លោក កៅ ហ្វាង មន្ត្រីនាំពាក្យក្រសួងពាណិជ្ជកម្មចិន បានបញ្ជាក់នៅក្នុងសន្និសីទសារព័ត៌មានកាលពីថ្ងៃព្រហស្បតិ៍សប្ដាហន៍នេះថា ការវិនិយោគផ្ទាល់នៅក្រៅប្រទេស (ODI) របស់ចិន គឺបានធ្វើឡើងនៅក្នុងប្រទេស និងតំបន់ចំនួន ១៥៧ ដោយមានតម្លៃវិនិយោគសរុបប្រមាណជាង ៤២ពាន់លានដុល្លារអាមេរិក។
ជាមួយគ្នានេះដែរ នៅក្នុងរយៈពេល ៥ខែមកនេះ ក្រុមហ៊ុនចិន ក៏បានបង្កើនការវិនិយោគ នៅក្នុងប្រទេសស្ថិតក្នុងគម្រោងផ្លូវមួយខ្សែក្រវាត់មួយ ដោយការវិនិយោគថ្មីៗមានកើនឡើង១៦% ធៀបនឹងរយៈពេលដូចគ្នាកាលពីឆ្នាំមុន ពោលគឺមានទំហំទឹកប្រាក់វិនិយោគប្រមាណជាង ៦.៥០០លានដុល្លារអាមេរិក។
ការវិនិយោគផ្ទាល់នៅក្រៅប្រទេសរបស់ចិន គឺភាគច្រើន វិនិយោគក្នុងវិស័យដូចជា ការជួល និងសេវាកម្មអាជីវកម្ម, ការលក់ដុំ និងរាយ ក៏ដូចជាការផលិតផងដែរ។ ក្នុងនោះដែរ ចំពោះគម្រោងវិនិយោគថ្មីនៅក្រៅប្រទេស ដែលស្ថិតនៅក្នុងកិច្ចសន្យា គឺមានតម្លៃសរុបប្រមាណ ៨៥ពាន់លានដុល្លារអាមេរិក កើនឡើង ១៤,៤%។
អត្ថបទទាក់ទង!
នៅក្នុងរយៈពេល ៥ខែ កន្លងមកនេះ ចំនួនគម្រោងវិនិយោគនៅក្រៅប្រទេសនីមួយៗ ដែលបានចុះហត្ថលេខាលើកិច្ចសន្យា ក្នុងមានតម្លៃលើពី ៥០លានដុល្លារអាមេរិក គឺមាន ៣១៩គម្រោង កើនឡើង៣២គម្រោង ធៀបនឹងរយៈពេលដូចគ្នាកាលពីឆ្នាំមុន ខណៈដែលតម្លៃកិច្ចសន្យាសរុបនៃគម្រោងទាំងជាង ៣០០គម្រោងនោះ គឺមានតម្លៃរហូតដល់ជាង ៧០ពាន់លានដុល្លារ ដោយមានប្រមាណជាង ៨២% នៃគម្រោងថ្មីដែលបានចុះកិច្ចសន្យាសរុប៕
None
