នៅក្នុងវេទិកា ខ្សែក្រវាត់ និងផ្លូវ លើកទី២ របស់មហាយក្សចិន ដែលទើបតែបិទបញ្ចប់ថ្មីៗនេះ លោក លី ខឺឈាង នាយករដ្ឋមន្រ្តីនៃសាធារណៈរដ្ឋប្រជាមានិតចិន បានចេញមុខអះអាងថា នឹងចាប់ផ្តើមការពិភាក្សាទាក់ទិនទៅនឹង សហភាពអឺរ៉ុប ដែល កំពុងបើកដំណើរការឆ្ពោះទៅរកការដក EBA ពីកម្ពុជា និងបង្ហាញពី ឆន្ទៈច្បាស់លាស់ ក្នុងការជួយដល់ប្រទេសកម្ពុជា ហើយនឹងពិនិត្យលទ្ធភាពគ្រប់បែបយ៉ាង ក្នុងការទទួលនូវ ផលិតផលពី ប្រទេសកម្ពុជា លើអ្វីដែលប្រទេសចិន មានតម្រូវការចាំបាច់នោះ។
ទាក់ទងទៅនឹងរឿងការព្យួរប្រព័ន្ធអនុគ្រោះពន្ធនេះដែរ លោក វ៉ាន់ ហូនីង ដែលជាសមាជិកគណៈអចិន្ត្រៃយ៍ នៃការិយាល័យនយោបាយ និង ជាលេខាធិការនៃលេខាធិការដ្ឋានបក្សកុម្មុយនីស្តចិន បានបង្ហាញជំហរយ៉ាងរឹងមាំ របស់រដ្ឋាភិបាលចិន ក្នុងការជួយដោះស្រាយគ្រប់បញ្ហារបស់មិត្តកម្ពុជា ដែលបាននឹងកំពុងជួបប្រទះបញ្ហា រួមមានទាំងបញ្ហាប្រព័ន្ធអនុគ្រោះពន្ធ (EBA) ដែលសហភាពអឺរ៉ុប កំពុងអនុវត្ដនីតិវិធី ដែលអាចនឹងត្រូវបានព្យួរនាពេលខាងមុខនេះផងដែរ។
អត្ថបទទាក់ទង!
លោក វ៉ាន់ ហូនីង លេខាធិការនៃលេខាធិការដ្ឋានបក្សកុម្មុយនីស្តចិន បានបញ្ជាក់ថា ភាគីចិន បានសិក្សាពីផលប៉ះពាល់នៃការដក EBA របស់សហភាពអឺរ៉ុបពីប្រទេសកម្ពុជាហើយ តែរកមិនឃើញមានការប៉ះពាល់ធ្ងន់ធ្ងរទេ ហើយចិននឹងរិះរកវិធីផ្សេងៗជួយដល់កម្ពុជាពីការបាត់បង់ផលប្រយោជន៍ធំនេះ។
កម្ពុជាចំណេញអ្វីខ្លះពីវេទិកា ខ្សែក្រវាត់ និង ផ្លូវលើកទី២ នៅប៉េកាំង?
វេទិកាខ្សែក្រវាត់ និងផ្លូវ លើកទី២ របស់មហាយក្សសេដ្ឋកិច្ចពិភពលោកទី២ របស់ចិន បានបង្អើលអស់ពិភពលោក ឲ្យងាកមកចាប់កិច្ចសហប្រតិបត្តិការជាសកលតែម្តង ។ វេទិកាខ្សែក្រវាត់ និងផ្លូវ លើកទី ២ នៅក្នុងទីក្រុងប៉េកាំង ប្រទេសចិន គេកត់សម្គាល់ឃើញថា មានការចូលរួមពីថ្នាក់ដឹកនាំកំពូលៗ មកពីបណ្តាប្រទេសជាង ១០០ប្រទេស និង អង្គការអន្តជាតិចំនួន ២០។
វេទិកាដែលអន្តរជាតិចាត់ទុកថា ជាវេទិកាធំមហាសាលមួយនេះ ក៏ជាប្រទីបត្រួសត្រាយបើកផ្លូវឲ្យ ប្រទេសកម្ពុជា ចាប់បាននូវ ឱកាសមាស និង ផលចំណេញជាច្រើន ដែលក្នុងនោះ មានកិច្ចព្រមព្រៀងជាច្រើន ត្រូវបានចុះហត្ថលេខា ហើយក៏ទទួលបានការចាប់អារម្មណ៍ខ្លាំងពី បណ្តាក្រុមហ៊ុនអភិវឌ្ឍន៍ធំៗ ទៅលើ សក្តានុពលរបស់កម្ពុជាផងដែរ។ ពិតណាស់កម្ពុជាបច្ចុប្បន្នកំពុងតែក្លាយជាមេដែកស្រូបទាញយកវិនិយោគិនចិនជាច្រើនមកកាន់ប្រទេសកម្ពុជា។
នៅក្នុងសន្និសីទសារព័ត៌មាន លោក ស៊ី ជីនពីង ប្រធានាធិបតីនៃសាធារណៈរដ្ឋប្រជាមានិតចិន បានប្រកាសប្រាប់ពិភពលោកក្តែងៗថា វេទិកាខ្សែក្រវាត់ និង ផ្លូវ លើកទី ២នេះ គឺជាមគ្គុទ្ទេសក៍នាំផ្លូវ ទៅកាន់កិច្ចប្រឹងប្រែងជាសកល ដើម្បីជំរុញកិច្ចសហប្រតិបត្តិការរួមគ្នា ហើយក្នុងឱកាសនោះ ក៏មានចុះកិច្ចព្រមព្រៀងរហូតដល់ទៅ ២៨៣ ត្រូវបានសម្រេចផងដែរ។
លើសពីនេះទៅទៀត កិច្ចព្រមព្រៀងសហប្រតិបត្តិការ ដែលមានតម្លៃជាង ៦៤ពាន់លានដុល្លារអាមេរិក ត្រូវបានចុះហត្ថលេខា ក្នុងសន្និសីទ C E O នាឱកាសនោះផងដែរ ហើយថ្នាក់ដឹកនាំកំពូលៗ និង អ្នកជំនាញជាច្រើន ក៏បានកោតសរសើរចំពោះ លក្ខណៈអំណោយផលនៃវេទិកានេះ ដែលបានលើកកម្ពស់ការតភ្ជាប់ និង កិច្ចសហប្រតិបត្តិការអន្តរជាតិ នៅក្នុងការធ្វើពាណិជ្ជកម្ម ការវិនិយោគ និងការអភិវឌ្ឍប្រកបដោយចីរភាព។
សម្តេចតេជោ ហ៊ុន សែន ប្រកាសពីកម្ពុជាទទួលផលពីវេទិកាខ្សែក្រវាត់ និង ផ្លូវ
ដោយឡែកខាងកម្ពុជាឯណេះវិញ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានចូលរួមក្នុងវេទិកាខ្សែក្រវាត់ និង ផ្លូវនេះ ក៏បានបង្ហាញពី លទ្ធផលជាវិជ្ជមាន ដែលកម្ពុជា ទទួលបានផលប្រយោជន៍ជាច្រើន រួមមាន ការចាប់អារម្មណ៍វិនិយោគលើ ការផលិតថាមពលដើរដោយខ្យល់ និង ពន្លឺព្រះអាទិត្យ ការអភិវឌ្ឍទៅលើ បច្ចេកវិទ្យាថ្មី 5G ដំបូងគេបង្អស់នៅកម្ពុជា ការអភិវឌ្ឍផ្លូវដែកនៅកម្ពុជា និង ជាពិសេសគឺ ការចុះហត្ថលេខាលើឯកសារកិច្ចព្រមព្រៀងសំខាន់ៗចំនួន ៦ រវាង កម្ពុជា និង ចិនផងដែរ។
សម្រាប់វិស័យថាមពលនៅកម្ពុជា គឺមានក្រុមហ៊ុនចិនចំនួន ២ ចាប់អារម្មណ៍វិនិយោគនៅក្នុងប្រទេសកម្ពុជា ដោយក្នុងនោះ ក្រុមហ៊ុនមួយ មានបំណងបង្កើតរោងចក្រផលិតបន្ទះ Solar Panel គឺជាបន្ទះអាចស្រូបយកពន្លឺព្រះអាទិត្យ បំប្លែងទៅជាអគ្គិសនីសម្រាប់ប្រើប្រាស់ ខណៈកម្ពុជាបច្ចុប្បន្នកំពុងខ្វះខាតថាមពលអគ្គិសនី ដែលដើរស្របទៅនឹងកំណើនសេដ្ឋកិច្ច។ ហើយក្រុមហ៊ុនមួយទៀតគឺ ក្រុមហ៊ុន China Hauneng Group ដែលជាក្រុមហ៊ុនវិនិយោគលើ ទំនប់វារីអគ្គិសនីសេសានក្រោម ២ ក៏បានបង្ហាញពី គម្រោងថ្មី ទាក់ទិនទៅនឹងការផលិតថាមពលអគ្គិសនីដើរ ដោយពន្លឺព្រះអាទិត្យ ដែលគ្រោងនឹងវិនិយោគបង្កើតអគ្គិសនីចំនួន ២០០មេហ្គាវ៉ាត់ នាពេលខាងមុខនេះផងដែរ។
រីឯវិស័យបច្ចេកវិទ្យាវិញ កម្ពុជា ជាប្រទេសទីមួយហើយ នៅក្នុងតំបន់អាស៊ាន ដែលបានចុះហត្ថលេខាលើ កិច្ចព្រមព្រៀងអភិវឌ្ឍទៅលើបច្ចេកវិទ្យាថ្មី 5G ជាមួយនឹងក្រុមហ៊ុន Huawei ហើយតាមរយៈវិស័យឌីជីថលនេះ គឺពិតជាអាចជួយដល់ វិស័យអប់រំនៅក្នុងប្រទេសកម្ពុជា ក៏ដូចជារាជរដ្ឋាភិបាលកម្ពុជា។
ក្រឡេកទៅមើលវិស័យដឹកជញ្ជូនតាមផ្លូវដែកវិញម្តង សម្តេចតេជោ ក៏បានជួបពិភាក្សាជាមួយក្រុមហ៊ុនសាជីវកម្មសាងសង់ផ្លូវរថភ្លើងរបស់ប្រទេសចិន ទៅលើការអភិវឌ្ឍផ្លូវដែក នៅប្រទេសកម្ពុជា ដោយមានបំណងជំរុញ ធ្វើយ៉ាងណាឱ្យ កម្ពុជា មានក្រុមហ៊ុនផ្លូវដែករបស់ចិនមួយច្បាស់លាស់ ដើម្បីទៅចាប់ដៃសហការជាមួយនឹងក្រុមហ៊ុនផ្លូវដែករបស់ប្រទេសកម្ពុជា ដើម្បីឱ្យការដឹកជញ្ជូនតាមផ្លូវដែកកាន់តែមានប្រសិទ្ធភាព។
តើអ្នកបានអានអត្ថបទនេះ ហើយឬនៅ?
ទំហំពាណិជ្ជកម្មកម្ពុជា-ចិន ក្នុងឆ្នាំ ២០១៨ កើនដល់កម្រិតណា?
ក្នុងឆ្នាំ ២០១៨កន្លងទៅនេះ ទំហំពាណិជ្ជកម្មទ្វេភាគីរវាង កម្ពុជា-ចិន បានឈានដល់ជាង ៧,៣ ពាន់លានដុល្លារអាមេរិក ដែលមានការកើនឡើងជិត ២៧ភាគរយ ធៀបនឹងឆ្នាំ ២០១៧ ក្នុងនោះ ការនាំចេញទំនិញរបស់កម្ពុជា ទៅកាន់ទីផ្សារប្រទេសចិន មានតម្លៃគិតជាទឹកប្រាក់មានប្រមាណតែ ១,៣ពាន់លានដុល្លារអាមេរិក។ ដោយឡែក ការនាំចូលទំនិញពីប្រទេសចិនវិញ មានតម្លៃគិតជាទឹកប្រាក់ប្រមាណ ៦ពាន់លានដុល្លារអាមេរិកឯណោះ។ នេះបើតាមរបាយការណ៍ពី រដ្ឋបាលគយទូទៅ នៃប្រទេសចិន។
ដោយឡែក របាយការណ៍ដដែល បានបង្ហាញឲ្យដឹងថា ក្នុងរយៈពេល ២ខែដំបូង ឆ្នាំ ២០១៩នេះ ទំហំពាណិជ្ជកម្មទ្វេភាគីរវាង កម្ពុជា-ចិន បានឈានដល់ជាង ១.១០០ លានដុល្លារអាមេរិក ដែលមានការកើនឡើងជិត ២១ភាគរយ បើធៀបនឹងឆ្នាំ ២០១៧ ក្នុងនោះ កម្ពុជា នាំចេញទំនិញទៅទីផ្សារចិន ដែលគិតជាទឹកប្រាក់មានតម្លៃ ១៩៧លានដុល្លារអាមេរិក ខណៈការនាំចូលទំនិញពី ចិនមកវិញ គិតជាទឹកប្រាក់មានតម្លៃ ៩៩១លានដុល្លារអាមេរិក។
ក្រឡេកទៅមើល របាយការណ៍ពី ក្រសួងពាណិជ្ជកម្មចិន បង្ហាញថា ទំហំពាណិជ្ជកម្មរវាង ចិន ជាមួយបណ្តាប្រទេសក្នុងគំនិតផ្តួចផ្តើមខ្សែក្រវ៉ាត់ និងផ្លូវ បានកើនដល់ ១.២ទ្រីលានដុល្លារអាមេរិក ដែលស្មើនឹង ២៧ភាគរយនៃទំហំពាណិជ្ជកម្មនៅក្រៅប្រទេសសរុបរបស់ ចិន។
ក្នុងរយៈពេល ៥ឆ្នាំ ចាប់ពីឆ្នាំ ២០១៣ ដល់ ២០១៨ កិច្ចសហប្រតិបត្តិការសេដ្ឋកិច្ច និងពាណិជ្ជកម្ម ក្រោមគំនិតផ្តួចផ្តើមខ្សែក្រវាត់ និងផ្លូវ បានបើកឱកាស ឲ្យប្រទេសចិន បង្កើតតំបន់សេដ្ឋកិច្ច និងពាណិជ្ជកម្មចំនួន ៨២កន្លែង នៅក្នុងប្រទេសចំនួន ២៤ ដោយមានការវិនិយោគជាង ៣៦ពាន់លានដុល្លារអាមេរិក និងបង្កើតការងារក្នុងស្រុកជាង ២សែនកន្លែងថែមទៀតផង៕
None
