ចិនគ្រោងនឹងទិញផលិតផលកសិកម្មពីតំបន់អាស៊ានដែលមានតម្លៃទឹកប្រាក់ ១៥០០លានដុល្លារ ពោលបង្កើនការទិញទ្វេដង។ ប្រការនេះ វាជាការបង្ហាញពីការប្តេជ្ញាចិត្តរបស់ចិនក្នុងការជំរុញកិច្ចសហប្រតិបត្តិការទ្វេភាគី និងជួយស្តារសេដ្ឋកិច្ចរបស់ក្នុងតំបន់មួយនេះ ក្រោយជំងឺរាតត្បាតកូវីដ១៩។ បើយោងតាមការសែត Global Times ដដែល នៅឆ្នាំ២០១៨ ទំហំការនាំចូលផលិតផលកសិកម្មពីអាស៊ាន ទៅចិនមានត្រឹមតែជាង១៨ពាន់លានដុល្លារប៉ុណ្ណោះ។
គួរជម្រាបថា ពាណិជ្ជកម្មលើផលិតផលកសិកម្មរវាងចិន និងអាស៊ានកំពុងពង្រីកវិសាលភាពកាន់តែធំទៅៗ នៅប៉ុន្មានឆ្នាំចុងក្រោយនេះ។ ជាក់ស្តែង ពីមុនមក ចិននាំចូលពីអាស៊ានតែផលិតផលផ្លែឈើប៉ុណ្ណោះ ប៉ុន្តែអំឡុងពេលមានជម្លោះពាណិជ្ជកម្មជាមួយសហរដ្ឋអាមេរិកប្រទេសចិនបានបង្កើនការនាំចូលអង្ករ និងសណ្តែកសៀងបន្ថែមទៀត។
គិតមកទល់បច្ចុប្បន្ន ចិនបានចុះហត្ថលេខាលើកិច្ចសហប្រតិបត្តិការទ្វេភាគីក្នុងវិស័យកសិកម្ម ជាង៣០ ផ្សេងៗពីគ្នាជាមួយប្រទេសសមាជិកអាស៊ាន ដែលក្នុងនោះចិនក៏បានចាប់ផ្តើមអនុវត្តគម្រោង ផ្លាស់ប្តូរ និងបង្ហាត់បង្រៀនបច្ចេកវិទ្យាកសិកម្មជាង២០០ គម្រោងផងដែរ។
អត្ថបទគួរអាន
ក្នុងចំណោមសមាជិកអាស៊ានទាំង១០ប្រទេស ប្រទេសថៃនិង ឥណ្ឌូនេស៊ីជាប្រភពនាំចូលផលិតផលកសិកម្មរបស់ចិនធំជាងគេ។ នេះបើតាម Global Times ដដែល។
សូមជម្រាបថា បើតាមទិន្នន័យពីរដ្ឋបាលគយរបស់ចិន ពាណិជ្ជកម្មបន្លែផ្លែឈើរវាងចិននិងអាស៊ានកាលពីឆ្នាំ២០២០ មានជាង ១៥ពាន់លានដុល្លារអាមេរិក។ ក្នុងនោះការនាំចេញផ្លែឈើពីអាស៊ានទៅចិន មានតម្លៃជាង៦ពាន់លានដុល្លារ។ ដោយឡែក គ្រាន់តែនៅ៨ខែឆ្នាំ២០២១នេះ ពាណិជ្ជកម្មបន្លែនិងផ្លែឈើរវាងចិននិអាស៊ាន បានកើនឡើងលើសតួលេខពេញមួយឆ្នាំ២០២០ រួចបាត់ទៅហើយ ពោលគឺអាស៊ានបាននាំចេញផ្លែឈើទៅចិន កើនលើស ៦,៤ពាន់លានដុល្លារអាមេរិក៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
