ពាក់ព័ន្ធបញ្ហានេះ សហព័ន្ធស្រូវ-អង្ករ កម្ពុជា បានអះអាងថា ការរាតត្បាតសាកលនៃជំងឺកូវីដ-១៩ បានបង្ករផលប៉ះពាល់យ៉ាងខ្លាំងដល់វិស័យស្រូវ-អង្ករ កម្ពុជា ដូចជា ថ្លៃដឹកជញ្ជូនឡើងថ្លៃ និងកង្វះមធ្យោបាយដឹកជញ្ជូនទៅកាន់ទីផ្សារឆ្ងាយៗ ក៏ដូចជា តម្លៃអង្ករលើទីផ្សារអន្តរជាតិធ្លាក់ចុះផងនោះ បានធ្វើឱ្យប៉ះពាល់ដល់តម្លៃស្រូវរបស់កសិករកម្ពុជានាឆ្នាំនេះធ្លាក់ចុះជាងឆ្នាំមុន ប៉ុន្ដ ការធ្លាក់ចុះនេះ គឺមិនមានក្នុងកម្រិតតិចតួចប៉ុណ្ណោះ ហើយខាងសហព័ន្ធស្រូវអង្ករក៏កំពុងសិក្សាពីបញ្ហានេះផងដែរ។
លោក ហ៊ុន សំណាង ជាកសិករនៅស្រុកស្វាយអន្ទរ ខេត្តព្រៃវែង បានរៀបរាប់ប្រាប់សារព័ត៌មានខេមបូណូមីសថា ស្ថិតក្នុងបរិបទកូវីដ-១៩ នេះ តម្លៃស្រូវហាក់មានធ្លាក់ចុះជាបន្តបន្ទាប់ ក៏ប៉ុន្តែ សម្រាប់ជី និងថ្នាំកសិកម្ម បែរជាបន្តឡើងថ្លៃទៅវិញ។ កសិកររូបនេះ បានអះអាងថា តម្លៃស្រូវក្នុងឆ្នាំនេះបានធ្លាក់ចុះជាងឆ្នាំមុន ខណៈឆ្នាំមុនតម្លៃស្រូវប្រភេទ OM ក្នុងខេត្តព្រៃវែង អាចលក់បានតម្លៃ១២០០រៀល ក្នុងមួយគីឡូក្រាម តែសព្វថ្ងៃ លក់បានត្រឹម៨២០រៀល ក្នុងមួយគីឡូក្រាមប៉ុណ្ណោះ។ ដោយឡែក ពាក់ព័ន្ធតម្លៃជីនិងថ្នាំកសិកម្មវិញ ត្រូវបានលោកសំណាង គូសបញ្ជាក់ថា បច្ចុប្បន្ននេះ ជីស១បាវមានតម្លៃរហូតដល់ ១៧ម៉ឺនរៀលឯណោះ ខណៈឆ្នាំមុនតម្លៃនៅត្រឹមតែ៨ម៉ឺនទៅ៩ម៉ឺន ក្នុង១បាវក្នុងបរិមាណ៥០គីឡូក្រាម។
កសិកររូបនេះបានបន្តត្អូញត្អែរ និងចោទជាសំនួរទៅកាន់ក្រសួងពាក់ព័ន្ធ ពិសេសក្រសួងកសិកម្ម ថា តើមូលហេតុអ្វីបានជាឱ្យតែដល់រដូវប្រមូលផល តម្លៃស្រូវតែងតែធ្លាក់ចុះ0x017d7 ដោយលោកបានបន្តទៀតថា កសិករបច្ចុប្បន្ន តែងជួបបញ្ហាស្រូវធ្លាក់ថ្លៃ តែតម្លៃជីនិងថ្នាំកសិកម្ម បែរជាឡើងថ្លៃទៅវិញ។ ដោយឡែក លោក ជឿក គីមយ៉ាង កសិករម្នាក់ទៀត នៅអង្គរបូរី ខេត្តតាកែវ ឯណោះវិញ ក៏បានអះអាងដែរថា តម្លៃស្រូវឆ្នាំនេះហាក់មានការធ្លាក់ចុះជាងឆ្នាំមុនបន្តិច ដោយបច្ចុប្បន្នស្រូវប្រភេទOM អាចលក់បានតម្លៃ៨៤០រៀលទៅ៨៥០រៀល ក្នុងមួយគីឡូក្រាម ទៅតាមគុណភាពស្រូវ។
អត្ថបទគួរអាន
ទាក់ទងនឹងទីផ្សារស្រូវនេះដែរ ឈ្មួញប្រមូលទិញស្រូវម្នាក់ នៅខេត្តកំពង់ស្ពឺ លោក ណុប ភាន់ ក៏បានអះអាងដែរថា តម្លៃស្រូវឆ្នាំនេះពិតជាមានការធ្លាក់ថ្លៃជាងឆ្នាំមុនបន្តិចពិតមែន ដោយលោកបានបញ្ជាក់ថា ឆ្នាំនេះសម្រាប់ស្រូវសើមលោកទិញចូលក្នុងតម្លៃ៧០០រៀល ក្នុងមួយគីឡូក្រាម ខណៈឆ្នាំមុនលោកបានប្រមូលទិញក្នុងតម្លៃ ៨០០រៀលទៅ៩០០រៀល ក្នុងមួយគីឡូក្រាម។
ឆ្លើយតបបញ្ហានេះ លោក លន់ យ៉េង អគ្គលេខាធិការសហព័ន្ធស្រូវ-អង្ករ កម្ពុជា បានអះអាងប្រាប់សារព័ត៌មានខេមបូណូមីសថា តម្លៃស្រូវនាឆ្នាំនេះពិតជាមានការធ្លាក់ចុះជាងឆ្នាំមុនបន្តិចមែន តែមិនបានធ្លាក់ចុះខ្លាំងពេកនោះទេ។ បើតាមលោក លន់ យ៉េង បច្ចុប្បន្ន គ្រប់រោងម៉ាស៊ីនដែលជាសមាជិករបស់សហព័ន្ធស្រូវ-អង្ករ កម្ពុជា បានទិញស្រូវជាមធ្យមក្នុងតម្លៃ ៩០០រៀល ទៅ១០៥០រៀល ក្នុងមួយគីឡូក្រាម សម្រាប់ស្រូវសើម ខណៈឆ្នាំមុនស្រូវប្រភេទដូចគ្នាជាមធ្យម មានតម្លៃ ៩៥០រៀល ទៅ១១៥០រៀល ក្នុងមួយគីឡូក្រាម។
អគ្គលេខាធិការសហព័ន្ធរូបនេះ បានពន្យល់ថា មូលហេតុដែលធ្វើឱ្យតម្លៃស្រូវឆ្នាំធ្លាក់ចុះ ក៏ព្រោះតែការរាតត្បាតនៃជំងឺកូវីដ-១៩ បានធ្វើឱ្យប៉ះពាល់ដល់តម្លៃអង្ករនៅលើទីផ្សារអន្តរជាតិធ្លាក់ចុះជិត៣០% ពិសេសប្រភេទអង្ករក្រអូប ដែលជាកត្តាសំខាន់ធ្វើឱ្យប៉ះពាល់ដល់តម្លៃស្រូវ-អង្ករ កម្ពុជា បច្ចុប្បន្ន។ យ៉ាងណាក៏ដោយ ពាក់ព័ន្ធការធ្លាក់ចុះនៃតម្លៃស្រូវ នាពេលនេះ ត្រូវបានលោក លន់ យ៉េង អះអាងថា ខាងសហព័ន្ធកំពុងសិក្សាពីបញ្ហានេះ ហើយសហព័ន្ធនៅតែបន្តជួយទិញស្រូវពីកសិករទៅតាមលទ្ធភាពដែលអាចធ្វើបាន។
សូមបញ្ជាក់ថា រយៈពេល ១០ខែ ក្នុងឆ្នាំ២០២១ កម្ពុជា បាននាំចេញស្រូវ ជាង២លានតោន ដែលគិតជាទឹកប្រាក់មានជាង៤៦៥លានដុល្លារ មានកើនឡើង៨៦% បើប្រៀបនឹងរយៈពេលដូចគ្នាកាលពីឆ្នាំ២០២០។ ដោយឡែក ការនាំចេញអង្ករ ទៅកាន់ទីផ្សារអន្តរជាតិមានជាង៤៦ម៉ឺនតោន គិតជាទឹកប្រាក់ជាង៣៩២លានដុល្លារ បានថយចុះ៣៣%។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់និងនេសាទ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
