កម្ពុជា និង ថៃ ទើបតែបានសម្រេចលើ កិច្ចព្រមព្រៀងប្រតិបត្តិការរួមគ្នាលើការដឹកជញ្ជូនផ្លូវដែកឆ្លងកាត់ព្រំដែនកម្ពុជា-ថៃ កាលពីពេលថ្មីៗនេះ ដែលមានការចូលរួមពីមេដឹកនាំប្រទេសទាំងពីរ គឺ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តម ប្រាយុទ្ធ ចាន់អូចា នាយករដ្ឋមន្ត្រីនៃព្រះរាជាណាចក្រថៃឡង់ដ៍។
ដោយឡែក ប្រទេសថៃ គ្រោងនឹងចុះអនុស្សរណៈនៃកិច្ចសហប្រតិបត្តិការលើ គម្រោងផ្លូវដែក ណងខៃ-វៀងចន្ទន៍ តភ្ជាប់ទៅកាន់ប្រទេសឡាវ និង ចិន នៅពេលឆាប់ៗខាងមុខ ក្នុងវេទិកា ខ្សែក្រវ៉ាត់ និងផ្លូវ លើកទី ២ ដែលធ្វើឡើងនៅក្នុងទីក្រុងប៉េកាំង ប្រទេសចិន។
អត្ថបទទាក់ទង!
លោកស្រី វីឡា វណ្ណ ម៉ាងក្លា ថាណាកុល អគ្គនាយកនៃនាយកដ្ឋានកិច្ចការសេដ្ឋកិច្ចអន្តរជាតិ បានឲ្យដឹងថា អនុស្សរណៈនៃកិច្ចសហប្រតិបត្តិការនេះ នឹងរួមបញ្ចូលទាំង ស្ពានឆ្លងព្រំដែន ផ្លូវល្បឿនលឿន ដែលមានកាលបរិច្ឆេទបញ្ចប់គម្រោងផ្សេងៗគ្នា។ ចិន និងថៃ បានសន្យាថា នឹងជំរុញកិច្ចសហប្រតិបត្តិការទ្វេភាគី ឲ្យកាន់តែស៊ីជម្រៅបន្ថែមទៀត ជាពិសេសលើ គម្រោងផ្លូវដែកតភ្ជាប់ប្រទេសទាំងពីរ និងឆ្ពោះទៅកាន់ប្រទេសឡាវ។
លោក វ៉ាង យី រដ្ឋមន្រ្តីការបរទេសចិន បានអះអាងថា ប្រទេសចិន មានឆន្ទៈក្នុងការបំពេញការងារជាមួយ ថៃ ដើម្បីធ្វើផែនការច្បាស់លាស់សម្រាប់កិច្ចសហប្រតិបត្តិការទ្វេភាគី និងពន្លឿនការសាងសង់ផ្លូវរថភ្លើងចិន-ថៃ ដើម្បីតភ្ជាប់ទៅបណ្តាញខ្សែរត់ ចិន-ឡាវ-ថៃ។
រីឯ លោក ដុន ប្រាមោទ្យ វី ណៃ រដ្ឋមន្រ្តីការបរទេសថៃ ក៏បានលើកឡើងដែរថា ប្រទេសថៃ នឹងធ្វើការជាមួយចិន ដើម្បីជំរុញកិច្ចសហប្រតិបត្តិការលើ ពាណិជ្ជកម្ម និង សេដ្ឋកិច្ច ជាពិសេសជំរុញការសាងសង់ផ្លូវដែក ថៃ-ចិន ឲ្យកាន់តែសកម្មជាងមុនបន្ថែមទៀត។
ដោយឡែក គម្រោងផ្លូវដែកតភ្ជាប់ប្រទេសឡាវ-ចិន ដែលមានប្រវែងជាង ៤០០គីឡូម៉ែត្រ ជាគម្រោងមួយស្ថិតក្នុងចំណោមគម្រោងផ្លូវដែកក្នុងតំបន់ ដែលស្ថិតក្រោមគំនិតផ្តួចផ្តើម ខ្សែក្រវ៉ាត់មួយ-ផ្លូវមួយរបស់ប្រទេសចិន ហើយគម្រោងនេះ នឹងចំណាយទុនសាងសង់ប្រមាណ ៦ពាន់លានដុល្លារអាមេរិក ចាប់ផ្តើមលេចចេញជារូបរាងបណ្តើរៗហើយ។
គួរជម្រាបដែរថា ក្រៅពីគម្រោងផ្លូវដែក ប្រទេសចិន ក៏គ្រោងនឹងបង្កើត តំបន់ពាណិជ្ជកម្មសេរីរួមគ្នា ៣ប្រទេសតែម្តង ដែលស្ថិតនៅជាប់ព្រំដែនជាមួយប្រទេសថៃ និងប្រទេសឡាវ ក្នុងគោលបំណងពង្រឹងចំណងពាណិជ្ជកម្មជាមួយ បណ្តាប្រទេសក្នុងតំបន់មេគង្គនៃអាស៊ីអាគ្នេយ៍៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
