកាត់បន្ថយពេលដឹកជញ្ជូនពី ១០ ទៅ ២០ ថ្ងៃ។
អ្នកគ្រប់គ្រងទូទៅនៃក្រុមហ៊ុន សឺរ៉េស ហ្រ្គូប រូបនេះ បានលើកឡើងទៀតថា គិតត្រឹមឆ្នាំ ២០២២ ក្រុមហ៊ុនបាននាំចេញយានយន្ត និងគ្រឿងបន្លាស់រថយន្ត ដែលមានតម្លៃប្រហែល ២ ប៊ីលានយន់ ឬប្រហែល ជា ២៨៤ លានដុល្លារ តាមរយៈច្រករបៀងពាណិជ្ជកម្មថ្មីទៅកាន់ប្រទេសជាច្រើនរួមទាំងប្រទេសឥណ្ឌូនេស៊ី ប៉េរូ និង អេក្វាឌ័រ ផង។
កាលពីបួនឆ្នាំមុន ច្រករបៀងពាណិជ្ជកម្មថ្មីនេះបានតភ្ជាប់កំពង់ផែសរុបចំនួន ១៦៦ ក្នុង ៧១ ប្រទេស ប៉ុន្តែឥឡូវនេះវាបានពង្រីករហូតដល់ជាង ៣៨០ កំពង់ផែនៅទូទាំង ១១៩ ប្រទេស។
យោងតាមទីភ្នាក់ងារសារព័ត៌មានរើយធឺ ការសិក្សាថ្មីៗបានបង្ហាញថា ប្រទេសចិនបានចំណាយប្រាក់ចំនួន ២៤០ ពាន់លានដុល្លារ ដើម្បីជួយឧបត្ថម្ភប្រទេសកំពុងអភិវឌ្ឍន៍ចំនួន ២២ នៅចន្លោះឆ្នាំ ២០០៨ និង ២០២១ ជាមួយនឹងចំនួនកើនឡើងនាប៉ុន្មានឆ្នាំចុងក្រោយនេះ។ ស្ទើរតែ ៨០% នៃការផ្តល់ប្រាក់កម្ចីត្រូវបានធ្វើឡើងនៅចន្លោះឆ្នាំ ២០១៦ និង ២០២១ សម្រាប់ប្រទេសមានចំណូលមធ្យម រួមទាំងប្រទេស អាហ្សង់ទីន ម៉ុងហ្គោលី និងប៉ាគីស្ថាន។
អត្ថបទគួរអាន
បច្ចុប្បន្ន ប្រទេសកាន់តែច្រើនបានជួបការលំបាកក្នុងការសងប្រាក់កម្ចី ដែលបានចំណាយលើការកសាងហេដ្ឋារចនាសម្ព័ន្ធ"ខ្សែក្រវាត់និងផ្លូវ"។
លោកស្រី ជេនណេត យេឡេន រដ្ឋមន្រ្តីក្រសួងហិរញ្ញវត្ថុអាមេរិក នាពេលកន្លងមក បានរិះគន់គម្រោងនានានៅក្រោមគំនិតផ្តួចផ្តើមខ្សែក្រវាត់ និងផ្លូវ ដោយលោកស្រីបានលើកឡើងថា វាអាចជាអន្ទាក់បំណុល។ កាលពីខែមីនា លោកស្រីបាននិយាយថា លោកស្រីមានការព្រួយបារម្ភយ៉ាងខ្លាំងអំពីសកម្មភាពមួយចំនួនដែលប្រទេសចិនចូលរួមជាសកល ដោយសារការចូលរួមរបស់ចិនគឺធ្វើឡើងតាមរបៀបដែលទុកឱ្យប្រទេសអ្នកខ្ចីប្រាក់ជាប់នៅក្នុងបំណុល និងមិនលើកកម្ពស់ការអភិវឌ្ឍសេដ្ឋកិច្ច។
ជាការឆ្លើយតបនឹងការចោទប្រកាន់បែបនេះ ប្រទេសចិនបានហៅការកត់សម្គាល់របស់រដ្ឋមន្ត្រីហិរញ្ញវត្ថុអាមេរិករូបនេះថា ជាការមិនទទួលខុសត្រូវនិងមិនសមហេតុផល។ រដ្ឋាភិបាលចិនបាននិយាយថា បញ្ហាបំណុលរបស់ពិភពលោកត្រូវបានធ្វើឱ្យកាន់តែធ្ងន់ធ្ងរឡើង ដោយសារតែការដំឡើងអត្រាការប្រាក់ដោយធនាគារកណ្តាលរបស់អាមេរិក៕
